រដ្ឋមន្ត្រីការងារ៖ កម្មករនិងនិយោជិតណាមិនចូលរួមអនុវត្តរបបផ្នែកសោធននឹងត្រូវពិន័យតាមច្បាប់

រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានឱ្យដឹងទៀតថា ចំពោះកម្មករនិយោជិត និងនិយោជកណាដែលមិនចូលរួមអនុវត្តរបបសន្តិសុខសង្គមផ្នែកសោធននិវត្តន៍ នឹងត្រូវពិន័យតាមច្បាប់របបសន្តិសុខសង្គម។

ថ្លែងក្នុងពិធីផ្សព្វផ្សាយរបបសន្តិសុខសង្គមផ្នែកប្រាក់សោធនសម្រាប់បុគ្គលទាំងឡាយដែលស្ថិតនៅក្រោមបទប្បញ្ញត្តិ
នៃច្បាប់ស្តីពីការងារដល់និយោជក នៅព្រឹកថ្ងៃទី១៥កក្កដា នៅសណ្ឋាគារហ៊ីម៉ាវ៉ារី លោកបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានក្រុមប្រឹក្សាភិបាល ប.ស.ស.បានមានប្រសាសន៍ថា​ ជាកាតព្វ កិច្ចកម្មករនិយោជិតស្ថិតក្នុងច្បាប់ការងារនិងនិយោជកត្រូវតែចូលរួមអនុវត្តនៅក្នុងរបបផ្នែកសោធននេះជាចាំបាច់ ក្នុងនោះកម្មករត្រូវបង់២ភាគរយនៃប្រាក់ឈ្មួលរបស់ខ្លួន និងនិយោជកត្រូវបង២ភាគរយ។ ប៉ុន្តែនៅពេលដល់អាយុចូលនិវត្តន៍៦០ឆ្នាំកម្មករនឹងទទួលបានផលប្រយោជន៍១០០ភាគរយ។

លោករដ្ឋមន្ត្រីបានបន្តថា «បើទោះបីជាការរបបសន្តិសុខសង្គមផ្នែកប្រាក់សោធននេះជាច្បាប់ឬជានយោបាយដែលតម្រូវឱ្យកម្មករនិយោជិតត្រូវអនុវត្តក៏ដោយ ប៉ុន្តែវាស្ថិតនៅក្នុងស្មារតីគោលការណ៍សមធម៌ និងវប្បធម៌ចែករំលែកនៅក្នុងសង្គមផងដែរ។ អីចឹងទេជាកាតព្វកិច្ចផង និងជាសីលធម៌ផងក្នុងការអនុវត្តប្រព័ន្ធនេះ»។

លោករដ្ឋមន្ត្រីបានបន្តថា ការអនុវត្តរបបនេះវានឹងជួយធានាសន្តិសុខប្រាក់ឈ្នួលរបស់កម្មករនិយោជិត ពោលគឺនៅពេលបុគ្គលិកណាម្នាក់ធ្លាក់ខ្លួនទៅក្នុងហានិភ័យមិនអាចងើបរួចនឹងទទួលបានការគាំពារ និងជួយសម្រាលបន្ទុកក្នុងសង្គម។ ចំណែករោងចក្រ សហគ្រាសនីមួយៗក៏ទទួលបានកម្លាំងពលកម្មមានផាសុខភាពមានផលិតភាពឱ្យរោងចក្រសហគ្រាសរបស់ខ្លួនផងដែរ។

លោករដ្ឋមន្ត្រីបានបន្ថែមថា លើសពីនេះទៀតការអនុវត្តរបបនេះក៏មានសារសំខាន់ក្នុងការចូលរួមកាត់បន្ថយភាពក្រីក្ររបស់រាជរដ្ឋាភិបាល កាត់បន្ថយគម្លាតប្រាក់ឈ្នួល កាត់បន្ថយគម្លាតរវាងអ្នកមាន និងអ្នកក្រនៅក្នុងសង្គម ព្រោះថា នៅក្នុងរបបសន្ដិសុខសង្គមផ្នែកប្រាក់សោធន ជាកាតព្វកិច្ចនេះនៅពេលដែលបងប្អូនដល់អាយុចូលនិវត្តន៍ក៏មានរបបសន្ដិសុខសង្គមផ្នែកថែទាំសុខភាពផងដែរ ដូច្នេះបន្ទាប់ពីបងប្អូនចូលនិវត្តន៍គឺមិនបារម្ភនៅពេលមានជំងឺ ត្រូវចំណាយទៅលើការព្យាបាលឡើយ ។ លោករដ្ឋមន្រ្តីបានសំណូមពរយ៉ាងទទូចទៅកាន់តំណាងនិយោជកដែលបានចូលរួមក្នុងពិធីផ្សព្វផ្សាយនាពេលនេះ សូមមេត្តាយកចិត្តទុកដាក់ស្ដាប់ និងសួរនូវរាល់ចំងល់ទាំងឡាយពាក់ព័ន្ធទៅនឹងរបបសន្ដិសុខសង្គមផ្នែកប្រាក់សោធនថ្មីនេះ ដើម្បីអាចផ្សព្វផ្សាយបន្តអំពីកាតព្វកិច្ចនិងអត្ថប្រយោជន៍នៃរបបសន្តិសុខសង្គមផ្នែកប្រាក់សោធននេះឱ្យបានទូលំទូលាយប្រកបដោយភាពត្រឹមត្រូវ ច្បាស់លាស់ធ្វើយ៉ាងណាឱ្យមានការចូលរួមអនុវត្តកាតព្វកិច្ចស្របតាមច្បាប់ស្តីពីរបបសន្តិសុខសង្គម ពេញលេញប្រកបដោយភាពពេញចិត្ត និងរីករាយចៀសវាងការទទួលនូវការញុះញង់ការទទួលព័ត៌មានមិនពិតពីក្រុមជនអគតិមួយចំនួនតូច។

ក្រសួងការងារនិងបណ្តុះបណ្តាលវិជ្ជាជីវៈបានប្រកាសដាក់ឱ្យអនុវត្តរបបសន្តិសុខសង្គមផ្នែកប្រាក់សោធនសម្រាប់បុគ្គលទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារនៅថ្ងៃទី០១ ខែកក្កដា ឆ្នាំ២០២២។ ប៉ុន្តែដោយសារវាជាការងារថ្មីទើបក្រសួងបានពន្យារហូតដល់ថ្ងៃទី០១ខែតុលាឆ្នាំ២០២២វិញដោយទុករយៈពេល៣ខែចាប់ពី ខែ​កក្កដា
ដល់ដំណាច់ខែកញ្ញា ឆ្នាំ២០២២ ដើម្បីផ្សព្វផ្សាយរបបផ្នែកសោធននេះដល់កម្មកនិយោជិតនៅតាមបណ្តាតំបន់សេដ្ឋកិច្ចពិសេស សួន ឧស្សាហកម្មរោងចក្រ សហគ្រាសគ្រឹះស្ថាន ទូទាំងរាជធានី ខេត្ត ក្រុង ស្រុកខណ្ឌបានយល់ដឹងឱ្យបានច្បាស់លាស់ដើម្បីឱ្យដំណលរការអនុវត្តប្រកបដោយរលូន៕

អត្ថបទ៖ សំអឿន