លោក ស សុខា ហៅ​ទង្វើគប់ស្បែក​ជើង​សំដៅ​លើ​សម្ដេច​ដូចក្រពើ​វង្វេងបឹង

លោក ស សុខ រដ្ឋលេខាធិការក្រសួងអប់រំ យុវជន និងកីឡា បានចាត់ទុកទង្វើគប់ស្បែកជើង​សំដោះមកលើសម្ដេច​តេជោ ហ៊ុន សែន ជាកាយវិការក្បត់វប្បធម៌ខ្លួនឯង ក្នុងនាមជាខ្មែយើងពុំអាច​ទទួលបានទេ។

លោក ស សុខា មានប្រសាសន៍ថា ទំនៀមទំលាប់បរទេស ការគប់ទ្រនាប់ជើង ឬយកទ្រនាប់ជើង​វាយនរណាម្នាក់ អាចជារឿងសាមញ្ញ។ តែផ្ទុយទៅវិញ ក្នុងវប្បធម៌ខ្មែរ ការប្រើទ្រនាប់ជើងគប់ក្ដី ឬវាយលើនរណាម្នាក់ក្ដី គឺជាការប្រមាថធ្ងន់ធ្ងរបំផុតលើកិត្តិយស​សេចក្ដីថ្លៃថ្នូរក្នុងនាមជា​មនុស្សមាន​អធិបតេយ្យនៃបូរណភាពរាងកាយ។

លោក ស សុខា បញ្ជាក់ថា ការប្រមាថមួយនេះ មិនមែនសំដៅលើបុគ្គលម្នាក់នោះទេ គឺជាការ​ប្រមាថ​លើ​ប្រជាពលរដ្ឋខ្មែរទាំងមូល ប្រមាថជាតិសាសន៍ឯង គឺកម្ពុជាដែលជារដ្ឋអធិបតេយ្យ។ ក្នុងទស្សន:ខ្មែរ គេហៅទង្វើបែបនេះថា ត្រកួនភ្លេចបឹង!

បើតាមលោក ស សុខា​ ប្រសិនបើចេះភ្ញាក់រលឹក គួរពិចារណាកំហុស ហើយគប្បីចេញ​មុខសម្ដែង​ការសោកស្ដាយ សូមអភ័យទោសសម្ដេចតេជោ សុំការអត់ឱនពីប្រជាពលរដ្ឋខ្មែរ និងជារួម សុំការ​លប់លាងកំហុសពីកម្ពុជា ដែលបានផ្ដល់កំណើតឱ្យកើតជាខ្មែរ និងមានកំណើតរហូត​បានទៅ​រស់នៅឯបរទេសដូចសព្វថ្ងៃ។ កុំឱ្យដូចពាក្យខ្មែរពោលថា ក្រពើវង្វេងបឹង!

សូមជំរាបថា បុរស ខ្មែរអាមរិកម្នាក់ បានយកស្បែកជើងគប់សំដៅទៅលើសម្ដេចតេជោ ហ៊ុន សែន នាយករដ្ឋមន្ត្រី ក្នុងពេលសម្ដេចជួបអ្នកគាំទ្រ នៅរដ្ឋធានីវ៉ាស៊ីនតោន សហរដ្ឋអាមេរិក។

បុរសរូបនេះ គេស្គាល់ឈ្មោះថា អ៊ុក ទូច ជាអតីតទាហានសម័យសាធារណរដ្ឋខ្មែររបស់លោក លន់ នល់ ដែល​បច្ចុប្បន្នកំពុងរស់នៅរដ្ឋកាលីហ្វ័រញ៉ា សហរដ្ឋអាមេរិក៕

អត្ថបទ៖ ឡេង ដេត