គុយបា នឹងបញ្ជួនក្រុមគ្រូពេទ្យឯកទេសជំងឺ​មហារីក​និងទឹកនោមផ្អែម​បណ្ដុះបណ្ដាលគ្រូពេទ្យ​កម្ពុជា

លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំង​កូវីដ១៩ ក្នុងក្របខណ្ឌទូទាំងប្រទេស (គវក-១៩) បានឱ្យដឹងថា ភាគីគុយបាបានឯកភាពក្នុងការបញ្ជូនក្រុម​គ្រូពេទ្យឯកទេស​ជំងឺមហារីក និងជំងឺទឹកនោមផ្អែមទៅជួយបណ្ដុះបណ្ដាលគ្រូពេទ្យកម្ពុជា ឬទទួលយកគ្រូពេទ្យកម្ពុជា មកបណ្តុះបណ្ដាលដោយផ្ទាល់នៅប្រទេសគុយបា។

នៅក្នុងសេចក្ដីប្រកាសព័ត៌មានស្តីពីលទ្ធផើដំណើរទស្សនកិច្ចផ្លូវការរបស់លោកស្រីវេជ្ជបណ្ឌិត ឱ វណ្ណឌីន នៅសាធារ​ណៈ​រដ្ឋគុយបា ពីថ្ងៃទី១១ ដល់ទី១៩ ខែធ្នូ ឆ្នាំ២០២២ ចុះផ្សាយកាលពីយប់ថ្ងៃទី១៧ធ្នូ លោកស្រីវេជ្ជបណ្ឌិត ឱ វណ្ណឌីន បានបន្តថា ការងារនេះក្រុមការងារជំនាញនៃភាគីទាំងពីរត្រូវបន្តរៀបចំគម្រោងផែនការជាក់លាក់បន្ថែមទៀត អំពីតម្រូវ​ការនិងពេលវេលា។

ក្នុងនោះភាគីគុយបាលពិនិត្យលទ្ធភាពបន្ថែមអាហារូបករណ៍ដល់និស្សិតកម្ពុជា ទៅសិក្សាផ្នែកសុខាភិបាល​ឲ្យបាន​ច្រើនថែមទៀត​ព្រមទាំងពិចារណាជាមួយក្រសួងពាណិជ្ជកម្មអន្តរជាតិនៃប្រទេសគុយបាក្នុងការផ្ដល់​អាហាររូបករណ៍​បន្តការសិក្សាថ្នាក់ឯកទេសព្យាបាលជំងឺមហារីកដល់និស្សិតខ្មែរចំនួន៣ រូបដែលកំពុងសិក្សាថ្នាក់វេជ្ជបណ្ឌិតទូទៅ​នៅប្រទេសគុយបា។

លោកស្រីបានបន្តទៀតថា ដោយឡែកសម្រាប់ការព្យាបាលជំងឺទឹកនោមផ្អែមភាគីកម្ពុជាបានលើកទឹកចិត្តឱ្យភាគី​គុយបានាំយកនូវផលិតផលសម្រាប់ព្យាបាលដំបៅបង្កដោយជំងឺទឹកនោមផ្អែមសំដៅកាត់បន្ថយជាអតិបរមានូវអត្រាប្រឈមខ្ពស់ទៅនឹងកាត់អវយវៈ។ ការនាំយកនូវលទ្ធផលដ៏សំខាន់នេះនិងត្រូវមានការបណ្ដុះបណ្ដាលជាពិសេសលើបច្ចេកទេសនៃការប្រើប្រាស់ឱសថនេះពីអ្នកជំនាញនៃប្រទេសគុយបាផងដែរ។

ជាមួយគ្នានេះដែរភាគីគុយបានឹងបំពេញទស្សនកិច្ចផ្លាស់ប្ដូរបទពិសោធន៍មកកាន់ប្រទេសកម្ពុជានាអំឡុងឆ្នាំ២០២៣ ខាងមុខដើម្បីស្វែងរកឱកាសធ្វើកិច្ចសហប្រតិបត្តិការថ្មីៗបន្ថែមទៀតស្របតាមអនុសាសន៍អនុស្សរណៈនៃការយោគយល់គ្នាដែលមានជាធរមាន។ទន្ទឹមនឹងនេះភាគីគុយបានឹងធ្វើការជាមួយភាគីពាក់ព័ន្ធក្នុងការបន្តសុពលភាពបញ្ជីការឱសថនិងវ៉ាក់សាំងដែលធ្លាប់បានចរាចរណ៍នៅកម្ពុជាព្រមទាំងបន្តជំរុញការនាំយកឱសថវ៉ាក់សាំងឬសម្ភារៈបរិក្ខាពេទ្យរបស់គុបាទៅកម្ពុជាផងដែរ។

លោកស្រីបានបន្ថែមថា ភាគីគុយបានឹងជំរុញពង្រឹងកិច្ចសហប្រតិបត្តិការលើធុរកិច្ចឱសថដោយភាគីកម្ពុជានឹងជួយ​ណែនាំដៃគូនៅកម្ពុជាដើម្បីសហការ។ភាគីគុយបាបានឯកភាពលើចំណុចទាំង ៥ ខាងលើហើយការងារទៅនឹងអាច​ចាប់ផ្ដើម​អនុវត្ត​ពីឆ្នាំ២០២៣តទៅដោយ​ភាគីកម្ពុជាត្រូវបញ្ជាក់ឱ្យបានច្បាស់លាស់ជាផ្លូវការនិងជាលាយលក្ខណ៍​អក្សរអំពីតម្រូវការខាងលើតាមយន្តការកាទួត។

គួរបញ្ជាក់ថានៅក្នុងដំណើរទស្សកិច្ចនោះលោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេស (គវក-១៩)បានជួបពិភាក្សា​ការងារជាមួយ លោក Jose Angel Portel Miranda រដ្ឋមន្ត្រីក្រសួងសុខភាពសាធារណៈគុយបានហើយ

គណៈប្រតិភូក្រសួងសុខាភិបាលកម្ពុជា បានទៅធ្វើទស្សនកិច្ចសិក្សានៅមជ្ឈមណ្ឌលត្រួតពិនិត្យឱសថ រោងចក្រផលិត​វ៉ាក់​សាំង រោងចក្រផលិតឱសថ ជាពិសេសឱសថព្យាបាលជំងឺមហារីក និងទឹកនោមផ្អែម មន្ទីរពេទ្យ និងមជ្ឈមណ្ឌល​ព្យាបាលជំងឺ មហារីកជាតិគុយបា។

លើសពីនេះគណប្រតិភូក៏បានពិនិត្យ ស្វែងយល់ និងពិភាក្សាអំពីការងារផ្តល់សេវាសុខភាពបឋម និងការផ្គត់ផ្គង់ឱស​ថដល់​ឱសថស្ថាន និងដល់អ្នកជំងឺនៅក្នុងសហគមន៍នៃប្រទេសគុយបា៕

សំអឿន