មន្ទីរជំនាញ​ចុះទៅមើលទីតាំង​ភ្នំបូរី​ក្រោយលេចឮថា ចៅហ្វាយស្រុក​ឲ្យគេកាយថ្មលក់

មន្ទីរជំនាញពាក់ព័ន្ធ​កំពុងរត់ខ្វែងជើងគ្នាទៅពិនិត្យទីតាំងភ្នំបូរីដែលជាភ្នំប្រវត្តិសាស្ត្រ ក្រោយធ្លាយដំណឹងថា លោកចៅហ្វាយស្រុកអង្គរបូរីអនុញ្ញាតឲ្យក្រុមឈ្មួញកាយយកថ្មភ្នំបូរីលក់យ៉ាងគគ្រឹកគគ្រេង។

តាមការបញ្ជាក់ពីលោក ផេង វុធ ប្រធានមន្ទីររ៉ែនិងថាមពលខេត្តតាកែវ បានឲ្យដឹងនៅព្រឹកថ្ងៃទី ២៨ ខែវិច្ឆិកា ឆ្នាំ​២០២២ នេះថា ករណីកាយភ្នំបូរីនេះលោកអត់ដឹង ហើយក៏មិនពាក់ព័ន្ធ និងជំនាញលោកដែរ និងបានរុញឲ្យទៅសួរខាងមន្ទីរវប្បធម៌ទៅ។

លោកប្រធានមន្ទីរបញ្ជាក់ថា ជំនាញលោកគ្មានសិទ្ធក្នុងការអនុញ្ញាតច្បាប់ពាក់ព័ន្ធ នឹងការងាររ៉ែ និងថាមពលទៅឲ្យក្រុមឈ្មួញនោះទេប៉ុន្មានឆ្នាំកន្លងមកនេះ គឺខេត្ត និងស្រុកផ្ទាល់ជាអ្នកអនុញ្ញាត ហើយបើក្នុងករណីមានច្បាប់ត្រឹមត្រូវជំនាញលោកគ្រាន់តែពិនិត្យនិងទទួលស្គាល់លើលិខិតស្នាមប៉ុណ្ណោះ។

ចំណែកលោក ជេត ពិសុទ្ធ ប្រធានមន្ទីរវប្បធម៌ និងវិចិត្រសិល្បៈខេត្តតាកែវវិញនៅព្រឹកថ្ងៃទី២៨វិច្ឆិកា លោកមិនបានបកស្រាយវែងឆ្ងាយនោះទេដោយថា លោកកំពុងបើកឡានទៅពិនិត្យទីតាំងភ្នំបូរីនេះហើយ។

សូមបញ្ជាក់ថា លោក រស់ ប៊ុនធឿន ចៅហ្វាយស្រុកអង្គរបូរី ដែលទើបឡើងកាន់ដំណែង៣ ៤ ខែ កំពុងបើកដៃឲ្យក្រុមឈ្មួញកាយយកថ្មភ្នំបូរី ដែលជាភ្នំប្រវត្តិសាស្ត្រលក់រាល់ថ្ងៃយ៉ាងគគ្រឹកគគ្រេង ដោយប្រជាពលរដ្ឋលើកឡើងថា ចៅ​ហ្វាយស្រុកអង្គរបូរី រូបនេះចូលចិត្តច្រៀងខារ៉ាអូខេណាស់ ហើយប្រហែលជាអត់លុយច្រៀងហើយមើលទៅបានជាឃុបឃិតអនុញ្ញាតឲ្យឈ្មួញកាយយកថ្មភ្នំបូរីលក់យ៉ាងនេះ៕

អត្ថបទ៖ វីរៈ