សម្ដេចតេជោ ហ៊ុន សែន ៖ ការគាំពារសង្គមទៅលើស្ត្រីក្រីក្រដែលមានផ្ទៃពោះ គឺជាគោលនយោបាយដ៏សំខាន់មួយរបស់គណបក្សប្រជាជនកម្ពុជា

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា គណបក្សប្រជាជនកម្ពុជា នឹងបន្តគោលនយោបាយគាំពារសង្គមទៅលើស្ត្រីក្រីក្រ ដែលមានផ្ទៃពោះ។

នៅក្នុងពិធីសម្ពោធដាក់ឲ្យប្រើប្រាស់ជាផ្លូវការអគារសម្ភព ស្ថិតនៅក្នុងបរិវេណនៃមន្ទីរពេទ្យកុមារជាតិ រាជធានីភ្នំពេញ នៅព្រឹកថ្ងៃទី ២០ ខែមេសានេះ សម្ដេចតេជោ ហ៊ុន សែន មានប្រសាសន៍ថា គោលនយោបាយគាំពារសង្គមទៅលើស្ត្រីក្រីក្រ ដោយចាប់ពីពេលមានផ្ទៃបោះរហូតដល់ឆ្លងទន្លេ និងទៅដល់កូនអាយុ ២ឆ្នាំ គឺជាគោលនយោបាយដ៏សំខាន់មួយរបស់គណបក្សប្រជាជនកម្ពុជា ដែលនឹងបន្តធ្វើ។

សម្ដេចតេជោ ហ៊ុន សែន ថ្លែងបែបនេះថា «គោលនយោបាយគាំពារសង្គម ទៅលើស្ត្រីក្រីក្រដែលមានផ្ទៃពោះ ចាប់ពីពេលមានផ្ទៃពោះ រហូតទៅដល់ឆ្លងទន្លេ រហូតទៅដល់កូនអាយុពីរឆ្នាំ គឺជាគោលនយោ​បាយដ៏សំខាន់មួយរបស់គណបក្សប្រជាជនដែលនឹងបន្ត ហើយពង្រីកទំហំនៃប្រាក់ដែលត្រូវទទួលបានសម្រាប់ស្ត្រីទាំងនោះ ព្រោះវាជាបញ្ហា មនុស្សម្នាក់ជីវិតពីរនៅទីនេះៗ»៕