ព័ត៌មានជាតិ

រដ្ឋបាលខេត្តកណ្តាលបើកការដ្ឋានសង់ផ្លូវ នៅភូមិអំពិលទឹក ទៅជាផ្លូវបេតុងសម្រួលដល់ការធ្វើដំណើរពលរដ្ឋ

បានផុស

៤ years មុន

នៅ

ថ្ងៃសៅរ៍ ៨ តុលា ២០២២

ដោយ

ផ្លូវមួយខ្សែស្ថិតនៅភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្ដាល ត្រូវបានបើកការដ្ឋានជួសជុលផ្លូវចាក់បេតុងអាមេប្រវែង ១ ៣៥០ម៉ែត្រ ទទឹង ៥ម៉ែត្រ កម្រាស់០,១៥ម៉ែត នាព្រឹកថ្ងៃទី ០៨ ខែ តុលា ក្រោមអធិបតីភាពលោក គង់ សោភ័ណ្ឌ អភិបាល នៃគណៈ អភិបាលខេត្តកណ្ដាល និងកងកម្លាំងទាំងបី មន្ទីរអង្គភាពជុំវិញខេត្ត អាជ្ញាធរស្រុកលើកដែក ព្រមទាំងប្រជាពលរដ្ឋផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គង់ សោភ័ណ្ឌ អភិបាល នៃគណៈ អភិបាលខេត្តកណ្ដាល បានលើកឡើងថា ការបើកការដ្ឋានជួសជុលផ្លូវចាក់បេតុងអាមេប្រវែង ១ ៣៥០ម៉ែត្រ នាពេលនេះ គឺជាសមិទ្ធផលថ្មីបន្ថែមទៀត ក្នុងចំណោមសមិទ្ធផលជាច្រើនផ្សេងទៀត ក្នុងវិស័យសេដ្ឋកិច្ច-សង្គម សោភ័ណភាព ប្រកបដោយ សមធម៌ និងបរិយាប័ន្ន ស្របតាមគោលនយោបាយយុទ្ធសាស្ត្រចតុកោណរបស់រាជរដ្ឋាភិបាល ដែលកំណត់យក “មនុស្ស ទឹក ផ្លូវ ភ្លើង” ជាអាទិភាព ដើម្បីលើកកម្ពស់ផាសុខភាព និងជីវភាពរស់នៅជូនប្រជាពលរដ្ឋ “មានផ្លូវ មានស្ពាន មានក្ដីសង្ឃឹម មានការអភិវឌ្ឍលើគ្រប់វិស័យ និងមានសន្តិភាព ទើបមានអ្វីៗ ដូចថ្ងៃនេះ” ។

ស្របពេលជាមួយគ្នានេះដែរ លោកក៏បានផ្ដាំផ្ញើដល់អាជ្ញាធរស្រុកលើកដែក ត្រូវពង្រឹងអភិបាលកិច្ចល្អ និង អនុវត្តឱ្យបានជាប់ជានិច្ច នូវបាវចនា ២ និង អភិក្រម ៥ ដែលបានដាក់ចេញដោយសម្ដេចតេជោនាយករដ្ឋមន្ត្រី ត្រូវបន្តចុះមូលដ្ឋានឱ្យបានទៀងទាត់ជាប់ជាប្រចាំ បើកយុទ្ធនាការ ប្រយុទ្ធប្រឆាំង និងបង្ក្រាបឧក្រិដ្ឋកម្មគ្រឿងញៀន ការជួញដូរ និងរត់ពន្ធមនុស្ស ការបង្ខិតបង្ខំ ពលកម្ម និងអាជីវកម្មផ្លូវភេទ ឱ្យមានប្រសិទ្ធភាព ក្នុងស្មារតីទទួលខុសត្រូវខ្ពស់

លោកអភិបាលខេត្តរូបនេះ ក៏បានបន្តសំណូមពរដល់ប្រជាពលរដ្ឋដែលរស់នៅជាប់ផ្លូវកំពុងសាងសង់ ត្រូវចូលរួមសហការជាមួយអាជ្ញាធរ សម្រួលដល់ការសាងសង់ផ្លូវបេតុងមួយនេះ ឱ្យសម្រេចបានតាមការគ្រោងទុក្ខ៕

ដោយ៖ ឌឿនចាន់ ថារី