ភ្ញៀវទេសចរកើនឡើងវិញជាង ២២ម៉ឺននាក់ ដើរកម្សាន្តនៅថ្ងៃចុងសប្តាហ៍

ភ្ញៀវទេសចរ មានសន្ទុះកើនឡើងវិញ នៅថ្ងៃចុងសប្តាហ៍(ថ្ងៃទី៣០-៣១ ខែកក្កដា ឆ្នាំ២០២២ )ប្រមាណ ២២០,៩៣៧នាក់ ក្នុងនោះភ្ញៀវជាតិ ២០៤.៥៨៥នាក់ ភ្ញៀវបរទេសផ្ទៃក្នុង ១៦,៣៥២នាក់ ពោលគឺកើនឡើង ៣.៤៣% ធៀបនឹងសប្តាហ៍កន្លងមក។ នេះបើតាមរបាយការណ៍ក្រសួងទេសចរណ៍កម្ពុជា។

ចំពោះគោលដៅទេសចរណ៍ ដែលទទួលបានភ្ញៀវទៅកម្សាន្តច្រើនជាងគេ គឺនៅខេត្តកំពត មានចំនួន ៣៤,៩៦៨នាក់, ខេត្តព្រះសីហនុ ៣៣,៣៨៨ នាក់, ខេត្តសៀមរាប ២៥,៧១៥នាក់, ខេត្តបាត់ដំបង ២០,៥៥៤នាក់ រាជធានីភ្នំពេញ ១៧,៩៧៥នាក់ និងខេត្តក្រុងផ្សេងៗទៀត។

បើតាមក្រសួងទេសចរណ៍ ការកម្រើកឡើងវិញខ្លះៗនៃជំងឺកូវីដ-១៩ ក្រសួងបានបន្តណែនាំ និងក្រើនរំលឹកដល់មន្ទីរទេសចរណ៍ ផ្នែកឯកជន និងប្រតិបត្តិករទេសចរណ៍ ឲ្យបន្តអនុវត្តវិធានការ «៣កុំ និង ៣ការពារ» វិធានសុវត្ថិភាពទេសចរណ៍ និង SOP៕  អត្ថបទ៖ នាង រតនៈ