សុខភាព

អត្រាស្លាប់ដោយសារជំងឺអេដស៍នៅកម្ពុជា មានការថយចុះពីជាង ១ ពាន់នាក់ មកត្រឹមជិត ៧០០ នាក់

បានផុស

៥ ខែ មុន

នៅ

ថ្ងៃអង្គារ ៣ កុម្ភៈ ២០២៦

ដោយ

អត្រាស្លាប់ដោយសារជំងឺអេដស៍នៅប្រទេសកម្ពុជាបានធ្លាក់ចុះគួរឱ្យកត់សម្គាល់ ពោលគឺធ្លាក់ចុះពីជាង ១ ពាន់នាក់ មកនៅត្រឹមជិត ៧០០ នាក់ ប៉ុណ្ណោះ នៅក្នុងឆ្នាំ ២០២៥ កន្លងទៅនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត ឡូ វាសនាគីរី រដ្ឋលេខាធិការក្រសួងសុខាភិបាល បានមានប្រសាសន៍ថា ឆ្នាំ ២០២៥ មានអ្នកជំងឺអេដស៍ដែលកំពុងព្យាបាលដោយឱសថប្រឆាំងមេរោគអេដស៍បានកើនឡើងពី ៦៩ ៩៩៤ នាក់ ដល់ ៧១ ៦៩៧ នាក់ ឬកើនឡើង ២,៤៣% ធៀបនឹងឆ្នាំ ២០២៤ និងមានអ្នកជំងឺ ៦៩៧ នាក់ ក្នុងនោះ មនុស្សពេញវ័យ ៦៨៨ នាក់ និងកុមារ ០៩ នាក់ ត្រូវបានរាយការណ៍ថាស្លាប់។ អត្រានេះ បើធៀបទៅនឹងឆ្នាំ ២០២៤ កន្លងទៅ ឃើញថា មានការថយចុះគួរឱ្យកត់សម្គាល់ ដោយឆ្នាំ ២០២៤ មានអ្នកស្លាប់ដោយសារជំងឺអេដស៍ប្រមាណ ១ ១០០ នាក់។

លោកវេជ្ជបណ្ឌិត អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ នៃក្រសួងសុខាភិបាល បានមានប្រសាសន៍ថា មានមូលហេតុមួយចំនួនដែលបណ្តាលឱ្យអ្នករស់នៅជាមួយមេរោគអេដស៍ទាំងនោះស្លាប់បាត់បង់ជីវិត ក្នុងនោះរួមមាន អ្នកជំងឺចាស់ជរា គ្រោះថ្នាក់ចរាចរណ៍ និងមានអ្នកជំងឺមួយចំនួនបានអនុវត្តការលេបថ្នាំមិនបានត្រឹមត្រូវ បណ្តាលឱ្យមានភាពស៊ាំក្នុងខ្លួនប្រឈមនឹងការស្លាប់ព្រោះថា អ្នកជំងឺអេដស៍ ត្រូវការលេបថ្នាំពន្យារជីវិតឱ្យបានទៀងទាត់ជាប្រចាំ ហាត់ប្រាណ និងបរិភោគចំណីអាហារឱ្យបានគ្រប់គ្រាន់ ដើម្បីទ្រទ្រង់សុខភាពឱ្យបានល្អប្រសើរ។

លោកវេជ្ជបណ្ឌិត បានបន្តទៀតថា ប្រសិនបើអ្នកជំងឺអនុវត្តបានខ្ជាប់ខ្ជួននោះពួកគាត់នឹងមានសុខភាពល្អ និងអាចរស់នៅដូចមនុស្សធម្មតាអីចឹងដែរ។

លោកវេជ្ជបណ្ឌិត បានពន្យល់ថា «ការដែលយើងដឹងពីអ្នកស្លាប់នេះ ដោយសារតែអ្នកជំងឺមិនបានមកទទួលថ្នាំពន្យារអាយុជីវិតរយៈពេល ២៨ ថ្ងៃ និងមិនអាចទំនាក់ទំនងបាន យើងអាចសន្និដ្ឋានថា គាត់ស្លាប់បាត់បង់ជីវិតហើយ។ ប៉ុន្តែក៏មានករណីខ្លះគាត់បាត់មុខមិនទទួលថ្នាំមែន តែគាត់បានមកវិញ យើងក៏ចុះឈ្មោះសាជាថ្មី ករណីនេះមានតិចតួចទេ»។

លោកវេជ្ជបណ្ឌិត អ៊ុក វិជ្ជា បានបញ្ជាក់ថា ទោះបីជាក្នុង ១ ឆ្នាំ អាចមានអ្នកស្លាប់ដោយសារជំងឺអេដស៍ ១ ១០០ នាក់ ក៏មានអត្រាអ្នកឆ្លងជំងឺអេដស៍ថ្មីប្រមាណ ១ ២០០ នាក់ដែរ ដែលពួកគេទាំងនោះជាក្រុមប្រឈមខ្ពស់ដូចជា ក្រុមយុវវ័យ ក្រុមបុរសស្រលាញ់បុរស ក្រុមបំប្លែងភេទ និងក្រុមអ្នកប្រើប្រាស់គ្រឿងញៀនជាដើម។

យ៉ាងណាក៏ដោយ កម្ពុជា កំពុងស្ថិតនៅលើមាគ៌ាឆ្ពោះទៅសម្រេចគោលដៅសកល ៩៥-៩៥-៩៥ មានន័យថា ៩៥% នៃអ្នកផ្ទុកមេរោគអេដស៍បានដឹងពីស្ថានភាព នៃមេរោគអេដស៍របស់ខ្លួន ៩៥% និងអ្នកដឹងខ្លួនថាផ្ទុកមេរោគអេដស៍ បានទទួលការព្យាបាលដោយឱសថប្រឆាំងមេរោគអេដស៍ (ART) និង ៩៥% នៃអ្នកកំពុងទទួល ART មានលទ្ធផលតេស្តបន្ទុកមេរោគអេដស៍ក្នុងឈាមកម្រិតទាបបំផុតមិនអាចរាប់បាន (viral load suppressed)។ ជាលទ្ធផល ធៀបនឹងគោលដៅ ៩៥-៩៥-៩៥ ខាងលើនេះ គិតត្រឹមដំណាច់ឆ្នាំ ២០២៤ កម្ពុជា សម្រេចបាន ៩២% ១០០% និង ៩៨%៕

អត្ថបទ ៖ សំអឿន

Related Topics:ជំងឺអេដស៍