WWF Cambodia៖ ជាង ៦០% នៃជំងឺឆ្លងថ្មី ឬគ្រោះថ្នាក់ជាងកូវីដ-១៩ គឺឆ្លងពីសត្វទៅមនុស្ស

អង្គការ​មូលនិធិ​សកល​សម្រាប់​អភិរក្ស​ធម្មជាតិ កម្ពុជា WWF Cambodia បាន​អះអាងថា ការបរិភោគ​សាច់សត្វ​ព្រៃ នាំ​ហានិភ័យ​ច្រើន​ដល់​សុខភាព ជាក់ស្តែង​មាន​ជំងឺ ប្រមាណ​ជាង ៦០% ក្នុងចំណោម​ជំងឺឆ្លង​ប្រភេទ​ថ្មី ដែល​ស្រដៀង ឬ​គ្រោះថ្នាក់​ជាង​ជំងឺ​កូវីដ​-១៩ ​ជា​ជំងឺឆ្លង​ពី សត្វ​ទៅ​មនុស្ស​។

WWF Cambodia ថ្មីៗនេះ បានឱ្យដឹងថា ការបរិភោគសាច់សត្វព្រៃ នាំហានិភ័យដល់សុខភាពមនុស្សជាច្រើន ខណៈប្រមាណជាង ៦០% ក្នុងចំណោមជំងឺឆ្លងប្រភេទថ្មី ដែលស្រដៀង ឬគ្រោះថ្នាក់ជាងជំងឺកូវីដ-១៩ សុទ្ធសឹងតែជាជំងឺឆ្លងពីសត្វទៅមនុស្ស។

WWF Cambodia បង្ហាញថា មានមេរោគចំនួនជាង ១,៦ លានប្រភេទ មិនត្រូវបានគេកំណត់អត្តសញ្ញាណនៅឡើយ ហើយគេប៉ាន់ប្រមាណថា ជាងពាក់កណ្តាលនៃមេរោគទាំងនោះ អាចមានលទ្ធភាពចម្លងទៅមនុស្សបាន។ ការផ្ទុះឡើងនៃជំងឺឆ្លង ដូចជា ជំងឺផ្លូវដង្ហើម SARS, ជំងឺផ្លូវដង្ហើមមជ្ឈិមបូព៌ា MERS, ជំងឺផ្តាសាយជ្រូក H1N1, ជំងឺគ្រុនផ្តាសាយបក្សី H5N1 ជាដើម សុទ្ធតែជាជំងឺឆ្លងពីសត្វទៅមនុស្ស។

នៅពេលមនុស្សបរិភោគម្ហូបសាច់សត្វព្រៃមួយចាន ក្រៅពីការប្រឈមនឹងហានិភ័យសុខភាពចំពោះខ្លួនឯង ក៏អាចបង្កហានិភ័យដល់អ្នកដទៃផងដែរ។ ដូចគ្នានេះដែរ សកម្មភាពរបស់មនុស្ស ដូចជា ការបរបាញ់ ការដឹកជញ្ជូន ការជួញដូរ និងការកែច្នៃ សុទ្ធសឹងតែជាកត្តាបង្កឱកាសសម្រាប់ការប៉ះពាល់សត្វព្រៃដោយផ្ទាល់ និងអាចចម្លងមេរោគទៅមនុស្ស។

គួរបញ្ជាក់ថា ការសិក្សាមួយរបស់ក្រសួងបរិស្ថាន និងអង្គការ WWF កម្ពុជា បានបង្ហាញថា ក្នុងចន្លោះឆ្នាំ២០១០ ដល់ ឆ្នាំ២០២២ ចំនួនសត្វព្រៃប្រភេទក្រចកជើងចំពាម បានថយចុះគួរឱ្យកត់សម្គាល់ នៅតំបន់ទេសភាពភាគខាងកើតក្នុងប្រទេសកម្ពុជា។ ក្នុងនោះ សត្វទន្សោង ថយចុះ ៨៩% ឈ្លូស ថយចុះ ៦៥% និងជ្រូកព្រៃ ថយចុះ ១៥%។

ក្រសួងបរិស្ថាន រដ្ឋបាលខេត្តមណ្ឌលគិរី មន្ទីរបរិស្ថានខេត្ត ខណ្ឌរដ្ឋបាលព្រៃឈើក្នុងខេត្តមណ្ឌលគិរី អង្គការWWF និងដៃគូរសំខាន់ៗ បានសហការរៀបចំយុទ្ធនាការបញ្ឈប់ការជួញដូរសត្វព្រៃ ក្នុងគោលបំណង ការពារធនធានសត្វព្រៃកម្ពុជាឱ្យបានគង់វង្ស និងរួមចំណែកដល់កិច្ចគាំពារសុខភាពសាធារណៈ។ យុទ្ធនាការបញ្ឈប់ការជួញដូរសត្វព្រៃជាផ្នែកមួយនៃយុទ្ធនាការធំគឺ៖ “យុទ្ធនាការអន្ទាក់សូន្យ” រួមគ្នាបញ្ឈប់ការបរិភោគ និងការជួញដូរសត្វព្រៃ ដើម្បីការពារខ្លួនយើង គ្រួសារ សហគមន៍ និងអនាគតយើង៕

អត្ថបទ៖ ច័ន្ទ វីរៈ