សម្ដេច ស ខេង ៖ សង្គមស៊ីវិល ស្នើសុំវិសោធនកម្មមាត្រាចំនួន ១៦ ក្នុងច្បាប់ ស្តីពី សមាគម និងអង្គការមិនមែនរដ្ឋាភិបាល

រដ្ឋមន្ត្រីក្រសួងមហាផ្ទៃ បានឲ្យដឹងថា ក្រុមអង្គការសង្គមស៊ីវិល បានស្នើសុំឲ្យមានការធ្វើវិសោធនកម្មមាត្រាចំនួន ១៦មាត្រា នៅក្នុងច្បាប់ ស្តីពី សមាគម និងអង្គការមិនមែនរដ្ឋាភិបាល តែមកដល់ពេលនេះ បានស្រុះស្រួលគ្នាចំនួន ៩មាត្រាហើយ។

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍ប្រាប់ក្រុមអ្នកសារព័ត៌មាន បន្ទាប់ពីអញ្ជើញបើកវេទិកា ស្ដីពី ភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល លើកទី ៥ នៅថ្ងៃទី ១០ ខែមករានេះថា កិច្ចសហការរវាងក្រសួងមហាផ្ទៃ និងអង្គការសង្គមស៊ីវិល បានប្រព្រឹត្តទៅដោយល្អ ដោយភាគីទាំងពីរតែងតែជួបប្រជុំពិភាក្សាគ្នា អំពីលទ្ធផលការងារដែលសម្រេចបានកន្លងមក និងពិនិត្យមើលលើបញ្ហាប្រឈមនានា។

សម្ដេចក្រឡាហោម ស ខេង បានឲ្យដឹងថា នេះជាលើកទី ៥ ដែលមានការរៀបចំវេទិកា ស្ដីពី ភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល ហើយប្រសិនបើគ្មានការឆ្លងរាលដាលជំងឺកូវីដ-១៩ទេនោះ វេទិកានេះអាចនឹងត្រូវរៀបចំបានច្រើនជាងនេះទៅទៀត។

បើតាមសម្ដេចរដ្ឋមន្ត្រីក្រសួងមហាផ្ទៃ មានមាត្រាចំនួន ១៦មាត្រា នៅក្នុងច្បាប់ ស្តីពី សមាគម និងអង្គការមិនមែនរដ្ឋាភិបាល ត្រូវបានអង្គការសង្គមស៊ីវិល ស្នើសុំធ្វើវិសោធនកម្ម ហើយមកដល់ពេលនេះ មានការស្រុះស្រួលគ្នាចំនួន ៩មាត្រាហើយ។

សម្ដេចក្រឡាហោម ស ខេង បានឲ្យដឹងយ៉ាងដូច្នេះថា «ចំណុចសំខាន់ ដែលនូវប្រឈមនៅឡើយ ​គឺថាមានមាត្រាចំនួន ១៦ មាត្រា ដែលអង្គការសង្គមស៊ីវិលហ្នឹង សុំធ្វើវិសោធនកម្ម សុំកែ ប៉ុន្តែឆ្លងតាមការជជែកពិភាក្សា ដែលភាគីរដ្ឋាភិបាលដឹកនាំដោយឯកឧត្ដម ប៊ុន ហុន យើងបានស្រុះស្រួលគ្នា ៩មាត្រាហើយ នៅសល់ ៧មាត្រា ដែលខាងអង្គការសង្គមស៊ីវិលហ្នឹង គឺសុំយកទៅគិតពិចារណាផ្ទៃក្នុងរបស់គាត់»។

សម្ដេចឧបនាយករដ្ឋមន្ត្រី បានឲ្យដឹងទៀតថា ទាំងភាគីរដ្ឋាភិបាល និងភាគីអង្គការសង្គមស៊ីវិល បាននិងកំពុងពង្រឹងទឡ្ហី​ករណ៍ ពាក់ព័ន្ធនឹងការធ្វើវិសោធនកម្មមាត្រាមួយចំនួន​ នៃច្បាប់ ស្តីពី សមាគម និង​អង្គការមិនមែនរដ្ឋាភិបាល។ តែយ៉ាងណាក៏ដោយ បើតាមសម្ដេចក្រឡាហោម ស ខេង សង្ឃឹមថា ភាគីរដ្ឋាភិបាល និងភាគីអង្គការសង្គមស៊ីវិល នឹងមានការឯកភាពគ្នាឆាប់ៗ ទៅលើវិសោធកម្មមាត្រាមួយចំនួន​ នៃច្បាប់ ស្តីពី សមាគម និង​អង្គការមិនមែនរដ្ឋាភិបាលនេះ៕