អ្នកឧកញ៉ា គួច ម៉េងលី ដាស់តឿនអាណាព្យាបាល​ឱ្យតាមដានកូន ចៀសវាងលង់ខ្លួនតាមមិត្តភក្តិធ្វើរឿងមិនល្អ

អាណាព្យាបាល គួរកុំបណ្តោយកូនចៅខ្លាំងពេក ហើយយុវវ័យ ក៏កុំបណ្តែតបណ្តោយខ្លួន តាមភាពឡូយឆាយនៃសង្គម និងការអូសទាញរបស់មិត្តភក្តិ ព្រោះកត្តាតិចតួចខ្លះ ជាដើមហេតុនៃការបំផ្លាញទាំងការសិក្សា និងបង្កផលប៉ះពាល់ដល់សុខភាព។ កាលណាមានបញ្ហាសុខភាពកើតឡើង នឹងនាំឱ្យប៉ះពាល់ដល់ទាំងសេដ្ឋកិច្ចគ្រួសារ និងសុខភាពផ្លូវចិត្ត។
អ្នកឧកញ៉ា គួច ម៉េងលី អគ្គនាយកប្រតិបត្តិនៃក្រុមហ៊ុន ម៉េងលី ជេ.គួច អេឌ្យូខេសិន មានប្រសាសន៍បែបនេះ នៅក្នុងកិច្ចពិភាក្សា ស្តីពី ការរៀបចំផែនការ និងការអនុវត្តដើម្បីឈានទៅសម្រេចជោគជ័យ ដែលរៀបចំឡើងដោយ កម្ពុជាថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាសារដាស់តឿនដល់អាណាព្យាបាល ពិសេសយុវវ័យ អ្នកឧកញ៉ា គួច ម៉េងលី ក្នុងនាមជាអគ្គនាយកប្រតិបត្តិ និងជាអ្នកជំនាញ​ផ្នែកសុខភាព​មួយរូបដែរ មានប្រសាសន៍ណែនាំយុវវ័យ គិតគូរពីបញ្ហាអនាគតខ្លួនឯង ឱ្យបានវែងឆ្ងាយ ពិសេស​ការសេពគប់មនុស្សនៅក្នុងសង្គម និងការប្រព្រឹត្តរបស់ខ្លួន ហើយត្រូវយកចិត្តទុកដាក់លើសុខភាពជាចម្បង។

លោកលើកឡើងបែបនេះ ដោយសារតែសង្កេតឃើញថា យុវជនកម្ពុជាបច្ចុប្បន្ន ហាក់មិនសូវគិតគូរពីដើមចម នៃបញ្ហាសុខភាពនោះឡើយ អ្នកខ្លះ ចូលចិត្តជួបជុំផឹកសុីក្អាកក្អាយ ខ្លះក៏នាំគ្នាជក់បារីអេឡិចត្រូនិក និងទទួលទានអាហារ ដែលបង្កគ្រោះថ្នាក់ដល់សុខភាពជាដើម។ លោកថា “ជក់បារីអេឡិចត្រូនិក ១ដើម ស្មើនឹងជក់បារី ២០ដើម”។

បើយោងតាមការជួបពិគ្រោះបញ្ហាសុខភាពកន្លងមក លោកអះអាងថា រាល់ថ្ងៃនេះ ពីអាយុ ៣៥-៤៥ មកពិនិត្យសុខភាព គឺសុទ្ធតែមានបញ្ហាសុខភាពទាំងអស់ បើមិនទាន់ស្ថិតក្នុងកម្រិតបញ្ហាចោទទេ ក៏ត្រៀមនឹងចូលជាបញ្ហានៃបញ្ហាបេះដូង ជំងឺទឹកនោមផ្អែម ក៏ជំងឺថ្លើមដែរ។

ហេតុនេះ លោកបង្ហាញក្តីព្រួយបារម្ភ ចំពោះអ្នកដែលចូលចិត្តទទួលទានអាហារ និងភេសជ្ជៈគ្រឿងស្រវឹង-ផ្អែម អាចនឹងប្រឈមគ្រោះថ្នាក់ធ្ងន់ធ្ងរដល់សុខភាព កាន់តែបន្តកើនឡើង។
លោកថា “បើមិនរៀនទប់ស្កាត់ ហើយមិនភ្ញាក់ខ្លួនពីឥលូវទេ នោះនឹងធ្លាក់ខ្លួនក្នុងឱកាសនៃជំងឺស្លាប់មួយចំហៀងខ្លួ​ន ដាច់សសៃ ឈាមខួរក្បាល ឬទឹកនោមផ្អែម ដូចនេះត្រូវរៀនថែសុខភាពពីឥលូវទៅ”៕