យុទ្ធនាការ “មួយរយកោដិសំឡេង” វិលត្រឡប់មកវិញហើយនៅចុងសប្តាហ៍នេះ!

យុទ្ធនាការ “មួយរយកោដិសំឡេង” នឹងធ្វើឡើងនៅថ្ងៃទី២៦ ខែកុម្ភៈ ឆ្នាំ២០២៣ ចាប់ពីម៉ោង២រសៀល ដល់ម៉ោង៧:៣០យប់នៅ Coconut Park កោះពេជ្រ។ យុទ្ធនាការនេះ ប្រារព្ធឡើងដើម្បីលុបបំបាត់រាល់អំពើហិង្សាលើស្ត្រី និងក្មេងស្រី តាមរយៈការបង្ហាញការរាំបទ Break the Chain ហើយមានជិត២០០ប្រទេសបានធ្វើយុទ្ធនាការនេះនៅក្នុងខែកុម្ភៈ បូករួមទាំងកម្ពុជាផងដែរ។

កម្ពុជាបានធ្វើយុទ្ធនាការ “មួយរយកោដិសំឡេង”  តាំងពីឆ្នាំ២០១៣មកម្ល៉េះដោយអង្គការយេនឌ័រ និងអភិវឌ្ឍន៍ ដើម្បីកម្ពុជា (GADC) ដែលនៅតាមទីកន្លែងសាធារណៈផ្សេងៗក្នុងប្រទេសកម្ពុជាមានសកម្មភាពរាំជាស្នូល ដើម្បីបញ្ឈប់អំពើហិង្សាលើស្រ្តី និងក្មេងស្រី (ទាំងអ្នកមានភេទជាស្ត្រីពីកំណើត អ្នកប្តូរយេនឌ័រ និងអ្នកមិនកំណត់អត្តសញ្ញាណយេនឌ័រ) ព្រមទាំងបង្ហាញពីភាពរឹងមាំរបស់ស្ត្រី និងបញ្ឈប់អំពើហិង្សាលើស្រ្តី និងក្មេងស្រី។ សម្រាប់ឆ្នាំ២០២៣នេះ គឺជាឆ្នាំទី១០ហើយ ដែលកម្ពុជាបានរៀបចំយុទ្ធនាការនេះឡើងមក។

បន្ទាប់ពីមានភាពធូរស្រាលពីជំងឺកូវីដ១៩ យុទ្ធនាការ “មួយរយកោដិសំឡេង” ឆ្នាំ២០២៣ នឹងមានវត្តមានជាថ្មីម្តងទៀតក្រោមប្រធានបទ “ក្រោកឡើងដើម្បីសេរីភាពរបស់ក្មេងស្រី និងស្រ្តីគ្រប់ចម្រុះភាព” ក្នុងគោលបំណង លើកកម្ពស់ការទទួលស្គាល់សេរីភាព ការជ្រើសរើស សិទ្ធិ និងការបញ្ចេញមតិដោយខ្លួនឯង ស្គាល់ខ្លួនេងឱ្យកាន់តែច្បាស់ ក៏ដូចជាការលើកកម្ពស់ការយល់ដឹង និងការរួបរួមក្នុងការបញ្ចប់អំពើហិង្សាលើក្រុមក្មេងស្រី និងស្រ្តី។

កម្មវិធីបានរៀបចំឡើងជា២គឺ ចូលរួមតាមប្រព័ន្ធអនឡាញផង និងចូលរួមដោយផ្ទាល់ផង។ សម្រាប់ការរៀបចំតាមប្រព័ន្ធអនឡាញ គឺធ្វើឡើងនៅលើផេកហ្វេសបុក One Billion Rising Cambodia មានជាការបង្ហោះសំណួរនៅលើគេហទំព័រហ្វេសបុក  ការប្រកួតប្រជែងគូរគំនូរតាមអនឡាញ និងសមកម្មភាពផ្សេងៗទៀតមុននឹងព្រឹត្តិការណ៍មកដល់។ សម្រាប់ថ្ងៃធ្វើយុទ្ធនាការមានសកម្មភាពដូចជា ការលេងល្បែងយករង្វាន់ កិច្ចពិភាក្សា ការសម្តែងចម្រៀង ការបង្ហាញម៉ូត​ ការរាំ ល្ខោនសម្រោល ការបញ្ជាំងរឿង និងសកម្មភាពផ្សេងៗទៀត។ ដូច្នេះ លោកអ្នកអាចចូលរួមយុទ្ធនាការនេះបានដោយសេរីនៅថ្ងៃទី២៦ ខែកុម្ភៈ ចុងសប្តាហ៍នេះ។

សូមជម្រាបថា យុទ្ធនាការ“មួយរយកោដិសំឡេង” គឺជាយុទ្ធនាការសកល និងសកម្មភាពដ៏ធំបំផុត ដើម្បីបញ្ចប់អំពើហិង្សាលើស្ត្រី ដែលត្រូវបានបង្កើតឡើងតាំងពីឆ្នាំ ២០១២ ធ្វើឡើងជារៀងរាល់ខែកុម្ភៈ ក្នុងទិវាបុណ្យនៃសេចក្តីស្រឡាញ់ដោយមានលោកស្រី Eve Ensler ជាស្ថាបនិក។ ការធ្វើយុទ្ធនាការនេះឡើង បន្ទាប់ពីស្ថិតិបានបង្ហាញថា ស្ត្រីម្នាក់ក្នុងចំណោម៣នាក់ ត្រូវបានវាយដំ និងរំលោភក្នុងជីវិតពួកគេ៕

ដោយ៖ អុន ស្រីមាន

​