រដ្ឋបាលរាជធានីភ្នំពេញ​កំពុងធ្វើការជួសជុល​ ជង្ហុកសំបុកមាន់​ និង​អ៊ុតកៅស៊ូ​លើផ្លូវកម្ពុជាក្រោម​

រដ្ឋបាលរាជធានីភ្នំពេញកំពុងធ្វើការជួសជុលជង្ហុកសំបុកមាន់ ​និងអ៊ុតកៅស៊ូ​កំណាត់​ផ្លូវ​កម្ពុជាក្រោម ដោយចាប់ពីស្ពានអាកាស៧ មករា ដល់ផ្សារធំថ្មី ដើម្បីសម្រួលចរាចរណ៍ជូនប្រជាពលរដ្ឋ ហើយក៏ដើម្បីជាការលើកសោភ័ណភាពរាជធានីភ្នំពេញ ឱ្យកាន់តែស្រស់បំព្រមសមជាទីក្រុង​ដែលជាបេះដូងនៃព្រះរាជាណាចក្រកម្ពុជា។

លោកសាំ ពិសិដ្ឋ ប្រធានមន្ទីរសាធារណការនិង​ដឹកជញ្ជូនរាជធានីភ្នំពេញបានឲ្យដឹង​នៅព្រឹកថ្ងៃទី២៩ មិថុនា ឆ្នាំ២០២២​នេះថា៖ អនុវត្តតាមការណែនាំពីលោកឃួង ស្រេង អភិបាលនៃគណៈអភិបាលរាជធានីភ្នំពេញ មន្ទីរសាធារណការនិង​ដឹកជញ្ជូនរាជធានីភ្នំពេញ បាននិងកំពុងធ្វើសកម្មភាពជួសជុល ជង្ហុកសំបុកមាន់ និងអ៊ុតកៅស៊ូ លើកំណាត់ផ្លូវកម្ពុជាក្រោម ដោយចាប់ពីស្ពានអាកាស ៧ មករា ដល់ផ្សារធំថ្មី ដោយឆ្លងកាត់ខណ្ឌចំនួន៣ ក្នុងនោះមានខណ្ឌទួលគោក ខណ្ឌ៧មករា និងខណ្ឌដូនពេញ ក្រោយពីកំណាត់ផ្លូវនេះ មានការខូចខាតដោយកន្លែង។

ប៉ុន្តែទោះបីជាយ៉ាងណាក្តី យើងត្រូវធ្វើការជួសជុលនិងអ៊ុតកៅស៊ូឡើងវិញទាំងស្រុងតែម្តង។ ចំពោះការជួសជុល និងអ៊ុតកៅស៊ូកំណាត់ផ្លូវមួយខ្សែនេះ លោក សាំ ពិសិដ្ឋ មិនបានបញ្ជាក់ពីការបញ្ចប់ការដ្ឋាននៅពេលណានោះទេ ដោយលោកបញ្ជាក់ថា ពេលនេះជារដូវភ្លៀងធ្លាក់ យើងមិនអាចកំណត់ពេលវេលាបាននោះទេ បើមានភ្លៀងធ្លាក់ជាប់ៗគ្នា ការដ្ឋានគឺ មិនអាចដំណើរការទៅកើតនោះទេ៕

អត្ថបទ៖ ស្រីរ័ត្ន