វ៉ាក់សាំងប្រភេទpfizer ជិត២លានដូស ជាជំនួយរបស់អាមេរិក នឹងដឹកមកដល់កម្ពុជានៅព្រឹកស្អែកនេះ

វ៉ាក់សាំងកូវីដ-១៩ ប្រភេទpfizer ជិត២លានដូសដែលជាជំនួយរបស់អាមេរិកតាមយន្តការកូវ៉ាក់(COVAX) នឹងដឹកមកដល់កម្ពុជានៅព្រឹកថ្ងៃទី៣ ខែឧសភា ឆ្នាំ២០២២ស្អែកនេះ។

លោកស្រីវេជ្ជបណ្ឌិត យក់ សម្បតិ្ត រដ្ឋលេខាធិការក្រសួងសុខាភិបាល បានមានប្រសាសន៍នៅរសៀលថ្ងៃទី០២ ខែឧសភា នេះថា លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា និងឯកអគ្គរដ្ឋទូតសហរដ្ឋអាមេរិកប្រចាំព្រះរាណាចក្រកម្ពុជា នឹងអញ្ជើញប្រគល់-ទទួលផ្លូវការនូវវ៉ាក់សាំងបង្ការជំងឺកូវីដ-១៩ ប្រភេទ Pfizer ​ជិត២លាន​ដូស​ នៅព្រលានយន្តហោះអន្តរជាតិភ្នំពេញ។ នេះជាលើកទី២ហើយ ដែលរដ្ឋាភិបាលសហរដ្ឋអាមេរិកបានផ្តល់វ៉ាក់សាំងបង្ការជំងឺកូវីដ១៩ជូនដល់រដ្ឋាភិបាលកម្ពុជា តាមរយៈយន្តការកូវ៉ាក់ ខណៈលើកទី១បានផ្តល់ចំនួន១១៦០១០០ដូស ជាប្រភេទវ៉ាក់សាំងកូវីដ-១៩ ប្រភេទ“ចនសាន់ &ចនសាន់” ក្នុងនោះចំនួនវ៉ាក់សាំង ៤៥០,៥០០ ដូសបានមកដឹកដល់កម្ពុជាកាលពីថ្ងៃទី៣០ ខែកក្កដា ឆ្នាំ២០២១ និងវ៉ាក់សាំង ចំនួន៦០៩,៦០០ ដូសទៀត បានមកដល់កម្ពុជាកាលពីថ្ងៃទី២ ខែសីហា ឆ្នាំ២០២១។

យន្តការកូវ៉ាក់ និងដៃគូ ដែលរួមមានយូនីសេហ្វ និងអង្គការសុខភាពពិភពលោកបានជួយសម្រួលដល់ការដឹកជញ្ជូនវ៉ាក់សាំងនេះមកដល់កម្ពុជាដោយសុវត្ថិភាព។ កូវ៉ាក់ (COVAX) គឺជាយន្តការសកលមិនធ្លាប់មាន ដើម្បីពន្លឿនការអភិវឌ្ឍ
និងការផលិតវ៉ាក់សំាងកូវីដ-១៩ ដែលមានសុវត្ថិភាព និងធានាឲ្យមានការទទួលបានវ៉ាក់សាំងប្រកបដោយយុត្តិធម៌ និងសមធម៌ និងឆាប់រហ័សបំផុតតាមដែលអាចធ្វើទៅបាន។ យូនីសេហ្វគឺជាទីភ្នាក់ងារដឹកនាំកិច្ចលទ្ធកម្ម និងការដឹកជញ្ជូនវ៉ាក់សំាងកូវីដ-១៩តាមរយៈយន្តការកូវ៉ាក់ ហើយនេះគឺជាប្រតិបត្តិការទ្រង់ទ្រាយធំបំផុត និងមានភាពស្មុគស្មាញបំផុតមិនធ្លាប់មាននៅក្នុងប្រវត្តិសាស្រ្ត​នៃយុទ្ធនាការផ្តល់ថ្នាំបង្ការ៕

អត្ថបទ៖ សំអឿន