លោកបណ្ឌិត​ លី ឆេង៖យុវជនត្រូវអភិវឌ្ឍន៍ចំណេះដឹង និងអនុវត្តជាក់ស្ដែង ដើម្បីឲ្យទាន់សម័យ​ឌីជីថល

លោកបណ្ឌិត លី ឆេង តំណាងរាស្ត្រមណ្ឌលរាជធានីភ្នំពេញ និងជាអគ្គនាយកក្រុមហ៊ុន ប៊ែលធី គ្រុប បានណែនាំដល់សិស្សានុសិស្សទាំងអស់ គប្បីខិតខំប្រឹងប្រែងអភិវឌ្ឍន៍ចំណេះដឹងដោយខ្លួនឯង ហើយមានការអនុវត្តជាក់ស្ដែង ដើម្បីដើរឲ្យទាន់សម័យឌីជីថល។ការណែនាំបែបនេះរបស់លោកបណ្ឌិត លី ឆេង ក្នុងពិធីប្រគល់សញ្ញាបត្រមធ្យមសិក្សាបឋមភូមិដល់សិស្សប៊ែលធី ថ្នាក់ទី៩ ជំនាន់ទី១៧ សម្រាប់ឆ្នាំសិក្សា២០២១-២០២២ ចំនួន៣ ១៣២នាក់ នៅសាលសន្និសីទនៃសាកលវិទ្យាល័យ ប៊ែលធី អន្តរជាតិទី២​ (ស្ពានអាកាសចោមចៅ) នាព្រឹកថ្ងៃទី២៥ ខែកុម្ភៈ ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសនោះ លោកបណ្ឌិត លី ឆេង បានថ្លែងអបអរសាទរ និងកោតសរសើរចំពោះសិស្សានុសិស្សទាំងអស់ដែលបានខិតខំយកចិត្តទុកដាក់ប្រឹងប្រែងសិក្សារៀនសូត្រ គោរពបទបញ្ជា មានវិន័យ សីលធម៌ និងគុណធម៌ល្អ។ ត្រង់ន័យនេះ លោកបណ្ឌិត បានថ្លែងថា ការចេះគោរពបទបញ្ជា មានវិន័យ និងសីលធម៌ល្អ គឺជាឥរិយាបទដ៏ប្រពៃ ដែលមិនបង្ក ផលលំបាកផ្សេងៗដល់គ្រួសារ និងសង្គមជាតិ រហូតទទួលបានជោគជ័យប្រឡងជាប់សញ្ញាបត្រមធ្យមសិក្សាបឋមភូមិ (ឌីប្លូម) នាពេលនេះ។

លោកបណ្ឌិត លី ឆេង ក៏បានផ្តាំផ្ញើដល់សិស្សានុសិស្សទាំងអស់ឲ្យខិតខំយកចិត្តទុកដាក់បន្តការសិក្សារៀនសូត្របន្ថែមទៀតនៅថ្នាក់ទី១០ ទី១១ និងទី១២ ដើម្បីប្រឡងជាប់សញ្ញាបត្រមធ្យមសិក្សាទុតិយភូមិ និងទទួលបាននិទ្ទេសល្អ ហើយអាចបន្តទៅសិក្សានៅថ្នាក់ឧត្តមសិក្សាឲ្យបានគ្រប់ៗគ្នា។ ទន្ទឹមនេះដែរ លោកបណ្ឌិត ក៏បានថ្លែងអំណរគុណចំពោះមាតាបិតា អាណាព្យាបាលទាំងអស់ ដែលតែងតែគាំទ្រ និងបញ្ជូនបុត្រធីតារបស់ខ្លួនមកសិក្សានៅតាមបណ្តាសាខានៃសាលា ប៊ែលធី អន្តរជាតិ។

បើតាមលោក ប៊ុត ឌីម៉ង់ ប្រធានការិយាល័យចំណេះទូទៅ ក្នុងឆ្នាំសិក្សា២០២១-២០២២នេះ សាលា ប៊ែលធី អន្តរជាតិ មានសិស្សថ្នាក់ទី​៩ ដែលបានប្រឡងបញ្ចប់សញ្ញាបត្រមធ្យមសិក្សាបឋមភូមិ (ឌីប្លូម) ចំនួន ៣ ១៥៥នាក់ ដែលក្នុងនោះ ប្រឡងជាប់ ៣ ១៣២នាក់ ស្មើនឹង ៩៩.២៧%។ សិស្សដែលបានប្រឡងជាប់សញ្ញាបត្រមធ្យមសិក្សាបឋមភូមិទាំងអស់នឹងទទួលបានសញ្ញាបត្រពីរ ហើយសញ្ញាបត្រទាំងពីរនេះត្រូវបានដាក់បញ្ចូលទៅក្នុងវែបសាយរបស់ប៊ែលធី ដើម្បីទុកជាកាលប្បវត្តិសម្រាប់សិស្សគ្រប់រូបទាញយកប្រើប្រាស់ជាផ្លូវការផងដែរ៕