រយៈពេល៣ថ្ងៃ ចាប់ពីថ្ងៃទី២១ ដល់ថ្ងៃទី២៣ ខែមករា ឆ្នាំ២០២៣ ពោលគឺចំថ្ងៃពិធីបុណ្យចូលឆ្នាំចិន-វៀតណាម  ខេត្តរតនគិរី ទទួលបានភ្ញៀវទេសចរជាតិ-អន្តរជាតិសរុបចំនួន ៤,២៥៥នាក់ ក្នុងនោះភ្ញៀវអន្តរជាតិមានចំនួន១៣០នាក់ ភ្ញៀវជាតិ ៤,១២៥នាក់ មានការកើនឡើង ៤.៩៨%។ នេះបើតាមរបាយការណ៍របស់មន្ទីរទេសចរណ៍ខេត្តរតនគិរី។

របាយការណ៍ដដែល បានបញ្ជាក់ថា កត្តាជំរុញឱ្យមានកំណើននៃចំនួនភ្ញៀវទេសចរនេះគឺ ដោយសារប្រទេសកម្ពុជា មានសុខសន្តិភាពពេញលេញ ប្រជាពរដ្ឋខ្មែរមានជីវភាពសមរ្យ មានលទ្ធភាព អាចធ្វើដំណើរកម្សាន្តមកពីតាម​បណ្តាខេត្តនានា ចូលមកខេត្តរតនគិរី នៅក្នុងឱកាសចូលឆ្នាំចិន-វៀតណាមនេះ។ ជាមួយគ្នានេះ អាជ្ញាធរ​ខេត្តក៏បានរៀបចំឱ្យមានកន្លែងសប្បាយច្រើន និងតុបតែងភ្លើងលម្អក្រុងបានស្រស់ស្អាតផងដែរ។

បើតាមមន្ទីរទេសចរណ៍ខេត្តរតនគិរី សម្រាប់សន្តិសុខសណ្ឋាប់ធ្នាប់សមត្ថកិច្ចការពារយ៉ាងយកចិត្តទុកដាក់បំផុត មិនមានបញ្ហាអ្វីកើតឡើងនោះទេ។ រីឯតម្លៃសេវាផ្សេងៗ ដូចជាសណ្ឋាគារ ម្ហូបអាហារក៏ពុំមានការឡើងថ្លែហួសហេតុដែរ ដោយសារក្រុមមន្រ្តីជំនាញបានចុះទៅផ្សព្វផ្សាយណែនំាដល់អាជីវករទាំងអស់ មិនឱ្យដំឡើងថ្លៃជាប្រចាំ៕