កម្ពុជាមានអាត្រាឆ្លងជំងឺអេសដ៍ខ្ពស់លើក្រុមបុរសរួមភេទជាមួយបុរស

មន្ត្រីជាន់ខ្ពស់នៃអាជ្ញាធរជាតិប្រយុទ្ធនឹងជំងឺអេដស៍បានឱ្យដឹងថា បច្ចុប្បន្ននេះក្រុមបុរសរួមភេទជាមួយបុរសនៅកម្ពុជាមានអាត្រាប្រេវ៉ាឡង់ឆ្លងជំងឺអេសដ៍ខ្ពស់គួរឱ្យព្រួយបារម្ភដែលទាមទារឱ្យភាគីពាក់ព័ន្ធយកចិត្តទុកដាក់ និងរួមគ្នាទប់ស្កាត់បញ្ហានេះប្រកបដោយប្រសិទ្ធភាពខ្ពស់។

នៅក្នុងកិច្ចប្រជុំរបស់អាជ្ញាធរជាតិប្រយុទ្ធនឹងជំងឺអេដស៍ ធ្វើឡើងតាមប្រព័ន្ធ ZOOM និងដោយផ្ទាល់កាលពីពេលថ្មីៗនេះលោកបណ្ឌិត ឈឹម ឃិនដារ៉េត អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍ និងជាប្រធានក្រុមប្រឹក្សាបច្ចេកទេស
បានមានប្រសាសន៍ថា ក្នុងចំណោមប្រជាជន​គន្លឹះដែលមានការប្រឈមនឹងការឆ្លងជំងឺអេសដ៍នេះក្រុមដែលព្រួយបារម្ភជាងគេគឺក្រុមបុរស រួមភេទជាមួយបុរសដែលមានគ្នារហូត​ដល់ទៅជិត​៩ម៉ឺននាក់ ​និងមានអាត្រាប្រេវ៉ាឡង់ខ្ពស់
ដែលមានចំនួន៤%បើប្រៀបធៀបជាមួយចំនួន​ប្រជាជន​ទូទៅ០.៥%។

លោកបណ្ឌិតបានបន្តថា ការដែលក្រុមបុរសរួមភេទជាមួយបុរសមានអត្រាឆ្លងខ្ពស់តាមការសិក្សាស្រាវជ្រាវ ​គឺបណ្តាលមកពីការប្រើប្រាស់ស្រោមអនាម័យរបស់ពួកគាត់នៅ​កម្រិតទាប។ លោកបណ្ឌិតបានបន្តទៀតថា ដូច្នេះទាមទារឲ្យមានការចូលរួមពីគ្រប់ស្ថាប័ន អង្គការដៃគូរសង្គមស៊ីវិលទាំងអស់ ធ្វើការអប់រំ ផ្សព្វផ្សាយ​ និងបងប្អូនអ្នកផ្ទុកមេរោគអេដស៍ ទន្ទឹមនឹងនោះបងប្អូន​ដែល​សង្ស័យថា​ ផ្ទុកមេរោគ​អេដស៍ ​សូមឲ្យចូលមករកសេវាធ្វើតេស្តរកមេរោគអេដស៍។

លោកវេជ្ជបណ្ឌិត អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍សើរស្បែក និងកាមរោគនៃក្រសួងសុខាភិបាលធ្លាប់បានមានប្រសាសន៍ថា បច្ចុប្បន្ននេះកម្ពុជាមានអ្នកផ្ទុកជំងឺអេដស៍ប្រមាណ៧៥០០០នាក់ ស្មើនឹង០,៥៤ភាគរយនៃប្រជាពលរដ្ឋសរុប ក្នុងនោះមានអ្នកជំងឺប្រមាណ៦៣០០០នាក់ ទទួលបានព្យាបាល និងអ្នកជំងឺប្រមាណ១២០០០ទៀតកំពុងលាក់មុខមិនព្រមចេញមកព្យាបាលទេហើយអ្នកទាំងនោះមិនដឹងថារស់នៅកន្លែងណាដែរ។

ជាមួយគ្នានេះដែរ លោកវេជ្ជបណ្ឌិត អ៊ុក វិជ្ជា បានបញ្ជាក់ថា ក្នុង១ឆ្នាំអាចមានអ្នកស្លាប់ដោយសារជំងឺអេដស៍១២០០​នាក់​ និងមានអត្រាអ្នកឆ្លងជំងឺអេដស៍ថ្មីប្រមាណ១១០០នាក់ដែរដែលពួកគេទាំងនោះជាក្រុមប្រឈមខ្ពស់ដូចជាក្រុម​យុវវ័យ ក្រុមបុរសស្រលាញ់បុរស ក្រុមបម្លែងភេទ និងក្រុមអ្នកប្រើប្រាស់គ្រឿងញៀនជាដើម។

បើតាមលោក ទៀ ផល្លា អនុប្រធានអាជ្ញាធរជាតិប្រឆាំងជំងឺអេដស៍បានឱ្យដឹងដែរថា អ្នកផ្ទុកជំងឺអេដស៍ប្រមាណ១ម៉ឺន២ពាន់នាក់នោះមានអាយុចន្លោះពី៥០ ទៅ ៧០ ឆ្នាំ ហើយត្រូវគេសង្ស័យថា បានឆ្លងមេរោគអេដស៍នេះយ៉ាងហោចណាស់ ១០ឆ្នាំមកហើយ៕

អត្ថបទ៖ សំអឿន