លោក ថៃ សារិ ប្ដេជ្ញាបន្តដឹកនាំក្រុមប្រឹក្សាឃុំឫស្សីស្រុកខាងលិច ឲ្យកាន់តែលេចធ្លោថែមទៀត

លោក ថៃ សារិ មេឃុំឫស្សីស្រុកខាងលិច នៃស្រុកកំពង់ត្រាច ខេត្តកំពត បានលើកឡើងនៅព្រឹកថ្ងៃទី ១៩ ខែឧសភា ឆ្នាំ ២០២២ថា គ្រប់អាណត្តិបោះឆ្នោត នៃការជាប់ជាមេឃុំនាពេលកន្លងមក លោកតែងតែបម្រើប្រជាពលរដ្ឋ ដោយឈរលើទិសដៅអាទិភាពចម្បង ដែលថ្នាក់លើប្រគល់ជូន។ លើសពីនេះ លោកបានសន្យាថា បើលោកជាប់ជាមេឃុំ នៅអាណត្តិបោះឆ្នោតឆ្នាំ ២០២២នេះ លោកនឹងខិតខំបន្តដឹកនាំក្រុមប្រឹក្សាក្នុងមូលដ្ឋានខាងលើ ឲ្យកាន់តែមានភាពលេចធ្លោថែមទៀត។

លោក ថៃ សារិ បានបញ្ជាក់ដែរថា លោកបានជាប់ជាមេឃុំចំនួន ៤អាណត្តិមកហើយ។ ចំពោះការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី ៥នេះ លោកក៏នៅតែឈរឈ្មោះ ជាបេក្ខជនលេខរៀងទី ១ របស់គណបក្សប្រជាជនកម្ពុជា បន្តទៀត។

លោក ថៃ សារិ បានបញ្ជាក់ទៀតថា ក្នុងនាមជាមេឃុំ ៤អាណត្តិមកនេះ លោកបានអនុវត្តតាមគម្រោង អភិវឌ្ឍន៍ឃុំ-សង្កាត់ គឺតាំងចាប់ពីឆ្នាំ ២០០២ រហូតមកដល់បច្ចុប្បន្ន ហើយបានអភិវឌ្ឍន៍តាមបណ្តាភូមិនានាផងដែរ។ លោកថា ឃុំឫស្សីស្រុកខាងលិច មាន ៦ភូមិ ដោយភាគច្រើនអភិវឌ្ឍន៍ផ្លូវលំក្រាលក្រួសក្រហម ហើយនៅពេលថ្មីៗនេះ លោកបានដឹកនាំធ្វើផ្លូវបេតុងចំនួន ២ខ្សែ នៅភូមិលក ដោយការអភិវឌ្ឍនេះ គឺអនុវត្តតាមកម្មវិធីគោលនយោបាយ របស់រាជរដ្ឋាភិបាល បានយ៉ាងល្អប្រសើរ។

លោកថា ថ្វីដ្បិតតែជំងឺកូវីដ-១៩ បានថមថយចុះ តែកិច្ចការពារទប់ស្កាត់ការរីករាលដាល នៅតែបន្ត ដោយផ្អែកលើ ការយកចិត្តទុកដាក់ខ្ពស់ ពីក្រសួងសុខាភិបាល ដោយនៅឃុំរបស់លោក នៅតែបន្តចាក់សាំងបង្ការជំងឺកូវីដ-១៩ គ្រប់ដូសនៅតែសកម្មភាព ដើម្បីការពារសុខភាពប្រជាពលរដ្ឋ ក្នុងមូលដ្ឋានរបស់លោក៕

អត្ថបទ៖ សេង ណារិទ្ធ