រដ្ឋមន្ត្រីសុខាភិបាល គ្រោងដាក់បញ្ចូលការចាក់វ៉ាក់សាំងកូវីដ១៩ ក្នុងកម្មវិធីជាតិផ្តល់ថ្នាំបង្ការ

ក្រសួងសុខាភិបាល បានណែនាំឱ្យដាក់បញ្ចូលការចាក់វ៉ាក់សាំងកូវីដ១៩ ទៅក្នុងកម្មវិធីជាតិផ្តល់ថ្នាំបង្ការក្នុងជីវិត​មនុស្សជាទូទៅ។

តាមរយៈសេចក្តីណែនាំរបស់ក្រសួងសុខាភិបាល ចុះថ្ងៃទី១២ មិថុនានេះ លោករដ្ឋមន្ត្រី ម៉ម ប៊ុនហេង បានមានប្រសា​សន៍ថា ក្រសួងសុខាភិបាលបានជំរុញកម្មវិធីជាតិផ្តល់ថ្នាំបង្ការនៃមជ្ឈមណ្ឌលជាតិគាំពារមាតា និងទារករៀប​ចំដាក់​បញ្ចូល​កិច្ចការចាក់វ៉ាក់សាំងកូវីដ១៩នេះទៅក្នុងកម្មវិធីចាក់ថ្នាំបង្ការក្នុងជីវិតមនុស្សជាទូទៅ​ និងរក្សានិងជំរុញ​ការចាក់​វ៉ាក់សាំងកូវីដ១៩ សម្រាប់នៅក្នុងក្រុមអាទិភាពទាំងអស់។

លោករដ្ឋមន្ត្រីបានបន្តថា« យើងទាំងអស់គ្នាត្រូវដឹងថាវីរុសកូវីដ១៩ នៅមិនទាន់ទៅណាឆ្ងាយពីយើងនៅឡើយទេ មិនត្រឹមតែប៉ុណ្ណោះ ការបំប្លែងខ្លួនថ្មីរបស់វា មាននៅជាបន្តបន្ទាប់ជាពិសេសការបំប្លែងខ្លួនថ្មីៗដូចជា BA2, XBB, XBB1.9.1, XBB 1.17.1 ជាដើម ដែលបានបង្ហាញច្បាស់ថា វីរុសកូវីដ១៩ នៅតែបន្តមានវត្តមាននៅឡើយ នៅលើ​សកលលោកនៅក្នុងតំបន់ និងនៅតាមបណ្ដាប្រទេសនានា ក្នុងនោះប្រទេសកម្ពុជា ក៏ជាប្រទេសមួយដែលទទួល​រងនូវផលប៉ះពាល់ពីការចម្លងវីរុសកូវីដ១៩ បំប្លែងថ្មីដែរ»។

លោករដ្ឋមន្ត្រីបានបន្តទៀតថា ភាពស៊ាំបុគ្គល និងភាពស៊ាំសហគមន៍អាចនឹងមានការថមថយចុះជាបណ្តើរៗ បន្ទាប់ពីបានចាក់វ៉ាក់សាំងកូវីដ១៩ ដូសជំរុញទីមួយ ក្នុងគម្លាតពី៦ខែឡើង ដែលតម្រូវឲ្យបងប្អូនប្រជាពលរដ្ឋទាំងអស់ ត្រូវបន្តការយកចិត្តទុកដាក់ការពារខ្លួនឱ្យបានហ្មត់ចត់ជាប់ជានិច្ច និងត្រូវទៅទទួលយកការចាក់វ៉ាក់សាំង​កូវីដ១៩ដូសជំរុញទី៣ ទី ៤ ទី៥ និងទី៦ ឱ្យបានត្រឹមត្រូវបើដល់វេនចាក់ដើម្បីចូលរួមការពារបន្តថែរក្សារស់​នៅជាធម្មតានៅក្នុងប្រក្រតីភាពថ្មីបានយូរអង្វែងព្រមទាំងដើម្បីសុខភាពផ្ទាល់ខ្លួនរបស់បងប្អូនផងដែរ។

លោករដ្ឋមន្ត្រីបានណែនាំដល់រដ្ឋបាលរាជធានីខេត្ត និងមន្ទីរសុខាភិបាលទាំងអស់ បន្តយកចិត្តទុកដាក់ជំរុញការចាក់វ៉ាក់​សាំងកូវីដ១៩ ដូសជំរុញជាបន្តបន្ទាប់ទៀត ជាពិសេសនៅតាមតំបន់ដែលមានអត្រាចាក់ដូសជំរុញទាប និងត្រូវ​យកចិត្តទុក​ដាក់ដល់ការចាក់វ៉ាក់សាំងនេះជូនដល់ក្រុមគ្រូពេទ្យក្រុម​អ្នកប្រតិបត្តិការជួរមុខនឹងក្រុមងាយ​រងគ្រោះដូចជាជនវ័យចាស់ស្ត្រីមានផ្ទៃពោះនឹងអ្នកដែលមានជំងឺរ៉ាំរ៉ៃជាដើម។

ចំណែកនាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលត្រូវបន្តធ្វើការតាមដានស្ថានភាពជំងឺកូវីដ19 ដោយសហការ​ជិតស្និទ្ធជាមួយរដ្ឋបាលថ្នាក់ក្រោមជាតិមន្ទីរសុខាភិបាលរាជធានីខេត្តដឹកនាំមន្ត្រីសុខាភិបាលឆ្លើយតបបន្ទាន់និងជំនាញពាក់ព័ន្ធត្រៀមលក្ខណៈសម្បត្តិឱ្យបានគ្រប់គ្រាន់ដើម្បីឆ្លើយតបទៅនឹងការផ្ទុះឡើងនូវការឆ្លងរាលដាលក្នុងទ្រង់ទ្រាយណាមួយជាយថាហេតុនៅតាមភូមិសាស្ត្រឬតំបន់របស់ខ្លួន។

ជាមួយគ្នានេះត្រូវបន្តតាមដានជំងឺឆ្លងតាមប្រព័ន្ធតាមដានជំងឺឆ្លង នៅតាមមូលដ្ឋានសុខាភិបាលសាធារណៈ និងតាមមន្ទីរពេទ្យឯកជននូវជំងឺឆ្លងដែលអាចជាជំងឺថ្មីជំងឺផ្លូវដង្ហើមធ្ងន់ធ្ងរនិងជំងឺផ្តាសាយជាប់ជាប្រចាំ ជាពិសេស​លើមនុស្សចាស់ និងក្រុមងាយរងគ្រោះព្រមទាំងបន្តពង្រឹងផ្នែកសង្គ្រោះបន្ទាន់ផងដែរ។ លើសពីនេះ​ត្រូវបន្តតាមដាន​ការវិភាគនៅតាមមន្ទីរពិសោធន៍ជាតិនៅវិទ្យាស្ថានជាតិស្រាវជ្រាវសុខភាពសាធារណៈ និងវិទ្យាស្ថាន​ប៉ាស្ទ័រ​កម្ពុជាត្រូវ​បន្តធ្វើការវិភាគនិងធ្វើវត្ថុសំណាកដែលមានវិជ្ជមានវីរុសកូវីដ១៩ ហើយរកឃើញមេរោគថ្មីៗ​ណាមួយដើម្បី​ជាមូលដ្ឋាននៃការដាក់ចេញនូវវិធានការឆ្លើយតបនឹងទប់ស្កាត់បានទាន់ពេលវេលា។

លោករដ្ឋមន្ត្រីបានក៏បានណែនាំដល់មជ្ឈមណ្ឌលជាតិលើកកម្ពស់សុខភាពត្រូវបន្តការងារអប់រំសុខភាពនិងជំរុញការចូលរួមរបស់បុគ្គលក្រុមគ្រួសារនិងសហគមន៍នៅក្នុងការការពារពីការចម្លងមេរោគក្នុងនោះមានជំងឺកូវីដ១៩បំប្លែថ្មីជាមួយនឹងការគ្រប់គ្រងប្រឆាំងនិងព័ត៌មានមិនពិតប្រឌិតឬក្លែងបន្លំជាដើមដោយផ្អែកលើស្ថានភាពនិងបច្ចុប្បន្នភាពនៃការវិវឌ្ឍជំងឺផងដែរព្រមទាំងប្រើប្រាស់សម្ភារៈអប់រំចែកចាយចាយនិងផ្សព្វផ្សាយឱ្យមានប្រសិទ្ធភាពខ្ពស់៕

អត្ថបទ៖ សំអឿន