អាជ្ញាធរខេត្តស្វាយរៀង ចុះផ្សព្វផ្សាយ ស.ជ.ណ របស់រដ្ឋបាលខេត្តដល់ប្រជាពលរដ្ឋ

លោក ម៉ែន អេង អភិបាលរងខេត្តស្វាយរៀងនៅព្រឹកថ្ងៃទី ២៦ ខែកុម្ភៈ បានចុះផ្សព្វផ្សាយ ស.ជ.ណ របស់រដ្ឋបាលខេត្តដល់ប្រជាពលរដ្ឋដែលបានចូលកាប់រាន ឈូសឆាយ ហ៊ុមព័ទ្ធរបង និងដាំដំណាំអាស្រ័យផលលើដីរបស់ស្ថានីយផ្សព្វផ្សាយ និងស្ដារព្រៃឈើក្រសាំង ស្ថិតក្នុងស្រុករមាសហែក ខេត្តស្វាយរៀង ដែលនាពេលកន្លងមក ទីតាំងដីព្រៃត្រូវបានប្រជាពលរដ្ឋចុះកាប់រុករាន ដាំចេក និងសង់តូបនៅលើដីព្រៃកូនឈើរបស់រដ្ឋ ព្រមទាំងបានមករារាំងគ្រឿងចក្ររបស់ក្រុមហ៊ុន ក្នុងការឈូសឆាយព្រៃដាំកូនឈើឡើងវិញ ក្នុងភូមិសាស្ត្រខាងជើងភូមិបុស្ស ឃុំត្រស់ និងឃុំអណ្តូងត្របែក ស្រុករមាសហែក។

ពិធីនេះក៏មានការចូលរួមផងដែរពីសំណាក់លោកប្រធានមន្ទីរកសិកម្មរុក្ខាប្រម៉ាញ់ និងនេសាទខេត្ត លោកអភិបាល-អភិបាលរងស្រុក រួមនឹងមន្ត្រីដែលមានការពាក់ព័ន្ធជាច្រើនរូបទៀតផងដែរ។

ក្នុងឱកាសនោះលោក ម៉ែន អេង អភិបាលរងខេត្តស្វាយរៀង ក៏បានលើកពីហេតុផលដល់ប្រជាពលរដ្ឋដើម្បីឲ្យពួកគាត់យល់ពីច្បាប់នៃការកាន់កាប់ប្រើប្រាស់ដីធ្លីពីព្រោះថាបើយើងមិនគោរពច្បាប់ទេគឺត្រូវប្រឈមទៅនិងការអនុវត្តច្បាប់ដោយបង្ខំដើម្បីកុំឲ្យមានភាពអនាធិបតេយ្យដូច្នេះបន្តទៅទៀត។

លោកអភិបាលរងខេត្តបានបន្តថា ទោះបីជាយ៉ាងណាក៏ដោយអាជ្ញាធរគ្រប់លំដាប់ថ្នាក់ត្រូវព្យាយាមដោះស្រាយបញ្ហាដីធ្លីនេះជាលក្ខណ:ក្រៅប្រព័ន្ធតុលាការឲ្យអស់លទ្ធភាព។

ចំពោះថ្ងៃនេះក្នុងនាមរដ្ឋបាលខេត្តលោកសូមប្រកាសនូវសេចក្តីសម្រេចលេខ០២៨/២៣ ស.ជ.ណ ចុះថ្ងៃទី ២៤ ខែកុម្ភ: ឆ្នាំ២០២៣ ស្ដីពីការបញ្ឈប់ការកាប់រាន ឈូសឆាយ ហ៊ុមព័ទ្ធរបង និងដាំដំណាំអាស្រ័យផលលើដីរបស់ស្ថានីយ៍ផ្សព្វផ្សាយ និងស្ដារព្រៃឈើក្រសាំង ស្ថិតក្នុងស្រុករមាសហែក ខេត្តស្វាយរៀង យោងសេចក្តីសម្រេចលេខ ០២៦ គជដព ថ្ងៃទី៨ ខែធ្នូ ឆ្នាំ២០២១ របស់គណៈកម្មាធិការជាតិដើម្បីទប់ស្កាត់លុបបំបាត់ និងបង្ក្រាបការកាប់រាន ដុត ឈូសឆាយនិងហ៊ុព័ន្ធដីព្រៃឈើ ដើម្បីវាត យកដីធ្វើជាកម្មសិទ្ធិ និងរបាយការណ៍លេខ ០១៦/២៣ របក ចុះថ្ងៃទី១៤ ខែកុម្ភៈឆ្នាំ២០២៣ របស់មន្ទីរកសិកម្មរុក្ខាប្រមាញ់និងនេសាទខេត្ត ជ្រាបថា ទីតាំងដីស្ថានីយ៍ផ្សព្វផ្សាយនិងស្ដារព្រៃឈើក្រសាំងគឺជាដីសាធារណៈរបស់រដ្ឋស្ថិតក្រោមការគ្រប់គ្រងរបស់ខណ្ឌរដ្ឋបាលព្រៃឈើស្វាយរៀង ចំពោះសកម្មភាពនៃការចូលកាប់រាន ឈូសឆាយហ៊ុព័ទ្ធរបងនិងដាំដំណាំអាស្រ័យផលលើដីខាងលើនេះគឺជាការចូលកាន់កាប់ដីរដ្ឋដោយខុសច្បាប់ដែលអាចនឹងត្រូវទទួលទោសដូចមានចែងកំណត់នៅក្នុងច្បាប់ភូមិបាលច្បាប់ស្ដីពីព្រៃឈើនិងច្បាប់ជាធរមានផ្សេងៗទៀត។

ដើម្បីចៀសវាងការប្រឈមទោសទណ្ឌតាមផ្លូវច្បាប់និងដើម្បីចូលរួមថែរក្សាការពារដីរដ្ឋសម្រាប់បម្រើផលប្រយោជន៍សាធារណៈរដ្ឋបាលខេត្តស្វាយរៀង សូមឲ្យបងប្អូនប្រជាពលរដ្ឋបញ្ឈប់សកម្មភាពទាំងឡាយដោយត្រូវធ្វើការរុះរើរបង និងចាកចេញពីទីតាំងដីខាងលើក្នុងរយៈពេល ៧ថ្ងៃ ចាប់ពីថ្ងៃជូនដំណឹងនេះតទៅ។

ក្នុងករណីផុតថ្ងៃកំណត់បងប្អូនមិនទាន់រើរបង និងចាកចេញពីទីតាំងដីខាងលើ រដ្ឋបាលខេត្តស្វាយរៀង និងចាត់វិធានការរដ្ឋបាលចុះធ្វើការរុះរើដោយមិនទទួលខុសត្រូវលើការខូចខាត ឬបាត់បង់ទ្រព្យសម្បត្តិរបស់បងប្អូនឡើយ៕

អត្ថបទ៖ ភក្ដី