បេក្ខជនប្រឡងបាក់ឌុបលើ្មសនឹងសកម្មភាពកម្រិតទី៣ ហាមមិនឱ្យប្រឡង២ឆ្នាំ និង ប្រឈមផ្លូវច្បាប់

ក្រសួងអប់រំ យុវជននិងកីឡា បានចេញសេចក្តីណែនាំដល់បេក្ខជនប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប​សម័យប្រឡង ០៥ធ្នូ ២០២២ មិនត្រូវប្រព្រឹត្តិសកម្មភាពផ្សេងៗ ដែលធ្វើឱ្យខូចសណ្តាប់ធ្នាប់របៀបរៀបរយនៃការប្រឡង និងប៉ះពាល់កិត្តិយសគណៈមេប្រយោគ ដើម្បីចៀសវាងទទួលរងនូវការពិន័យដូចជាហាម មិនឱ្យចូលរួមប្រឡងរយៈពេល ២ឆ្នាំ បន្ទាប់និងអាចបញ្ជួនទៅសមត្ថកិច្ចដោះស្រាយតាមផ្លូវច្បាប់ប្រសិនបើបេក្ខជននោះល្មើស​នឹងសកម្មភាព​កម្រិត​ថ្នាក់ទី​៣។ក្រសួងអប់រំបានឱ្យដឹងថាបេក្ខជនប្រព្រឹត្តត្រូវកំណត់ក្នុងកម្រិតថ្នាក់ទី ៣សំដៅលើបេក្ខជន​យកអាវុធជាតិផ្ទុះ​ចូល​ក្នុង​មណ្ឌលប្រឡង ឱ្យអ្នកដទៃមកប្រលងជំនួស ធ្វើឱ្យខូចសម្ភារក្នុងបន្ទប់ប្រឡង និងខូចខាតបន្ទប់​ប្រឡងដោយ​ចេតនា និងមិនអនុវត្តតាមការណែនាំរបស់គណៈមេប្រយោគឬអ្នកមានសមត្ថកិច្ចក្នុង​មណ្ឌលប្រឡងឬអ្នក​មានសមត្ថកិច្ចត្រួតពិនិត្យមណ្ឌល។

ក្រសួងអប់រំបានបន្តថា បេក្ខជនដែលបានប្រព្រឹត្តសកម្មភាពកម្រិត៣ នឹងត្រូវកំណត់ឱ្យធ្លាក់ជាស្វ័យប្រវត្តិ និងផ្អាកមិន​ឲ្យប្រឡងពីរឆ្នាំបន្ទាប់។ ក្នុងករណីចាំបាច់បេក្ខជននឹងត្រូវបញ្ជូនទៅស្ថាប័នមានសមត្ថកិច្ច ដើម្បីជួយដោះស្រាយ​តាមច្បាប់ជាធរមានទៀតផង។

ចំពោះបេក្ខជនត្រូវបានកំណត់នៅក្នុងកម្រិតថ្នាក់ទី ២ សំដៅលើបេក្ខជនដើរចុះឡើងពីកន្លែងអង្គុយ​ដោយគ្មានការ​អនុញ្ញាត​ពីអនុរក្ស ហែកសន្លឹកកិច្ចការឬមិនព្រមប្រគល់សន្លឹកកិច្ចការជូនអនុរក្ស ផ្លាស់ទីកន្លែងអង្គុយ​ដោយលុបលេខ​តុពីកន្លែងដែលបានកំណត់ទៅសរសេរលេខតុ របស់ខ្លួននៅកន្លែងផ្សេង ឱ្យសន្លឹកកិច្ចការឬសំណេរក្រដាស​ព្រាងរបស់​ខ្លួនទៅ​អ្នក​ដទៃ​ចម្លង ឲ្យអ្នកដទៃសរសេរលើសន្លឹកកិច្ចការរបស់ខ្លួនសរសេរលើ​សន្លឹកកិច្ចការរបស់អ្នក​ដទៃរបស់ប្រធាន​វិញ្ញាសាចេញក្រៅបន្ទប់ប្រលង ចេញទៅយកឯកសារឬចម្លើយពាក់ព័ន្ធទៅនឹងប្រធានវិញ្ញាសារចូលក្នុងបន្ទប់ប្រឡងវិញ ក្នុងពេលធ្វើវិញ្ញាសា បង្កជម្លោះក្នុងមណ្ឌលប្រឡងឬបន្ទប់ប្រឡងដោយគំរាមកំហែងលើបេក្ខជនដទៃ ដណ្ដើមយក​សន្លឹកកិច្ចការរបស់អ្នកដទៃធ្វើជាសន្លឹកកិច្ចការរបស់ខ្លួន ធ្វើមេក្លោងប្រមូលលុយឬណែនាំឲ្យបេក្ខជន​ដទៃប្រមូលលុយឲ្យអនុរក្ស។

បេក្ខជនដែលបានប្រព្រឹត្តសកម្មភាពកម្រិតថ្នាក់នេះនឹងត្រូវកំណត់ឱ្យធ្លាក់ជាស្វាយប្រវត្តិនិងផ្អាកមិនឲ្យប្រលងឆ្នាំបន្ទាប់។

រីឯបេក្ខជនដែលបានប្រព្រឹត្តសកកម្មភាពកម្រិត១វិញសំដៅលើបេក្ខជនទាំងឡាយណា មកដល់មណ្ឌលប្រឡងក្រោយ​ជួងទីពីរ។ ប្រសិនបើបេក្ខជនជួបប្រទះនឹងឧបទ្ទវហេតុផ្សេងៗ ដែលអាចអនុគ្រោះបាន ដោយមិនឱ្យលើសពី ១៥នាទី ក្រោយជួងទីពីរ អនុរក្សអនុញ្ញាតឱ្យចូលលប្រឡងតាមរយៈប្រធានមណ្ឌល ដោយមិនបន្ថែមម៉ោងឡើយ។ សន្លឹកកិច្ចការណាដែលមានសញ្ញាសម្គាល់អាគតដ្ឋានរបស់ខ្លួន ចម្លើយនៃសំណួរណាដែលមានវិចារដូចគ្នា ទាំងស្រុង ចម្លើយនៃសំណួរណាដែលមានខ្លឹមសារដូចទាំងស្រុងទៅនឹងសំណៅវិញ្ញសាដែលត្រូវបាននាំចូលក្នុងបន្ទប់ប្រឡងដោយបេក្ខជន ដោយអ្នកដទៃតាមគ្រប់មធ្យោបាយ ឬក្រោយធ្វើការកោសល្យវិច័យឃើញថា សន្លឹកកិច្ចការនោះ​ដូចគ្នាទាំងស្រុង​ទៅនឹងចម្លើយវិញ្ញាសាដែលមានស្រាប់ ដែលត្រូវបានរៀបចំឡើងដោយខុសច្បាប់។

បេក្ខជនណាដែលបានប្រព្រឹត្តសកម្មភាពកម្រិតទី១នេះនឹងមិនត្រូវអនុញ្ញាតឱ្យ ចូលប្រឡង ដោយកំណត់​ឱ្យធ្លាក់​ជាស្វ័យប្រវត្តិ។

គួរបញ្ជាក់ថាឆ្នាំ២០២២នេះមានបេក្ខជនប្រឡងសញ្ញាបត្រ​មធ្យម​សិក្សា​ទុតិយភូមិ មានចំនួនសរុប ១២៨ ១៣៦ នាក់ ស្រី ៦៨ ៧៧៣ នាក់។ ក្នុងនោះថ្នាក់វិទ្យាសាស្រ្ត ៤២ ៩៣៦ នាក់ ស្រី ២៥ ៤៤៥ នាក់, ថ្នាក់វិទ្យាសាស្រ្តសង្គម ៨៥ ២០០ នាក់ ស្រី ៤៣ ៣២៨ នាក់ ចែកជា ២២១ មណ្ឌល កើន ១៧ មណ្ឌល និងមានបន្ទប់ ៥ ១៧៤​ បន្ទប់ កើនឡើង ៥៥៩ បន្ទប់។ ក្នុងនោះថ្នាក់វិទ្យាសាស្រ្ត កើន ៣ មណ្ឌល និងថ្នាក់វិទ្យសាស្រ្តសង្គម កើន ១៤ មណ្ឌល ដោយថ្នាក់វិទ្យាសាស្រ្តមាន ៧៦ មណ្ឌល ស្មើនឹង ១ ៧៤៣ បន្ទប់ និងថ្នាក់វិទ្យាសាស្រ្តសង្គម មាន ១៤៥ មណ្ឌល ស្មើនឹង ៣ ៤៣១ បន្ទប់៕ សំអឿន