ពលរដ្ឋរួមទាំងមន្ត្រីរាជការជាច្រើនបាននាំគ្នារិះគន់កប់ៗមាត់រឿងលោក​ ឌឹម គឹមសាន្ត​ អភិបាលស្រុកព្រៃកប្បាស​ ឱ្យថៅ​កែដីឡូត៍លប់ប្រឡាយដាក់លូមានទំហ៊ំតូចក្នុងប្រឡាយមេរំដោះទឹកដែលមានទទឹង២៥ម៉ែត្រស្ថិតនៅភូមិព្រៃល្វាកើត​ ឃុំព្រៃល្វា​ ស្រុកព្រៃកប្បាស​ ខេត្តតាកែវ។

ប្រភពពីពលរដ្ឋបានឱ្យដឹងថា​ លោកអភិបាលស្រុកព្រៃកប្បាសច្រើនជំនាន់មកហើយបានទប់ស្កាត់ការដាក់លូលុបប្រឡាយ​មេរំដោះទឹកមួយនេះ ព្រោះប្រឡាមេមួយនេះមានសារៈសំខាន់ណាស់ក្នុងការំដោះទឹកឬស្តុកទឹកទុកឱ្យពលរដ្ឋប្រើប្រាស់។​ ដោយឡែកតាមប្រភពពីមន្ត្រីសាលាស្រុកព្រៃកប្បាសសុំមិនបញ្ចេញឈ្មោះបានឱ្យដឹងថា​ ថៅកែដីឡូត៍ខាងលើកំពុងបំផ្លាញហេដ្ឋារចនាសម្ពន័របស់ស្រុក ព្រោះប្រឡាយមេមួយនេះមានទទឹង២៥ម៉ែត្រនេះមិនទាន់បូកចំណីប្រឡាយ​ផង ហើយប្រឡាយនេះត្រូវធ្វើផ្លូវអមសងខាងបង្ហូរទឹកទៅដល់បឹងកំពុងចកដែលមានប្រវែងជាង៣គីឡូម៉ែត្រ។

ប្រភពដដែលបានឱ្យដឹងទៀតថា ថៅកែដីឡូខាងលើធ្លាប់សុំច្បាប់ដាក់លូលុបប្រឡាយនេះជាច្រើនដងមកហេីយ​ តែអភិបាលស្រុកចាស់ពីមុនមកមិនអនុញ្ញាត​ តែមកដល់លោក​ ឌឹម គឹមសាន្ត​ អភិបាលស្រុកថ្មី​ បែរជាត្រូវរូវគ្នាជាមួយថៅកែដីឡូត៍អនុញ្ញាតឱ្យចាក់ដីលុប​ ធ្វើឱ្យផ្អើលទាំងពលរដ្ឋ និងមន្ត្រីគ្រាក់ៗក្នុងស្រុមតែម្តង។

ជុំវិញករណីខាងលើ លោក​ ឌឹម​ គឹមសាន្ត​ អភិបាលស្រុកព្រៃកប្បាស បានទទួលស្គាល់ថា លោកពិតជាអនុញ្ញាតច្បាប់​ឱ្យថៅកែដីឡូត៍ចាក់លុបប្រឡាយដាក់លូនៅចំណុចខាងលើមែន​ ដោយផ្អែកទៅលើមន្ត្រីជំនាញចុះសិក្សាឯកភាពគ្នា។លោកអភិបាលស្រុកបញ្ជាក់ទៀតថា​ បើករណីចាក់ដីលុបប្រឡាយនេះត្រូវបានពលរដ្ឋរិះគន់លោកនឹងពិចារណាឡើងវិញ។

ពលរដ្ឋស្នើរឱ្យលោកអភិបាលស្រុកព្រៃកប្បាសកាយដី និងលូរបស់ថៅកែដីឡូត៍នេះចោលវិញ ព្រោះប្រឡាយរំដោះទឹកនេះជាប្រឡាយប្រវត្តិសាស្ត្រ និងជាប្រឡាយកំពុងទូកពីសង្គមចាស់៕​ 

អត្ថបទ៖ វីរៈ