រដ្ឋមន្ត្រីសុខាភិបាល៖ គិលានុបដ្ឋាក ជាបេះដូងនៃការផ្តល់សេវា មានសុវត្ថិភាពដល់អ្នកជំងឺ

លោកសាស្រ្តាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានលើកឡើងថា គិលានុបដ្ឋាក គឺជាបេះដូងនៃការផ្តល់សេវាដែលមានគុណភាព និងសុវត្ថិភាពដល់អ្នកជំងឺ និងអតិថិជន។

ថ្លែងបើកទិវាគិលានុបដ្ឋាកអន្តរជាតិ ឆ្នាំ២០២២ ក្រោមប្រធានបទ “គិលានុបដ្ឋាករួមគ្នាធ្វើឱ្យប្រសើរឡើងនូវការថែទាំ និងការគោរពសិទ្ធិអតិថិជន ដើម្បីធានាបាននូវសុខភាពជាសកល” នៅព្រឹកថ្ងៃទី១៦ ខែមិថុនានេះ លោកសាស្រ្តាចារ្យ ម៉ម ប៊ុនហេង បានបន្តថា គិលានុបដ្ឋាក និង​ឆ្មប ជាអ្នកផ្តល់​សេវា​ទាំងផ្លូវកាយ ផ្លូវចិត្ត សង្គម និងតាមជំនឿសាសនា ​និងថែទាំតាមបែប​បុគ្គល​ជាមជ្ឈមណ្ឌល។

លោករដ្ឋមន្ត្រីបានបន្តទៀតថា គិលានុប្បដ្ឋាក គឺជាសមាជិកក្នុងសហគមន៍ ដែលពួកគេបម្រើការយល់ពីវប្បធម៌នឹងកន្លែង និងអាច​មានឥទ្ធិពលក្នុងការផ្លាស់ប្តូរឥរិយាបថ ស្របតាមក្រមសីលធម៌ព្រោះថាគិលានុបដ្ឋាក មានគោលបំណងតែមួយគត់ គឺការបម្រើផលប្រយោជន៍​សាធារណៈឱ្យបានល្អ​បំផុត​ដែលអាចធ្វើទៅបាន។

លោករដ្ឋមន្ត្រីបានបន្ថែមថា តាមរយៈដំណើរការនៃ​ការផ្តល់​អាជ្ញាប័ណ្ណ​ដល់គិលានុបដ្ឋាក​នូវសិទ្ធិក្នុង​ការអនុវត្ត សិល្បៈ និង​វិទ្យាសាស្រ្តនៃការថែទាំ ​ដើម្បីបំពេញជូនសាធារណជននូវសេវាថែរក្សា​ដែលមានគុណភាព ប្រសិទ្ធភាព ​និងតម្លាភាព។

លោករដ្ឋមន្ត្រីបានបញ្ជាក់ថា រដ្ឋាភិបាល នៃប្រទេសមួយចំនួនបាន​ទទួល​ស្គាល់​សក្ដានុពល នៃ​ការរីកចម្រើន​ នៃការថែទាំ និងកំពុងពង្រីកការអភិវឌ្ឍកម្លាំង​ពលកម្មថែទាំបន្ថែមទៀត។ អ្នកដឹកនាំសុខាភិបាល​ ជាច្រើនបានប្តេជ្ញាចិត្តធ្វើកិច្ចការនេះ​ ប៉ុន្តែភស្តុតាងបង្ហាញថា គិលានុបដ្ឋាក ជា​ញឹកញាប់​មាន​គុណ​តម្លៃនៅ​ទន់ទាប​នៅឡើយ។

ចំណែករាជរដ្ឋាភិបាលកម្ពុជា ​បាន​យកចិត្តទុកដាក់ និង​បន្តធ្វើឱ្យប្រសើរឡើង​នូវសិទិ្ធដែលប្រជាពលរដ្ឋត្រូវទទួលបាននូវការថែទាំ និងព្យាបាលមាន​គុណភាព​ សុវតិ្ថភាព​ និងមានសមធម៌។

លោកសាស្រ្តាចារ្យ ម៉ម ប៊ុនហេង បានបញ្ជាក់ទៀតថា ក្នុងរយៈពេលពីរឆ្នាំដែលមានការ​រាតត្បាត​ដោយ​ជំងឺកូវីដ-១៩ គិលានប្បដ្ឋាក​ពិតជាបានជួបប្រទះនូវការលំបាកជាច្រើន ទាំង​នៅក្នុងប្រទេសកម្ពុជា និងសកលលោក។

លោករដ្ឋមន្ត្រីបានបន្ថែមឱ្យដឹងថា បញ្ហាទាំងនោះ​មានដូចជា ការងារទទួលខុសត្រូវថែទាំអ្នកជំងឺកូវីដ-១៩ ព្រមទាំង​ការ​ផ្តល់សេវា​សារវន្ត​សំខាន់ៗ​ដែលមិនមែនសេវាជំងឺកូវីដ-១៩ ក្នុងនោះដែរមានជួបប្រទះកង្វះគិលានុបដ្ឋាក-យិកា ដោយពួកគេមានវ័យចូលនិវត្តន៍ច្រើន។ កត្តាទាំងនេះ តម្រូវឱ្យប្រទេសនីមួយៗ ធ្វើការចំណាយ​បន្ថែម​លើចំនួនគិលានុបដ្ឋាក ​នៅតាមមនី្ទរពេទ្យគ្រប់កម្រិត និងសាលាបណ្តុះបណ្តាល​គិលានុបដ្ឋាក​ដែលមានគុណវុឌ្ឍខ្ពស់ ​ដើម្បីបំពេញតម្រូវការសុខាភិបាលរបស់ប្រជាពលរដ្ឋ និង​សហគមន៍៕

អត្ថបទ៖ សំអឿន