អ្នកនាំពាក្យ៖ ការនាំចេញកង់កម្ពុជា ជាប់លេខ៥ លើពិភពលោក ខណៈការនាំចេញទៅអឺរ៉ុបជាប់ លេខ១

លោក ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអះអាងថា ឧស្សាហកម្មផលិតកង់កម្ពុជា ជាប់ចំណាត់ថ្នាក់លេខ១ សម្រាប់ការនាំចេញកង់ទៅកាន់ទីផ្សារសហគមន៍អឺរ៉ុប ខណៈនៅលើពិភពលោក គឺការនាំចេញកង់របស់កម្ពុជា ជាប់ចំណាត់ថ្នាក់លេខ៥។  លោក ហេង សុខគង់ អះអាងបែបនេះ នៅក្នុងសន្និសីទសារព័ត៌មាន នៅទីស្តីការគណៈរដ្ឋមន្ត្រីកាលពីសប្តាហ៍មុន។

លោក ហេង សុខគង់ អះអាងដូច្នេះថា៖ «ខ្ញុំសូមអនុញ្ញាតជម្រាបជូនថា កម្ពុជារបស់យើង បើនិយាយអំពីឧស្សាហកម្មផលិតកង់ បាននាំចេញទៅពិភពលោក គឺចំណាត់ថ្នាក់លេខ៥ ហើយចំណាត់ថ្នាក់លេខ១ នាំចេញទៅសហគមន៍អ៊ឺរ៉ុប»។

លោករដ្ឋលេខាធិការ បញ្ជាក់ថា គិតត្រឹមរយៈពេល ៦ខែពាក់កណ្ដាលឆ្នាំ២០២២ នេះប៉ុណ្ណោះ គឺការនាំ ចេញកង់របស់កម្ពុជា ទទួលបានចំណូលជាង ៥២០លានដុល្លារអាមេរិក បើប្រៀបធៀបជាមួយឆ្នាំ ២០២១ កន្លងទៅ ទទួលបានចំណូលចំនួន ៥៦៦លានដុល្លារ មានកំណើនប្រមាណ ១៤៤.១៣%។

បើតាមលោក ហេង សុខគង់ មុនឆ្នាំ២០២០ ប្រទេសចិន ជាអ្នកនាំចេញកង់ច្រើនជាងគេទៅទីផ្សារអឺរ៉ុប ហើយចិនតៃប៉ិ គឺជាប់លំដាប់លេខ២។ ប៉ុន្តែ គិតចាប់ពីឆ្នាំ២០២០មក គឺកម្ពុជា ក្លាយជាប្រទេសទី១ ដែលនាំចេញកង់ច្រើនជាងគេទៅកាន់ទីផ្សារអឺរ៉ុប ស្មើនឹង ២៤%នៃការនាំចូលសរុបរបស់សហគមន៍អឺរ៉ុប ខណៈប្រទេសចិន មានត្រឹម ១៧% និងចិនតៃប៉ិ ១១%។ លោក ចាត់ទុកថា ឧស្សាហកម្មផលិតកង់របស់កម្ពុជា គឺមានសារៈសំខាន់ណាស់ សម្រាប់ជួយជំរុញកំណើនចំណូលចូលជាតិយ៉ាងច្រើន ដើម្បីការទ្រទ្រង់សេដ្ឋកិច្ចកម្ពុជាឲ្យកាន់តែរីកចម្រើនថែមទៀត៕

ដោយ៖ ធឿន វ៉ាន់សុង