ព័ត៌មានជាតិ

រដ្ឋបាលខេត្តកោះកុង មិនអនុញ្ញាតឲ្យមានការជួបជុំ ឬ រៃអង្គាសថវិកា នៅឃុំជ្រោយប្រស់

បានផុស

១១ ខែ មុន

នៅ

ថ្ងៃសុក្រ ៥ ឧសភា ២០២៣

ដោយ

អាជ្ញាធរខេត្តកោះកុង មិនអនុញ្ញាតឲ្យមានការជួបជុំ និងរៃអង្គាសថវិកាណាមួយ នៅក្នុងឃុំជ្រោយប្រស់ ស្រុកកោះកុង នោះទេ ដែលជាការឆ្លើយតបនឹងសំណើសុំការឧបត្ថម្ភគាំទ្រកម្មវិធីសប្បុរសធម៌របស់អង្គការមូលនិធិសប្បុរសធម៌។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការមូលនិធិសប្បុរសធម៌ដើម្បីកុមារនៅជនបទ បានស្នើសុំការឧបត្ថម្ភគាំទ្រកម្មវិធីសប្បុរសធម៌លើកទី ១១ របស់ខ្លួន ក្រោមប្រធានបទ «អាវឡាតាន់ ពន្លក នៃការអប់រំកុមារនៅកោះកុងក្រៅ» ដែលគ្រោងនឹងរៀបចំឡើងនៅថ្ងៃទី ៦-៨ ខែឧសភា ឆ្នាំ ២០២៣ ខាងមុខ នាសាលាបឋមសិក្សាអាវឡាតាន់ ភូមិអាវឡាតាន់ ឃុំជ្រោយប្រស់។

តាមរយៈលិខិតចុះថ្ងៃទី ៥ ខែឧសភា ឆ្នាំ ២០២៣ នេះ លោក ស្រេង ហុង អភិបាលស្ដីទីខេត្តកោះកុង បានឲ្យដឹងថា បញ្ហានេះ ត្រូវបានរដ្ឋបាលខេត្តកោះកុង សម្ដែងការសាទរចំពោះបេសកកម្មការងាររបស់អង្គការក្នុងការចូលរួមចំណែកជួយលើកស្ទួយវិស័យអប់រំនៅក្នុងខេត្តកោះកុង ជាពិសេសតំបន់ដាច់ស្រយាល និងសូមឯកភាពលើការសាងសង់អគារ ១ ខ្នង ២ បន្ទប់ ប្រសិនបើការចំណាយជាថវិកាផ្ទាល់ពីអង្គការ។ ប៉ុន្តែចំពោះការធ្វើដំណើរទស្សនកិច្ចសិក្សា ឬទេសចរណ៍ គឺអាចប្រព្រឹត្តទៅដូចប្រក្រតី។ ដោយឡែកការរៀបចំពិធីដែលមានលក្ខណៈជួបជុំ និងប្រមូលផ្ដុំ ដើម្បីរៃអង្គាសថវិកា នៅថ្ងៃទី ៦ ដល់ថ្ងៃទី ៨ ខែឧសភា ក្នុងភូមិសាស្ត្រឃុំជ្រោយប្រស់ រដ្ឋបាលខេត្តកោះកុង មិនអនុញ្ញាតឲ្យមានការជួបជុំ និងរៃអង្គាសឡើយ។ ដូច្នេះអង្គការមូលនិធិសប្បុរសធម៌ ដើម្បីកុមារនៅជនបទ ជ្រាប និងអនុវត្តឲ្យបានត្រឹមត្រូវ។

យោងតាមការបង្ហោះរបស់អង្គការមូលនិធិសប្បុរសធម៌ ដើម្បីកុមារនៅជនបទ ឲ្យដឹងថា យុទ្ធនាការរៃអង្គាសនេះ បង្កើតឡើងដោយមូលនិធិសប្បុរសធម៌ដើម្បីកុមារនៅជនបទ ក្នុងគោលបំណងស្វែងរកថវិកាឧបត្ថម្ភពីបណ្ដាសប្បុរសជននានាទូទាំងប្រទេស ដើម្បីកសាងបន្ទប់សិក្សា ២ បន្ទប់បន្ថែម សម្រាប់សាលាបឋមសិក្សាអាវឡាតាន់ (កោះកុងក្រៅ) ភូមិអាវឡាតាន់ ឃុំជ្រោយប្រស់ ស្រុកកោះកុង ខេត្តកោះកុង។

យុទ្ធនាការរៃអង្គាសនេះមានរយៈពេល ៦០ ថ្ងៃ ដោយចាប់ផ្ដើមពីថ្ងៃទី ៨ ខែមីនា ដល់ថ្ងៃទី ៨ ខែឧសភា ឆ្នាំ ២០២៣ និងទទួលបានការគាំទ្រពីមន្ទីរអប់រំ យុវជន និងកីឡា ខេត្តកោះកុង។

គម្រោងសាងសង់បន្ទប់សិក្សា ២ បន្ទប់បន្ថែម លើតម្រូវការចាំបាច់របស់សាលាសព្វថ្ងៃ ដូចជា ១ បន្ទប់ ប្រវែងបណ្ដោយ ៤ ម៉ែត្រ ,ទទឹង ៤ ម៉ែត្រ ,និងកម្ពស់ ៥,២ ម៉ែត្រ ដែលត្រូវចំណាយថវិកាប្រមាណ ៥,០០០ ដុល្លារ (សំណង់លើកោះមានតម្លៃពលកម្មជាងខ្ពស់ និងសម្ភារៈដឹកជញ្ជូនថ្លៃជាងនៅដីគោក)៕

អត្ថបទ ៖ សិរីវឌ្ឍនៈ