Connect with us

ព័ត៌មានជាតិ

ខេត្ត​បាត់ដំបង​គ្រោង​បង្កើត App អាច​ពលរដ្ឋ​ដឹង​ម៉ោង​ពេល​ឡាន​មក​ប្រមូលសំរាម

បានផុស

នៅ

បើ​តាម​ការ​បញ្ជាក់​ពី​អភិបាល​ខេត្ត​បាត់ដំបង ឆាប់ៗ​នេះ​រដ្ឋបាល​ខេត្ត​គ្រោង​បង្កើត App ដើម្បី​គ្រប់គ្រង​ការ​ប្រមូល​សំរាម​ឲ្យ​កាន់តែ​មាន​ប្រសិទ្ធភាព។

លោក សុខ លូ អភិបាល​ខេត្ត​បាត់ដំបង​លើក​ឡើង​នៅ​ក្នុង​សន្និសីទ​ជោគជ័យ​រយៈពេល ៥ ឆ្នាំ​របស់​រដ្ឋបាល​ខេត្ត​ថា បញ្ហា​សំរាម​ជា​រឿង​ស្មុគស្មាញ ដែល​ត្រូវ​ដោះស្រាយ​ជា​បន្ទាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រាន់​តែ​ក្រុង​បាត់ដំបង​ មួយ​ថ្ងៃ​មាន​សំរាម​ជាង ៣០០ តោន។ លោកបញ្ជាក់​​ថា រឿង​សំរាម​ក្នុង​ក្រុង​បាត់ដំបង កន្លងទៅ​មាន​ការ​ចោទ​គ្នា​ទៅ​វិញ​ទៅ​មក​រវាង​ក្រុមហ៊ុន​ប្រមូល​សំរាម​និង​ពលរដ្ឋ​ដូច​រឿង​មេមាន់​និង​កូន​មាន់។ ពលរដ្ឋ​ចោទ​ក្រុមហ៊ុន​យឺតយ៉ាវ​មិន​មក​ប្រមូល​សំរាម​ឲ្យបានទាន់ពេល ហើយ​ក្រុមហ៊ុន​ឆ្លើយតប​មក​ពី​ពលរដ្ឋ​មិន​បង់​ថ្លៃ​សំរាម។

«តើ​មាន​បង​ប្អូននៅក្រុង​បាត់ដំបង​​ប៉ុន្មាន​ភាគរយ​បាន​បង់​​ថ្លៃ​សំរាម។ តាម​លោក​ដឹង មាន​មិន​ដល់ ៥០​ភាគរយ​ទេ។ បើ​យើង​មិន​បង់​ថ្លៃ​សំរាម​ ក្រុមហ៊ុន​មាន​លុយ​ឯណា​ទៅ​ទិញ​ឡាន​ថ្មី បើក​ប្រាក់​ខែ​ដល់​បុគ្គលិកប្រមូលសំរាម។ បញ្ហា​ហ្នឹង​ដូច​រឿង​ពង​មាន់​និង​មេ​មាន់​អ្នក​ណា​កើត​មុន»។

លោក​ទទួល​ស្គាល់​ថា ពិត​ជា​មានភាព​​យឺតយ៉ាវ​ខ្លះរបស់ក្រុមហ៊ុន​ប្រមូល​សំរាម​​ តែ​ពលរដ្ឋ​ក៏​ត្រូវ​មានទំនួលខុសត្រូវ​និង​កាតព្វកិច្ច​បង់ថ្លៃ​សេវា​ប្រមូល​សំរាម​វិញ​ដែរ។

លោក​អភិបាល​ខេត្ត​បញ្ជាក់​ថា បញ្ហា​សំរាម​កន្លងទៅ​អាជ្ញាធរ​ខេត្ត​​ដោះស្រាយ​បាន​ច្រើនហើយ ​នៅសល់​តិច​តួច​ប៉ុណ្ណោះ។ បច្ចុប្បន្ន​រដ្ឋបាល​ខេត្ត​នៅ​តែ​ជួយ​ជ្រោមជ្រែង​យ៉ាង​ពេញទំហឹង ហើយ​ឆាប់ៗ​នេះ​ក៏​នឹង​បង្កើត App ដើម្បី​គ្រប់គ្រង​ការ​ប្រមូល​សំរាម ដោយ​ពលរដ្ឋ​អាច​តាមដានពេល​វេលា​​ឡាន​មកប្រមូល​​សំរាម ហើយ​តាម​ App នេះ​ ក៏អាច​ដឹង​ថា​មាន​បង​ប្អូន​ពលរដ្ឋ​ណា​ខ្លះ​មិនបាន​​បង់ថ្លៃសេវា​ប្រមូល​សំរាម។

ពាក់ព័ន្ធ​បញ្ហា​សំរាម​នេះ​ដែរ លោកក្រើន​រំលឹក​​ឲ្យ​ពលរដ្ឋ​​ភ្ញាក់​រលឹកចូលរួម​​ទុកដាក់​សំរាម​ឲ្យ​បាន​ត្រឹម​ត្រូវ​ យកទៅ​ចោល​ទៅ​តាម​កន្លែង​ដែល​បាន​កំណត់ ខណៈ​អាជ្ញាធរ​ក៏​បាន​បង្កើត​ឲ្យ​មាន​កន្លែង​ស្តុក​សំរាម ដើម្បី​ចៀសវាង​ការ​ចោល​ឥត​សណ្ដាប់ធ្នាប់។ ​លោក​មើលឃើញ​ថា​ បញ្ហា​សំរាម​នេះ​មាន​បង​ប្អូន​ខ្លះខ្វះ​មារយាទ ហូប​កន្លែង​ណា​បោះ​ចោល​កន្លែង​ហ្នឹង​ក៏​មាន។

គួរ​បញ្ជាក់​ថា អាជ្ញាធរខេត្ត​បាត់ដំបង​ កំពុង​សាងសង់​ទីលានកប់​សំរាម (​ចាក់សំរាម​) ថ្មី​មួយលើ​ផ្ទៃដី ២១ ហិកតា​ នៅ​ក្នុង​ភូមិ​ពយ​ស្វាយ ឃុំ​តា​គ្រៀង ស្រុក​បាណន់​ ដែលមាន​ចំងាយ ២៥ គីឡូម៉ែត្រ​ ពី​ក្រុង​បាត់ដំបង។ ទីលាន​ចាក់សំរាម​ថ្មី​លក្ខណៈស្តង់ដានេះ មិន​បង្ក​ការ​ប៉ះពាល់​ដល់​បរិស្ថាន មានសមត្ថភាព​ញែកសំរាម​ធ្វើ​ទៅជាជីកំប៉ុស្តិ និង​ដែល​អាច​ទាញ​យក​ជា​ប្រភព​ភ្លើង​អគ្គិសនី​ប្រើប្រាស់​ទៀត​ផង៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

កីឡា៦ ថ្ងៃ មុន

ឈ្នះខ្សែក្រវាត់ថ្ងៃជាមួយ​ ឈឿង ល្វៃ កីឡាករ Erdene ក៏មានរថយន្តទទួល

ព័ត៌មានជាតិ៤ ថ្ងៃ មុន

ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅ​តែរឹងទទឹងមិនព្រមវាយកម្ទេចរបងចេញ

សន្តិសុខសង្គម៧ ថ្ងៃ មុន

ដកហូតមុខតំណែង មេបញ្ជាការរងស្រុកស្វាយជ្រុំ​៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ

ព័ត៌មានជាតិ៥ ថ្ងៃ មុន

ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល

ព័ត៌មានអន្ដរជាតិ៤ ថ្ងៃ មុន

អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ

Sokha Hotels

ព័ត៌មានពេញនិយម