លោក ម៉ម ប៊ុនហេង ជំរុញឱ្យមន្រី្តសុខាភិបាលរាជធានី-ខេត្ត បង្កើនការទប់ស្កាត់ជំងឺឆ្លងនានា

លោកសាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានជំរុញឱ្យមន្រី្តសុខាភិបាល​រាជធានី-ខេត្ត​ទាំងអស់ត្រូវខិតខំទប់ស្កាត់ ចំពោះជំងឺឆ្លងនានាពិសេសជំងឺគ្រុនឈាមដែលកំពុងបន្តឆ្លងលើកុមារកម្ពុជា។

ក្នុងពិធីប្រគល់ប័ណ្ណសរសើររបស់រាជរដ្ឋាភិបាលកម្ពុជា ជូនថ្នាក់ដឹកនាំ និងមន្ត្រីសុខាភិបាល នៃមន្ទីរពេទ្យមិត្តភាព​ខ្មែរ-សូវៀត មន្ទីរពេទ្យមិត្តភាពកម្ពុជា-ចិន និងមនី្ទរពេទ្យកុមារជាតិ កាលរសៀលថ្ងៃទី២៩ មិថុនា លោករដ្ឋមន្ត្រីបាន​មានប្រសាសន៍ថា មន្រី្តសុខាភិបាល ក៏ដូចជាគ្រូពេទ្យរាជធានី-ខេត្តទាំងអស់ ត្រូវខិតខំទប់​ស្កាត់ចំពោះជំងឺឆ្លងនានា ពិសេសតាមដានជំងឺគ្រុនឈាម ជំងឺផ្តាសាយបក្សីH5N1 និងធ្វើការអប់រំដល់ប្រជាពលរដ្ឋឱ្យបាន​យល់ដឹងបន្ថែមទៀត​ទាក់ទិននឹងការ​ទុកដាក់ចំណីអាហារ ការបំបៅកូនដោយទឹកដោះម្តាយនិងករណីពុលស្រា។

ជាមួយគ្នានេះដែរ លោករដ្ឋមន្ត្រីបានលើកទឹកចិត្តឲ្យបងប្អូនគ្រូពេទ្យទាំងអស់ ខិតខំអប់រំប្រជាពលរដ្ឋបន្ថែមទៀត ចំពោះបញ្ហាជំងឺអេដស៍ ដែលបច្ចុប្បន្ននេះ បាន​កក្រើកឡើងវិញ។«ដូចនេះយើងត្រូវចុះអប់រំផ្សព្វផ្សាយវិធានការបង្ការ និងការប្រើប្រាស់ស្រោម​អនាម័យដែលនេះជា​ការងារ​ដែលគ្រូពេទ្យទាំងអស់ ត្រូវរំលឹកឡើងវិញ»។ នេះជាការបន្ថែមរបស់លោក រដ្ឋមន្រ្តី។

លោករដ្ឋមន្ដ្រី ក៏បានសម្ដែងនូវការកោតសរសើរ ចំពោះថ្នាក់ដឹកនាំ មន្ដ្រីសុខាភិបាលទាំងអស់ អាជ្ញាធរ គ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋទូទាំងប្រទេស ដែលបានចូលរួមសហការ ក្នុងការប្រយុទ្ធនឹង​ជំងឺកូវីដ-១៩ ព្រមទាំងធានាបាននូវការផ្ដល់សេវាសុខភាពជាសារវ័ន្ដ ទោះបីជាទូទាំងប្រទេស បានរងនូវផល​ប៉ះពាល់ដោយវិបត្តិជំងឺកូរី-១៩ ក៏ដោយ។

ការងារប្រយុទ្ធនឹងជំងឺកូវីដ-១៩ នាពេលកន្លងមក ប្រទេសកម្ពុជា ត្រូវបានពិភពលោកប្រសិទ្ធនាមថា “កម្ពុជា ជាប្រទេសតូច មានបេះដូងធំទូលាយ” ដោយបានគ្រប់គ្រង ឆ្លើយតប ការរាតត្បាតជំងឺកូវីដ-១៩ ដោយជោគជ័យ គឺពិតជាមានមោទនៈភាព ចំពោះការខិតខំប្រឹងប្រែងដ៏អស្ចារ្យ របស់សង្គមជាតិទាំងមូល រួមទាំងជនបរទេសទាំងអស់ ដែលស្នាក់នៅក្នុងប្រទេសកម្ពុជា។

តាមរយៈការប្រើប្រាស់កម្លាំង សរុបរបស់ជាតិ និងមានការចូលរួមរបស់សង្គមជាតិទាំងមូល ដែលអាចឱ្យកម្ពុជាបើក​ដំណើរការឡើងវិញទាំងសកម្មភាពសេដ្ឋកិច្ច និងសង្គមតាំងពីខែវិច្ឆិកា ឆ្នាំ២០២១។ មេរៀនបទពិសោធន៍ទាំងអស់នេះ អាចឱ្យយើងយកឈ្នះលើសមរភូមិកូវីដ-១៩ តែរាជរដ្ឋាភិបាលនៅតែបន្តតាមដានដោយយកចិត្តទុកដាក់ ព្រោះ​សង្គ្រាមកូវីដ-១៩ មិនទាន់ចប់នៅឡើយ។ នេះជាការគូសបញ្ជាក់របស់លោក ម៉ម ប៊ុនហេង៕

អត្ថបទ ៖ សំអឿន