រដ្ឋមន្រ្តីសុខាភិបាល ជំរុញមណ្ឌលសុខភាពទួលគោក កែលម្អបន្ថែមលើអនាម័យ និង បរិស្ថាន ដើម្បីក្លាយជាមណ្ឌលសុខភាពគំរូ

លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានជំរុញមណ្ឌលសុខភាពទួលគោករាជធានីភ្នំពេញ ត្រូវធ្វើការកែលម្អបន្ថែមទៀតទៅលើអនាម័យ សណ្តាប់ធ្នាប់ និង បរិស្ថាន ឱ្យបានប្រសើរ ដើម្បីក្លាយជាមណ្ឌលសុខភាពគំរូនាពេលខាងមុខ។

នៅក្នុងឱកាសចុះពិនិត្យមណ្ឌលសុខភាពទួលគោកដោយមិនជូនដំណឹងជាមុនកាលពីថ្ងៃទី ១៦ ខែកក្កដា ឆ្នាំ ២០២៦ លោករដ្ឋមន្ត្រី បានលើកឡើងថា បន្ទាប់ពីចុះពិនិត្យការបម្រើសេវាសុខាភិបាលនៅមណ្ឌលសុខភាពទួលគោករួចមកសង្កេតឃើញថា មណ្ឌលសុខភាពនេះមានភាពល្អប្រសើរមួយចំនួន និង ត្រូវខិតខំបន្ថែមទៀត ទាំងមណ្ឌលសុខភាព និង ការិយាល័យសុខាភិបាលស្រុកប្រតិបត្តិ ក្នុងនោះ ហេដ្ឋារចនាសម្ព័ន្ធ អគារ បរិស្ថានមានលក្ខណៈសមរម្យ ការបម្រើសេវាមានលក្ខណៈមធ្យម ការពិគ្រោះ និង ពិនិត្យផ្ទៃពោះបង្គួរតាមភូមិសហគមន៍មានភាពសកម្ម។ ចំណែកអនាម័យ និង បរិស្ថានជំរុញមធ្យម និង ការរៀបចំសណ្តាប់ធ្នាប់ត្រូវការកែលម្អបន្ថែម។

លោករដ្ឋមន្ត្រី បានបន្តថា រីឯហេដ្ឋារចនាសម្ព័ន្ធ ត្រូវកែលម្អជាច្រើនទាំងអគារ ប្រព័ន្ធអគ្គិសនី បង្កើនសោភណភាពសួនបៃតង ហើយអគារត្រូវរៀបចំឱ្យបានល្អប្រសើរជាងនេះ ត្រូវរៀបចំកន្លែងទុកដាក់ឱសថបានល្អ ត្រូវយកចិត្តទុកដាក់ និង ក្រមសីលធម៌វិជ្ជាជីវៈបុគ្គលិកសុខាភិបាលសមរម្យ ឯកសណ្ឋានត្រូវមានគ្រប់ពេលវេលា ជាពិសេសក្នុងពេលបម្រើសេវា និង ត្រូវអនុវត្តឱ្យបានខ្ជាប់ខ្ជួននូវវិជ្ជាជីវៈ និង រក្សាការសម្ងាត់ ព្រោះមណ្ឌលសុខភាពមានផ្តល់សេវាប្រឹពដល់ប្រជាពលរដ្ឋ។

លោករដ្ឋមន្ត្រី បានណែនាំដល់មណ្ឌលសុខភាពទួលគោក និង ការិយាល័យសុខាភិបាលស្រុកប្រតិបត្តិ ត្រូវខិតខំបន្ថែមទៀត ដោយផ្តោតសំខាន់លើ «អភិបាលកិច្ច និង ភាពជាអ្នកដឹកនាំ»។ បន្ថែមពីនេះ មណ្ឌលសុខភាព ត្រូវរៀបចំចំណុចមិនទាន់ល្អប្រសើរ និង លើកទឹកចិត្តខិតខំប្រឹងប្រែង ក្នុងការស្វែងយល់ពីមណ្ឌលសុខភាពជ័យលាភីគំរូ ជាពិសេសមណ្ឌលសុខភាពគោកចកនៅខេត្តសៀមរាប ដែលស្ថិតក្នុងបរិបទក្រុងដូចគ្នា៕
អត្ថបទ ៖ សំអឿន