មន្ត្រីជាន់ខ្ពស់សុខាភិបាល៖ កំណើនផ្តល់ឈាម​ច្រើន អាចទប់ស្កាត់​ការជួញដូរឈាម

មន្ត្រីជាន់ខ្ពស់ក្រសួងសុខាភិបាល បានជំរុញដល់ប្រជាពលរដ្ឋបង្កើនការចូលរួមផ្តល់ឈាមដោយស្ម័គ្រចិត្ត និងមិនគិតកម្រៃឱ្យបានច្រើនបន្ថែមទៀត ដើម្បីទប់ស្កាត់ការជួញដូរឈាមក៏ដូចជាការបូមឈាមជំនួសពី​សំណាក់ក្រុមគ្រួសារ និងសាច់ញាតអ្នកជំងឺ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកម្មវិធីបរិច្ឆាគឈាមដោយស្ម័គ្រចិត្តទូទាំងប្រទេស ដើម្បីជួយសង្រ្គោះដល់ជីវិតមនុស្សនៅធនាគារអេស៊ីលីដា នៅព្រឹថ្ងៃទី០៦មីនា លោកស្រី វេជ្ជបណ្ឌិត មើក សាមាន អនុប្រធានមជ្ឈមណ្ឌលជាតិឈាមបានមានប្រសាសន៍ថា រហូតមកដល់ពេលនេះតម្រូវការឈាមមានប្រមាណ១ភាគរយនៃចំនួនប្រជាពលរដ្ឋនៅទូទាំងប្រទេស។ មានន័យថា ប្រជាជនកម្ពុជា មាន១៧លាននាក់ ដូចនេះសេចក្តីត្រូវការឈាមមានប្រមាណ១៧ម៉ឺនប្លោកក្នុង១ឆ្នាំ។

លោកស្រី វេជ្ជបណ្ឌិត បានបន្តថា បច្ចុប្បន្ននេះការផ្តល់ឈាមដោយស្ម័គ្រចិត្តនិងមិនគិតកម្រៃមាន​ត្រឹមតែ១៥ភាគរយ​ប៉ុណ្ណោះ ខណៈការផ្តល់ឈាមដោយក្រុមគ្រួសារ និងបងប្អូនរបស់អ្នកជំងឺមានរហូតដល់៨៥ភាគរយ។

លោកស្រី វេជ្ជបណ្ឌិត បានអំពាវនាវដល់វិស័យឯកជន និងសាធារណជនទូទៅពិសេសយុវវ័យបន្តចូលរួមបង្កើន​សកម្មភាព​ផ្តល់ឈាមឱ្យបានច្រើនបន្ថែមទៀត ដើម្បីឱ្យមជ្ឈមណ្ឌលជាតិផ្តល់ឈាមអាចមានលទ្ធភាពស្តុកឈាមបាន​គ្រប់គ្រាន់។ ដោយលោក លើកឡើងថា ទាំងអស់គ្នាជារោងចក្រផលិតឈាម ដោយសារឈាមមិនមានរោងចក្រណា​ផលិតបានឡើយក្រៅតែពីមនុស្ស។

លោកស្រី វេជ្ជបណ្ឌិត បានបន្តទៀតថា« យើងទាំងអស់គ្នាត្រូវរួមគ្នាផ្តល់ឈាម ដើម្បីឱ្យមានស្តុកឈាមច្រើន​ទប់ស្កាត់ការជួញ​ដូរឈាមហើយធ្វើណាយ៉ាងកុំឱ្យឈាមមានតម្លៃសូម្បីតែ១ដុល្លារ​ប៉ុន្តែវាមានតម្លៃសង្គ្រោះអ្នក​ជំងឺបានទាន់ពេលវេលា»។

លោកស្រីវេជ្ជបណ្ឌិតបានបន្ថែមទៀតថា ការបរិច្ចាគឈាមនាំមកនូវសុខភាពល្អ និងជាអំពើបុណ្យកុសលដ៏ប្រពៃសម្រាប់​យើងជាអ្នកកាន់ព្រះពុទ្ធសាសនា។ ដូចនេះត្រូវចូលរួមបរិច្ចាគឈាមោ្យបានច្រើនទាំងអស់គ្នាដើម្បីចូលរួមចំណែកជាមួយ​រាជរដ្ឋាភិបាលក្នុងការជួយសង្គ្រោះអាយុជីវិតដល់ជនរងគ្រោះឬអ្នកជំងឺដែលជួបគ្រោះថ្នាក់ឬមានជំងឺត្រូវការឈាមជាបន្ទាន់៕

អត្ថបទ៖ សំអឿន