អង្គការ AHF និងអាជ្ញាធរជំងឺអេដស៍ នឹងរៀបចំទិវាស្រោមអនាម័យអន្តរជាតិដើម្បីទប់ស្កាត់ការឆ្លងរាលដាលជំងឺអេដស៍

អង្គការមូលនិធិថែទាំសុខភាពអ្នកជំងឺអេដស៍កម្ពុជា (AHF) សហការជាមួយអាជ្ញាធរជាតិប្រយុទ្ធនឹងជំងឺអេដស៍ នឹងរៀបចំទិវាស្រោមអនាម័យអន្តរជាតិនៅថ្ងៃទី១៤ ខែកុម្ភៈ ឆ្នាំ២០២៦ នៅផ្សារទំនើប ខេ ម៉ល ផ្លូវវេងស្រេង រាជធានីភ្នំពេញ ដើម្បីជាការលើកកម្ពស់ការប្រើប្រាសស្រោមអនាម័យឱ្យកាន់តែទូលំទូលាយសំដៅចូលរួមបង្ការ និងទប់ស្កាត់ការឆ្លងរាលដាលជំងឺកាមរោគ និងជំងឺអេដស៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោកវេជ្ជបណ្ឌិត ចន ផាន់ណា ប្រធានគ្រប់គ្រងកម្មវិធីប្រចាំប្រទេស អង្គការមូលនិធិថែទាំសុខភាពអ្នកជំងឺអេដស៍បានមានប្រសាសន៍ថា យុទ្ធនាការទិវាស្រោមអនាម័យអន្តរជាតិអង្គការមូលនិធិថែទាំសុខភាពអ្នកជំងឺអេដស៍កម្ពុជា នឹងមានរៀបចំព្រឹត្តិការណ៍មួយចំនួនរួមមានការអប់រំ ការធ្វើតេស្ត ការចែកស្រោមអនាម័យ ពិភាក្សាពីស្រោមអនាម័យ អបអរសាទរ និងរបាំកំសាន្តសប្បាយ ជាមួយតន្ត្រី សម័យ បុរាណ ផងដែរដើម្បីឆ្លើយតបនឹងការឆ្លងរាលដាលមេរោគអេសដ៍។

លោកវេជ្ជបណ្ឌិតបានបន្តថា ការកើនឡើងនៃអត្រាឆ្លងជំងឺកាមរោគនៅទូទាំងពិភពលោក ជាពិសេសជំងឺស្វាយ មិនមែនជារឿងអាថ៌កំបាំងទេ វាជាអ្វីដែលកើតឡើងនៅពេលដែលមូលនិធិសកលថយចុះ ហើយស្រោមអនាម័យមិនត្រូវបានផ្តល់អាទិភាពសម្រាប់ការបង្ការមេរោគអេដស៍ បើគ្មានការកែតម្រូវជាបន្ទាន់ទេ ការឆ្លងមេរោគអេដស៍នឹងកើនឡើងក្នុងពេលឆាប់ៗនេះ។

លោកវេជ្ជបណ្ឌិតបានបន្តទៀតថា ស្រោមអនាម័យដែលប្រើប្រាស់រាប់ទសវត្សរ៍ក្នុងការឆ្លើយតបនឹងមេរោគអេដស៍ជាសកល និងមិនចំណាយច្រើន។ ការរក្សាការបង្ការការឆ្លងមេរោគអេដស៍ និងការទប់ស្កាត ការកើនឡើងនៃការឆ្លងជំងឺកាមរោគមិនតម្រូវឱ្យមានការច្នៃប្រឌិតវិទ្យាសាស្ត្រថ្មីទេ តែតម្រូវឱ្យមានឆន្ទៈគោលនយោបាយ ការវិនិយោគប្រកបដោយចីរភាព និងការប្តេជ្ញាចិត្តឡើងវិញដើម្បីធានាថាស្រោមអនាម័យគឺឥតគិតថ្លៃ ឬមានតម្លៃសមរម្យ និងអាចរកបានយ៉ាងទូលំទូលាយសម្រាប់អ្នកដែលត្រូវការវាបំផុត។

លោកវេជ្ជបណ្ឌិតបានបញ្ជាក់ថា ទិវាស្រោមអនាម័យអន្តរជាតិដែលតែងតែរៀបចំនៅថ្ងៃទី១៣ ខែកុម្ភៈត្រូវបានបង្កើតឡើងដោយមូលនិធិថែទាំសុខភាពអេដស៍ ក្នុងឆ្នាំ២០០៩ ដើម្បីអបអរសាទរស្រោមអនាម័យជាជម្រើសដ៏ល្អបំផុតរបស់ពិភពលោក សម្រាប់ការការពារមេរោគអេដស៍ ជំងឺកាមរោគផ្សេងៗ និងការមានផ្ទៃពោះដែលមិនបានគ្រោងទុក៕

អត្ថបទ៖ សំអឿន