ព័ត៌មានជាតិ

អគ្គលេខាធិការរដ្ឋសភា ៖ សេចក្ដីព្រាងវិសោធនកម្មច្បាប់ធម្មនុញ្ញ បានទៅដល់រដ្ឋសភាហើយ

បានផុស

៤ years មុន

នៅ

ថ្ងៃសុក្រ ១៥ កក្កដា ២០២២

ដោយ

លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា បានមានប្រសាសន៍ប្រាប់កម្ពុជាថ្មី នារសៀលថ្ងៃទី ១៥ ខែកក្កដានេះថា សេចក្ដីព្រាងច្បាប់ធម្មនុញ្ញ ស្ដីពី វិសោធនកម្មមាត្រា១៩ថ្មី (មួយ) មាត្រា ៩៨ថ្មី មាត្រា ១០២ថ្មី មាត្រា ១១៩ថ្មី (មួយ) និងមាត្រា ១២៥ថ្មី នៃរដ្ឋធម្មនុញ្ញ នៃព្រះរាជាណាចក្រកម្ពុជា និងមាត្រា ៣ថ្មី និងមាត្រា ៤ថ្មី នៃច្បាប់ធម្មនុញ្ញ បានទៅដល់រដ្ឋសភាហើយ។

បើតាមលោក ឡេង ប៉េងឡុង សេចក្ដីព្រាងច្បាប់ធម្មនុញ្ញ ស្ដីពី វិសោធនកម្មមាត្រាមួយចំនួន នៃច្បាប់ធម្មនុញ្ញនេះ នឹងដាក់ជូនគណៈអចិន្រ្តៃយ៍រដ្ឋសភានៅសប្តាហ៍ក្រោយនេះហើយ។ លោកថា នៅពេលគណៈអចិន្រ្តៃយ៍រដ្ឋសភាបើកកិច្ចប្រជុំពិនិត្យ សម្រេចរួចហើយ ទើបដាក់ជូនរដ្ឋសភា ដើម្បីបើកកិច្ចប្រជុំ ពេញអង្គ។

លោក កើត រិទ្ធ រដ្ឋមន្ត្រីក្រសួងយុត្តិធម៌ បានថ្លែងនៅក្នុងសន្និសីទសារព័ត៌មាន កាលពីម្សិលមិញថា ការធ្វើវិសោធនកម្មរដ្ឋធម្មនុញ្ញលើកទី ១០នេះ គឺអនុវត្តទៅតាមនីតិវិធី ដែលចែងក្នុងរដ្ឋធម្មនុញ្ញទាំងអស់ ដោយពុំមានចំណុចណាមួយដែលនិយាយថា ជារឿងលាក់បាំង ជាការសំងាត់នោះទេ។ បើតាមលោករដ្ឋមន្ត្រី ចាប់តាំងពីឆ្នាំ ១៩៩៣មក រដ្ឋធម្មនុញ្ញរបស់កម្ពុជា ត្រូវបានធ្វើវិសោធនកម្មចំនួន ៩ លើករួចមកហើយ។ បើគិតបន្ថែមលើកនេះទៀត គឺចំនួន ១០លើកហើយ។ ការធ្វើវិសោធនកម្មនេះ គឺដើម្បីបំពេញចន្លោះខ្វះខាតរបស់រដ្ឋធម្មនុញ្ញកម្ពុជា និងដើម្បីធានាការពារឧត្ដមប្រយោជន៍របស់ជាតិ។

គួររំលឹកថា កាលពីថ្ងៃទី ១៣ ខែកក្កដា ក្រុមប្រឹក្សាធម្មនុញ្ញ បានបើកកិច្ចប្រជុំពេញអង្គ ដើម្បីពិនិត្យ និងរៀបចំសេចក្តីក្រាបបង្គំទូលថ្វាយមតិ ថ្វាយព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជណាចក្រកម្ពុជា ចំពោះសេចក្តីព្រាងច្បាប់ធម្មនុញ្ញ ស្តីពី វិសោធនកម្មមាត្រាមួយចំនួន នៃរដ្ឋធម្មនុញ្ញកម្ពុជា ហើយជាលទ្ធផលលទ្ធផល ក្រុមប្រឹក្សាធម្មនុញ្ញ បានបញ្ជាក់ថា «អាចធ្វើទៅបាន» ស្របតាមបរិបទនៃសភាព ការណ៍ជាក់ស្ដែង និងពុំមានអ្វីប៉ះពាល់ដល់ប្រព័ន្ធប្រជាធិបតេយ្យ សេរីពហុបក្ស និងរបបរាជានិយម អាស្រ័យដោយរដ្ឋធម្មនុញ្ញ ព្រមទាំងធ្វើឡើងនៅពេលប្រទេសជាតិមិនឋិតក្នុងភាពអាសន្ន៕

អត្ថបទ៖ កោះកែវ