បច្ចុប្បន្ននេះមានយុវជនកម្ពុជាភាគច្រើនបានចាប់អារម្មណ៍សិក្សាទៅលើជំនាញយានយន្តដោយសារជំនាញនេះងាយស្រួលរកការងារធ្វើពេលនិស្សិតរៀនចប់។

លោក មួង ផាស៊ី នាយករងវិទ្យាស្ថានជាតិពហុបច្ចេកទេសកម្ពុជាបានមានប្រសាសន៍នៅព្រឹកថ្ងៃទី១០ ខែកក្កដា នេះថាកូនខ្មែរយើងបានចាប់ផ្តើមចាប់អារម្មណ៍សិក្សាទៅលើជំនាញមេកានិក ឬយានយន្តដោយបច្ចុប្បន្ននេះមាននិស្សិតកំពុងសិក្សាចំនួន១០៨៣នាក់ ខណៈកាលពី១០ឆ្នាំមុនមាននិស្សិតចំនួន៣០នាក់ប៉ុណ្ណោះ ពោលគឺមិនសូវមានការចាប់អារម្មណ៍ទៅលើមុខជំនាញនេះទេ។

លោកបានបន្តថា ក្រៅពីមុខជំនាញមេកានិចនិស្សិតក៏ចាប់អារម្មណ៍សិក្សាច្រើនផងដែរទៅលើជំនាញអគ្គិសនីដែលមាននិស្សិតចំនួន១៧៧៥នាក់ និងជំនាញសំណង់ និងស្ថាបត្យកម្មដែលមាននិស្សិត១៣៣៣នាក់។

លោកបានបន្តទៀតថា វិទ្យាស្ថានជាតិពហុបច្ចេកទេសកម្ពុជា NPIC បានបង្កើតឡើងកាលពីឆ្នាំ២០០៥ហើយរហូតមកដល់ពេលនេះមានរយៈពេល១៧ឆ្នាំមកហើយ ពោលគឺនៅមានភាពក្មេងខ្ចីជាងសាលាផ្សេងៗទៀតដោយមាននិស្សិតកំពុងសិក្សាចំនួន៥៧៤៥នាក់សិក្សាទៅលើមុខជំនាញចំនួន២១ ខណៈនៅឆ្នាំ២០៥៥មានតែ២៤៨នាក់ប៉ុណ្ណោះ។

លោកបានបន្ថែមទៀតថា ក្នុងចំណោមនិស្សិត៥៧៤៥នាក់ក្នុងនោះមាន៦៥ភាគរយមកពីជនបទដោយពួកគេត្រូវបង់ការ​សិក្សាចំនួន៤០០ដុល្លារសម្រាប់ថ្នាក់មធ្យមសិក្សានិង៦០០ដុល្លារសម្រាប់ថ្នាក់ឧត្តមសិក្សា។ យ៉ាងណាក៏ដោយ
លោក​បាន​បញ្ជាក់ថា ទោះបីជាសិស្សនិស្សិតបង់ថ្លៃសិក្សាក៏ពិតមែនក៏រដ្ឋបានចំណាយប្រមាណ៨០០ដុល្លារបន្ថែមទៅលើនេះផងដែរដូចជាសម្ភារបណ្តុះបណ្តាលជាដើម។

លោកបានបន្ថែមឱ្យដឹងទៀតថា ការសិក្សានៅវិទ្យាស្ថានជាតិពហុបច្ចេកទេសកម្ពុជានិស្សិតទទួលបានការងារខ្ពស់ក្នុងចំណោមសិស្សនិស្សិតដែលរៀនចប់អាចទទួលបានការងារប្រមាណ៨៧ភាគរយនៅតាមក្រុមហ៊ុនធំៗជាច្រើនដូចជាក្រុមហ៊ុនវីតាល់ក្រុមហ៊ុនជីបម៉ុងនិងក្រុមហ៊ុនអ អឹមអេដែលផ្តោតទៅលើវិស័យរថយន្ត។

លោកបានឱ្យដឹងទៀតថា ចំណែកសិស្សនិស្សិតដែលនៅសល់ចំនួន១៣ភាគរយទៀតមានអ្នកខ្លះត្រូវសិក្សាបន្តទៀតនិងខ្កះទៀតចេញបើកមិខរបររកស៊ីដោយខ្លួនឯង។ ជាមួយគ្នានេះដែរ លោកនាយករងវិទ្យាស្ថានជាតិពហុបច្ចេកទេសកម្ពុជាបានបញ្ជាក់បន្ថែមទៀតថាក្រៅពីនេះក៏មាននិស្សិតមួយចំនួនបានចេញទៅធ្វើការទៅលើជំនាញផ្សេងៗនៅក្រៅប្រទេសផងដែរ៕

អត្ថបទ៖ សំអឿន