នាយករដ្ឋមន្រ្តីកាណាដា លោក Justin Trudeau​ អញ្ជើញមកដល់ប្រទេសកម្ពុជាហើយ

លោក Justin Trudeau នាយករដ្ឋមន្រ្តីកាណាដា បានអញ្ជើញមកដល់ប្រទេសកម្ពុជាហើយ នៅរសៀលថ្ងៃទី ១២ ខែវិច្ឆិកា ឆ្នាំ ២០២២នេះ ដើម្បីចូលរួមក្នុងកិច្ចប្រជុំកំពូលខួបអនុស្សាវរីយ៍អាស៊ាន-កាណាដា និងកិច្ចប្រជុំកំពូលពាក់ព័ន្ធ ដែលប្រទេសកម្ពុជាជាម្ចាស់ផ្ទះរៀបចំ។ លោកស្រី អ៊ឹង កន្ថាផាវី រដ្ឋមន្រ្តីក្រសួងកិច្ចការនារី បានអញ្ជើញទៅទទួលស្វាគមន៍លោកនាយករដ្ឋមន្រ្តីកាណាដា Justin Trudeau នៅព្រលានយន្ដហោះអន្តរជាតិភ្នំពេញ។

ការិយាល័យរបស់លោកនាយករដ្ឋមន្ត្រីកាណាដា បានឲ្យដឹងមុនពេលលោកមកដល់ប្រទេសកម្ពុជាថា នៅក្នុងកិច្ចប្រជុំកំពូលអាស៊ាន នៅរាជធានីភ្នំពេញ លោក Trudeau នឹង​ចូលរួម​ក្នុង​កិច្ចប្រជុំ​កំពូល​រំលឹក​ខួប​អនុស្សាវរីយ៍​រវាងអាស៊ាន​-​កាណាដា ដើម្បី​ប្រារព្ធ​ខួប​លើក​ទី ៤៥ នៃ​ទំនាក់ទំនងដៃគូសន្ទនា​អាស៊ាន-កាណាដា។

លោកនាយករដ្ឋមន្ត្រី កាណាដា ក៏នឹងផ្ដោតការពិភាក្សាលើការដោះស្រាយបញ្ហាប្រឈម នៅក្នុងតំបន់ និងនៅលើពិភពលោក ដែលកំពុងបង្កជាក្ដីព្រួយបារម្ភរួម ដូចជា៖ សង្គ្រាមរុស្ស៊ី-អ៊ុយក្រែន បញ្ហាសន្តិសុខស្បៀង និងថាមពល ក៏ដូចជាបញ្ហាបម្រែបម្រួលអាកាសធាតុ ជាដើម។

ជាមួយគ្នានេះ លោកនាយករដ្ឋមន្ត្រីកាណាដា ក៏នឹងប្ដេជ្ញាជំរុញឲ្យមានសន្តិភាព និងស្ថិរភាពនៅក្នុងតំបន់ ក៏ដូចជាការជំរុញទំនាក់ទំនងពាណិជ្ជកម្ម និងកំណើនសេដ្ឋកិច្ច ដែលជាផលប្រយោជន៍ដល់ប្រជាជាតិលើពិភពលោក និងដើម្បីពង្រឹងនូវទំនាក់ទំនងដ៏រឹងមាំរវាងភាគីទាំងពីរ អាស៊ាន-កាណាដា៕