ព័ត៌មានជាតិ
ក្រសួងព្រមានចាត់វិធានការដាក់ពិន័យផលិតកម្ម មហាហង្សបើនៅតែប្រព្រឹត្តកំហុសដដែល
ក្រសួងវប្បធម៌ និងវិចិត្រសិល្បៈ ព្រមានវិធានការដាក់ពិន័យទៅលើផលិតកម្ម មហាហង្ស ប្រសិនបើនៅតែប្រព្រឹត្តកំហុសដដែលជាលើកទី២។
ការព្រមានបែបនេះបានធ្វើឡើងក្នុងកិច្ចប្រជុំអន្តរក្រសួងដឹកនាំដោយលោក ស្រី ភឿងសកុណា រដ្ឋមន្ត្រីក្រសួងវប្បធម៌ និងវិចិត្រសីល្បៈ មានការចូលរួមពីក្រសួងកិច្ចការនារី ក្រសួងអប់រំ យុវជន និងកីឡា និងតំណាងក្រុមហ៊ុន មហាហង្សលោក អិន សុភិន នៅព្រឹកថ្ងៃទី ០១ ខែកញ្ញា ឆ្នាំ ២០២២។
កិច្ចប្រជុំនេះ បន្ទាប់ពីមានការណែនាំរបស់ប្រមុខដឹកនាំរាជរដ្ឋាភិបាលសម្ដេចតេជោ ហ៊ុន សែនឱ្យក្រសួងពិនិត្យមើលទៅលើកម្មវិធីប្រកួតបវរកញ្ញាកម្ពុជា Miss Grand Cambodia ក្រោយរងការរិះគន់មិនសំចៃមាត់របស់មហាជន។
លោក ឡុង ប៉ុណ្ណាស៊ីរីវត្ថ រដ្ឋលេខាធិការ និងជាអ្នកនាំពាក្យ ក្រសួងវប្បធម៌ និងវិចិត្រសិល្បៈបានថ្លែងថា តំណាងក្រសួងជំរុញធាតុចូលឱ្យក្រុមហ៊ុនមហាហង្សដោយលើកឡើងអំពីចំណុចខ្វះខាតជាចំណុចរសើបប៉ះពាល់ទៅដល់តម្លៃស្ត្រីខ្មែរ និងទំនៀមទម្លាប់ប្រពៃណី។
មន្ត្រីអ្នកនាំពាក្យក្រសួងវប្បធម៌ បានឱ្យដឹងថា ការស្លៀកពាក់មិនសមរម្យ និងការបង្ហាញសារជាល្បែងបៀរ និងអាប៉ោងកើតមានឡើងមុនព្រឹត្តិការផ្លូវការ តែនៅថ្ងៃរៀបចំផ្លូវការមិនមានលេចឡើងនូវល្បែង ឬស្លៀកពាក់សិចស៊ីនោះទេ ប៉ុន្តែយ៉ាងណាក៏ក្រុមហ៊ុនត្រូវតែមានការកែប្រែដែរ។
លោក អិន សុភិន អគ្គនាយកផលិតកម្ម មហាហង្ស ក៏បានចេញមុខសុំទោស និងសន្យាមិនឱ្យមានការធ្វេសប្រហែសដែលជាកំហុសបច្ចេកទេសដោយអចេតនា នៃការប្រឡងបវរកញ្ញា Miss Grand Cambodia។
លោក ឡុង ប៉ុណ្ណាស៊ីរីវត្ថ បញ្ជាក់ថា ការប្រឡងពេលនេះ មិនមែនគោលដៅបវរកញ្ញាសម្រាប់ជាតិទាំងស្រុងនោះទេ គឺជាគោលដៅមួយទៀត ដើម្បីយកបវរកញ្ញាក្នុងស្រុកទៅប្រឡងនៅឥណ្ឌូនេស៊ីទៅវិញទេ។
លោក ឡុង ប៉ុណ្ណាស៊ីរីវត្ថបញ្ជាក់ថា គោលនយោបាយរបស់រាជរដ្ឋាភិបាលគឺគាំទ្រវិស័យឯកជន ការខុសឆ្គង ខ្វះខាតយើងត្រូវតែហៅមកណែនាំដោយត្រូវគិតឱ្យបានគ្រប់ជ្រុងទាំងក្របខណ្ឌជាតិ និងអន្តរជាតិ និងក្របខណ្ឌនៃការគោរពសិទ្ធិសេរីភាព។
លោក ឡុង ប៉ុណ្ណាស៊ីរីវត្ថ «យើងត្រូវគិតឱ្យគ្រប់ជ្រុងជ្រោយទាំងអស់ ទាំងក្របខណ្ឌជាតិ និងអន្តរជាតិ និងក្របខណ្ឌនៃការគោរពសិទ្ធិសេរីភាព បើអ្នកខ្លះសួរថា បើមិនស្រួលបិទ អាហ្នឹងរំលោភសិទ្ធិគ្នា ចឹងយើងគិតគ្រប់ជ្រុងជ្រោយណាស់»។
បើតាមលោក ឡុង ប៉ុណ្ណាស៊ីរីវត្ថ វិធានការទៅខាងមុខ ក្រសួងវប្បធម៌មិនមែនមិនធ្វើទេ ជាពិសេសនៅក្នុងក្របខណ្ឌការទប់ស្កាត់អ្វីដែលជាផលប៉ះពាល់អវិជ្ជមានទៅលើទំនៀមទម្លាប់ប្រពៃណីវប្បធម៌ ទៅតាមគ្រប់រូបភាពទាំងអស់ ការផ្សព្វផ្សាយ និងចែករំលែកសំឡេង យើងមានការណែនាំតាមរយៈក្រុមប្រឹក្សាវិន័យ និងលើកសរសើរ ហើយបើមានកំហុសដដែលនេះកើតឡើងលើកក្រោយទៀតនោះ ក្រសួងនឹងដាក់ពិន័យមិនខានឡើយ៕
អត្ថបទ៖ ឡេង ដេត
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ