ខេត្តស្វាយរៀង ត្រៀមកម្លាំងសមត្ថកិច្ចជិត​៩០០នាក់ ការពារក្នុងពិធីបុណ្យប្រណាំងទូក

ស្វាយរៀង: អភិបាលខេត្តស្វាយរៀង បានត្រៀមកងកម្លាំងចម្រុងប្រមាណជិត ៩០០នាក់ ដើម្បីការពារសុខសុវត្ថិភាព និងសណ្តាប់ធ្នាប់សាធារណៈ ជូនប្រជពលរដ្ឋ មកលេងកម្សាន្ត នៅថ្ងៃពិធីបុណ្យប្រណាំងទូក ត្រូវនឹងថ្ងៃទី ២៩-៣០ ខែតុលាខាងមុខ។

លោកអភិបាលខេត្ត ម៉ែន វិបុល ថ្លែងបែបនេះនាព្រឹកថ្ងៃទី ៥ ខែតុលា ឆ្នាំ២០២២ ក្នុងកិច្ចប្រជុំត្រួតពិនិត្យពីវឌ្ឍនភាព​នៃការរៀបចំពិធីប្រណាំងទូកឆ្នាំ២០២២នៅទន្លេវ៉ៃគោ ដែលប្រព្រឹត្តទៅនៅថ្ងៃទី២៩-៣០ ខែតុលា ខាងមុខនេះ នៅសាល​ប្រជុំសាលាខេត្តស្វាយរៀង។

ខេត្តស្វាយរៀង រៀបចំពិធីប្រណាំងទូកនេះ អាចប្រព្រឹត្តទៅបានដោយសារប្រទេសជាតិ មានសុខសន្តិភាពពេញលេញ ក្រោមការដឹកនាំដ៏ឈ្លាសវៃពីសំណាក់ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានដឹកនាំប្រទេស​ឲ្យមានការ​រីកចម្រើនលើគ្រប់វិស័យ ជាពិសេសអាចគ្រប់គ្រងស្ថានភាពកូវីដ-១៩ បានល្អប្រសើរធ្វើឲ្យប្រជាពលរដ្ឋអាច​ប្រកបរបរ​រកស៊ី ឡើងវិញជាប្រក្រតី ដោយបានដាក់ចេញយុទ្ធសាស្ត្រចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋដោយ​ឥតគិតថ្លៃ។ នេះជាការលើកឡើងរបស់លោក ម៉ែន វិបុល។

លោកអភិបាលខេត្ត បានបន្តថា ដើម្បីងាយស្រួលមានប្រសិទ្ធភាពនឹងទាន់ពេលវេលា រដ្ឋបាលខេត្តស្វាយរៀង បានបង្កើតគណៈកម្មការមួយ អមដោយអនុគណៈកម្មការចំនួន ១០ផ្សេងទៀតជាជំនួយការ ជាពិសេសរៀប​ចំផែនការចំណាយសម្រាប់អនុគណៈកម្មការនីមួយៗ ដែលត្រូវប្រើប្រាស់ឲ្យបានច្បាស់លាស់ ដើម្បីពន្លឿន​លើការងារ​ទាំងនោះ ។

លោក ម៉ែន វិបុល​ ក៏បានណែនាំជម្រុញបន្ថែមដល់អនុគណៈកម្មការទាំងអស់បន្ទាប់ពីកិច្ចប្រជុំនាថ្ងៃនេះ ត្រូវបន្តសហការ​ចាត់ចែង និងអនុវត្តតួនាទីភារកិច្ចដែលមានកំណត់ក្នុងសេចក្ដីសម្រេចរបស់រដ្ឋបាលខេត្ត ឲ្យទទួលបានលទ្ធផលល្អ​ថែមទៀត ជាពិសេសរាល់កិច្ចការដែលនៅសេសសល់ត្រូវពិនិត្យនិងអនុវត្តឲ្យបានរួចរាល់​ជាស្ថាពរមុនថ្ងៃពិធីប្រណាំង​ទូកផ្លូវការចាប់ផ្ដើម ដើម្បីឲ្យពិធីប្រណាំងទូកឆ្នាំនេះ ប្រព្រឹត្តដោយរលូន និងទទួលបានលទ្ធផលជោគជ័យតាមការគ្រោង​ទុកផងដែរ៕ អត្ថបទ៖ ភក្ដី