តុលាការ​តម្កល់​ទោស​បុរស​ស្បែកខ្មៅ​២នាក់​ឱ្យ​ជាប់​ពន្ធនា​គារ​៣០​ឆ្នាំ​

ចៅក្រមសាលាដំបូងរាជធានីភ្នំពេញ នៅថ្ងៃទី ៩ ខែឧសភា ឆ្នាំ ២០២២នេះ បានប្រកាស​សាល​ក្រម​តម្កល់ទោសឱ្យបុរសស្បែកខ្មៅ ២ នាក់ ជាប់ពន្ធនាគារកំណត់ ៣០ ឆ្នាំ ក្នុងម្នាក់​ បន្ទាប់ពីពួកគេ​បាន​ប្ដឹងទាស់​ និងសាលក្រមដែលអនុវត្តកន្លងទៅ។

បុរសជនជាប់ចោទទាំង២ នាក់ ម្នាក់ឈ្មោះ Ogadimma aigwrlinus អាយុ ៣០ ឆ្នាំ ជនជាតិហ្គាណា និងម្នាក់ទៀតឈ្មោះ Congteabul អាយុ ៣៩ ឆ្នាំ។

​ពួកគេទាំង២នាក់​ត្រូវ​បានអាជ្ញាធរកម្ពុជា​ចាប់ខ្លួនកាលពីថ្ងៃទី ៨ ខែតុលា ឆ្នាំ២០២០ ហើយត្រូវបាន​តុលាការ​សម្រេចឃុំខ្លួននៅថ្ងៃទី ១១តុលា ឆ្នាំ២០២០ ក្រោមការចោទប្រកាន់ពីបទ « រក្សាទុក ដឹក​ជញ្ជូន និងជួញដូរសារធាតុញៀន»។

បន្ទាប់មកនៅថ្ងៃទី ១១ មេសា ឆ្នាំ២០២២ វេលាម៉ោង១៤រសៀល​តុលាការបានបើកសវនាការ​កាត់​ទោសកំបាំងមុខជនជាប់ចោទដោយផ្ដន្ទាទោសដាក់ពន្ធនាគារកំណត់៣០ឆ្នាំ ប៉ុន្តែសាលក្រម​កំបាំង​មុខ​នេះត្រូវបានជនជាប់ចោទឈ្មោះ congteabul ប្ដឹងទាស់ ទើបចៅក្រមតុលាការលោក ស៊ិន សុវណ្ណរ័ត្ន និងលោក ហេង ផេង ជាតំណាងអយ្យការបានបង្គាប់​ឱ្យនាំខ្លួនជនជាប់ចោទ​យកមកបើក​សវនាការ និងប្រកាសសាលក្រមដោយតម្កល់ទោសអោយជនត្រូវមានទោស៣០ឆ្នាំដដែល ក្រោម​ការចោទប្រកាន់ពីបទ «រក្សាទុក ដឹកជញ្ជូន និងជួញដូរសារធាតុញៀន»។ សេចក្ដីសម្រេចនេះបើកផ្លូវឱ្យជនជាប់ចោទប្ដឹងឧទ្ធរណ៍តាមកំណត់ច្បាប់៕

អត្ថបទ៖ មករា