អត្រាសិស្សបោះបង់ការ​សិក្សា​​នៅកម្រិត​វិទ្យាល័យមាន​កម្រិតខ្ពស់

អត្រាបោះបង់ការសិក្សារបស់សិស្សនៅកម្រិតមធ្យមសិក្សាទុតិយភូមិ មានជាង១៨%ខ្ពស់ជាងសិស្សកម្រិតមធ្យមសិក្សាបឋមភូមិដែលមានត្រឹមតែជាង១៦%ប៉ុណ្ណោះ។

យោងតាមរបាយការណ៍របស់ក្រសួងអប់រំយុវជននិងកីឡាបានឱ្យដឹងថា ឆ្នាំសិក្សា២០២១-២០២២នេះ នៅទូទាំងប្រទេសមានគ្រឹះស្ថានមធ្យមសិក្សាសាធារណៈចំនួន១៨១២ក្នុងនោះមានអនុវិទ្យាល័យចំនួន ១២៥៣ មានសិស្ស​៦៦២១០៦នាក់ និងវិទ្យាល័យចំនួន៥៥៩ មានសិស្ស ៣៦០៦១៧នាក់។

ឆ្នាំសិក្សា២០២១-២០២២ អត្រាបោះបង់ការសិក្សាកម្រិតមធ្យមសិក្សាបឋមភូមិមាន ១៦,៦%និងអត្រាសិស្សត្រួតថ្នាក់មាន១,២%។ ចំណែកអត្រាបោះបង់ការសិក្សាកម្រិតមធ្យមសិក្សាទុតិយភូមិវិញមាន១៨,៥% និងអត្រាត្រួតថ្នាក់មាន​១,១%​។

លោក រស់ សុវាចា អ្នកនាំពាក្យក្រសួងអប់រំយុវជននិងកីឡាបានបញ្ជាក់ថា ការបោះបង់ការសិក្សារបស់សិស្សនៅទាំងកម្រិតមធ្យមសិក្សាបឋមភូមិនិងកម្រិតមធ្យមសិក្សាទុតិយភូមិគឺបណ្តាលមកពីបុគ្គល។

ក្រសួងអប់រំយុវជននិងកីឡាបានដាក់ចេញនូវវិធានការមួយចំនួន ដើម្បីកាត់បន្ថយអត្រាបោះបង់ការសិក្សារបស់សិស្សនៅគ្រប់កំរិតឲ្យកាន់តែប្រសើរឡើងថែមទៀត ដែលជួយធានាឲ្យសិស្សទទួលបានការអប់រំប្រកប​ដោយ​សមធម៌​និងពេញមួយជីវិត។

វិធានទាំងនោះរួមមានការពង្រឹ ងការចូលរួមពីអ្នកពាក់ព័ន្ធ ការដឹកនាំគ្រប់គ្រងតាមសាលារៀន ការពង្រឹងប្រសិទ្ធភាពនៃការផ្តល់អាហារូបករណ៍ លើកទឹកចិត្តនិងបង្កលក្ខណៈងាយស្រួលដល់ការបង្រៀននិងរៀន លើកកម្ពស់ការអប់រំដល់អាណាព្យាបាលសិស្សពីគុណតម្លៃនៃការសិក្សានិងការយកចិត្តទុកដាក់ទៅលើជីវភាពរបស់គ្រូបង្រៀនដើម្បីកាត់បន្ថយអត្រាការបោះបង់ការសិក្សារបស់សិស្សពិសេសនៅកំរិតវិទ្យាល័យ។

លើសពីនេះទៀតក្រសួងក៏នឹងពង្រឹងគុណភាពគ្រូបង្រៀន ពង្រីកសាលារៀននៅគ្រប់កំរិត ពង្រឹងអធិការកិច្ចគ្រប់ជ្រុងជ្រោយតាមសាលារៀន ការអភិ វឌ្ឍកម្មវិធីសិក្សានិងសៀវភៅសិក្សាគោលគ្រប់ជ្រុងជ្រោយផងដែរដើម្បីធានាបាននូវការអប់រំប្រកបដោយគុណភាព សមធម៌ បរិយាប័ន្ននិងលើកកម្ពស់ឱកាសសិក្សាពេញមួយជីវិតសម្រាប់ទាំងអស់គ្នា។

ជាមួយគ្នានេះដែរក្រសួងនឹងខិតខំបង្កើនការផ្តល់អាហារូបករណ៍ដល់សិស្សក្រីក្រចាប់ពីកំរិតបឋមសិក្សារហូតដល់មធ្យមសិក្សា៕

អត្ថបទ៖ សំអឿន