សម្ដេចតេជោ ហ៊ុន សែន ៖ ការតែងតាំងមន្ត្រីនៅថ្នាក់ក្រោមជាតិ បើរកបាននៅមូលដ្ឋាននោះ គឺជារឿងល្អ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា លើកឡើងថា ការតែងតាំងមន្ត្រីនៅថ្នាក់ក្រោមជាតិ ដូចជាអភិបាលរងខេត្ត អភិបាលស្រុក និងអភិបាលរងស្រុកជាដើម បើរកបាននៅមូលដ្ឋាននោះ គឺជារឿងល្អ។

ការលើកឡើងរបស់សម្ដេចតេជោ ហ៊ុន សែន​ ខាងលើនេះ បានធ្វើឡើងនៅក្នុងពិធីបិទវគ្គបណ្តុះបណ្តាលឆ្នាំ ២០២២ និងបើកវគ្គបណ្តុះបណ្តាលឆ្នាំ ២០២៣ របស់សាលាភូមិន្ទរដ្ឋបាល (ERA) នៅព្រឹកថ្ងៃទី ២៧ ខែមេសា ឆ្នាំ ២០២៣ នេះ។

សម្ដេចតេជោ ហ៊ុន សែន បានថ្លែងថា សម្ដេច តែងតែផ្ដល់អនុសាសន៍អំពីការរៀបចំការតែងតាំងមន្ត្រីនៅថ្នាក់ក្រោមជាតិ ដោយសម្ដេចលើកឡើងថា «ប្រសិនបើយើងយកមន្ត្រីនៅក្នុងមូលដ្ឋាន គឺវាល្អជាងយកមន្ត្រីទៅពីចំងាយ យើងលើបញ្ហានេះទៅចុះ ឧទាហរណ៍ថា អភិបាលខេត្ត ឬអភិបាលរងខេត្ត អភិបាលស្រុក ឬអភិបាលរងស្រុក បើរកបាននៅក្នុងខេត្តនោះ គឺវាល្អ ចៅហ្វាយខេត្តថា វាលំបាកបន្តិច ​អាចស៊េរីពីកន្លែងនេះ ទៅកន្លែងនោះ ប៉ុន្តែអភិបាលរងខេត្ត អភិបាលស្រុក អភិបាលរងស្រុក បើរើសបាននៅកន្លែងនោះ គឺល្អៗ»។

បើតាមសម្ដេចតេជោ ហ៊ុន សែន មូលហេតុដែលជ្រើសរើសមន្ត្រីថ្នាក់អភិបាលរងខេត្ត អភិបាលស្រុក និងអភិបាលរងស្រុកនៅមូលដ្ឋាននោះល្អ ព្រោះពួកគេមានលំនៅដ្ឋាននៅទីនោះ ហើយបើតែងតាំងមន្ត្រីពីមូលដ្ឋានផ្សេងវិញ នៅថ្ងៃបុណ្យទានពួកគេនឹងមិនប្រចាំការឡើយ។

សម្ដេចតេជោ ហ៊ុន សែន ថ្លែងបែបនេះថា «មូលហេតុគាត់មានផ្ទះសម្ដែងនៅកន្លែងនោះស្រាប់ គេហៅថា កូនក្រោលនៅកន្លែងនោះ ហើយបើសិនជាយើងបញ្ជូនមន្ត្រីទៅពីចំងាយថ្ងៃសៅរ៍ ថ្ងៃអាទិត្យ និងថ្ងៃបុណ្យអត់នៅប្រចាំការនៅខេត្តទេ គឺមកជួបប្រពន្ធកូននៅភ្នំពេញ»៕

អត្ថបទ៖ ឃួន សុភ័ក្រ