ព័ត៌មានជាតិ

សេដ្ឋកិច្ចធ្លាក់ចុះគ្រប់កន្លែងអំឡុងពេលកូវីដ តែយុវជនម្នាក់បែរជាកាក់កបជាមួយរបរនេះទៅវិញ

បានផុស

៦ years មុន

នៅ

ថ្ងៃពុធ ២០ មករា ២០២១

ដោយ

នៅក្នុងសភាពការណ៍កូវីដនៅលើពិភពលោកនេះ កសិករវ័យក្មេងម្នាក់ រស់នៅភូមិទំនប់ថ្មី ឃុំជៀប ស្រុកទឹកផុស ខេត្តកំពង់ឆ្នាំង បានបន្តការចិញ្ចឹមត្រី ចិញ្ចឹមកង្កែប ចិញ្ចឹមខ្យង លក់បានប្រាក់យ៉ាងក្រាស់ក្រែល ដើម្បីផ្គត់ផ្គង់ជីវភាពបានយ៉ាងល្អប្រសើរ ដែលអាចចាត់ទុកបានថាជាកសិករគំរូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កសិករខាងលើនេះ ឈ្មោះ សយ ចាន់ណាត នៅព្រឹកថ្ងៃទី២០ ខែមករា ឆ្នាំ២០២១ នេះបាននិយា យឲ្យដឹងថា លោកបានចាប់ផ្ដើមចិញ្ចឹមត្រីអណ្ដែងមួយឆ្នាំហើយដោយបានដាក់កូន២០គីឡូ ស្មើនិង ៥ពាន់ក្បាល នៅក្នុងស្រះធ្វើអំពីតង់កៅស៊ូ ដោយបានថែទាំវាឲ្យចំណីការុងស៊ីទៅតាមបច្ចេកទេស ដែលលោកធ្លាប់បានរៀនសូត្រ។ រយៈពេលនេះ១ឆ្នាំនេះ លោកបានលក់ត្រីអណ្ដែងខាងលើនេះ ចំនួន៣ដងហើយ ដោយលក់ចេញក្នុងមួយគីឡូថ្លៃ ៨ពាន់រៀល បានប្រាក់យ៉ាងក្រាស់ក្រែលផ្គត់ផ្គង់គ្រួសារ នៅក្នុងបរិបទកូវីដ ដែលប្រជាពលរដ្ឋភាគច្រើន មិនហ៊ានទៅទីផ្សារទិញត្រីបរិភោគ។

ជាមួយគ្នានេះដែរ លោកក៏កំពុងចិញ្ចឹមសត្វខ្យងស្រែ និងកង្កែបស្រែចំនួន២ស្រះកៅស៊ូសាកល្បង ផងដែរ។ ក្នុងនោះ គឺសត្វកង្កែប លោកបានបង្កាត់មេញីឈ្មោល មកដល់ ឲ្យចំណីធម្មជាតិវាស៊ីបានប្រមាណ ៤០០ ក្បាល ដែលអាចលក់បានក្នុងមួយគីឡូថ្លៃ ១ម៉ឺនរៀល។ ចំណែកសត្វខ្យងវិញ គឺលោកចិញ្ចឹមនៅក្នុងតង់កៅស៊ូ ដោយឲ្យកាកបន្លែវាស៊ី និងត្រូវចិញ្ចឹមវារយៈពេល៣ខែទើបធាត់ និងក៏អាចលក់ចេញបានក្នុងមួយគីឡូថ្លៃ ៨០០០រៀល ផងដែរ។ ទាក់ទងនិងចិញ្ចឹមខាងលើនេះ លោកក៏ធ្លាប់បានទៅរៀនសូត្រនៅសាលាកសិកម្មតាមការណែនាំរបស់មន្ទីរកសិកម្មខេត្ត និងទៅរៀនសូត្រតាមបណ្ដាកសិដ្ឋានមួយចំនួន នៅក្នុងប្រទេសទើបចាប់យកមុខរបរខាងលើនេះ មកធ្វើការចិញ្ចឹមថែទាំជាក់ស្តែង ដែលវាកំពុងតែផ្ដល់ថវិកាជូនលោកជាទីគាប់ចិត្ត។

លោក ងិន ហ៊ុន ប្រធានមន្ទីរកសិកម្មរុក្ខាប្រមាញ់និងនេសាទខេត្ត ក៏ធ្លាប់បានអំពាវនាវឲ្យប្រជាកសិករយើងតាមមូលដ្ឋាន យកចិត្តទុកដាក់ដាំដុះបន្លែបង្ការ និងចិញ្ចឹមសត្វ ចិញ្ចឹមត្រីកង្កែបនិងខ្យង ផងដែរ ដើម្បីផ្គត់ផ្គង់ជីវភាពរស់នៅតាមមូលដ្ឋាន នៅក្នុងបរិបទកូវីដនេះ ដើម្បីឲ្យប្រជាពលរដ្ឋយើងមានចំណីអាហារហូបចុកគ្រប់គ្រាន់ ដោយមិនបាច់មកទិញដូរនៅក្នុងទីផ្សារ៕