ព័ត៌មានជាតិ

កម្ពុជា ទទួលបានចំណូលពីសហគ្រាស សេដ្ឋកិច្ចក្នុងប្រព័ន្ធជាង ៤ពាន់លានដុល្លារ ក្នុងមួយឆ្នាំ

បានផុស

៣ years មុន

នៅ

ថ្ងៃចន្ទ ១៥ ឧសភា ២០២៣

ដោយ

កម្ពុជា ទទួលបានប្រាក់ចំណូលប្រមាណជាង៤ពាន់លានដុល្លារពីសហគ្រាសសេដ្ឋកិច្ចក្នុងប្រព័ន្ធជាង១៧ ០០០កន្លែង នៅទូទាំងប្រទេសដែលបានចូលរួមលើកស្ទួយដល់ជីវភាពរស់នៅរបស់កម្មករនិយោជិតកាន់តែប្រសើរឡើងថែមទៀត។

ក្នុងពិធីសំណេះសំណាលជាមួយប្រធានរដ្ឋបាល ប្រធានផ្នែកនៅតាមរោងចក្រ សហគ្រាស នៅសាលមហោស្រពកោះពេជ្រកាលពីថ្ងៃទី១៤ឧសភា លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានមានប្រសាសន៍ថា បច្ចុប្បន្នសហគ្រាស-គ្រឹះស្ថានសេដ្ឋកិច្ចក្នុងប្រព័ន្ធដែលបានចុះបញ្ជីនៅក្រសួងការងារ និងបណ្តុះបណ្តាលវិជ្ជាជីវៈមានចំនួន ១៧,១០២សហគ្រាស ដែលមានកម្មករនិយោជិតចំនួន១.៥លាននាក់ ដោយបានទទួលប្រាក់ឈ្នួលជាមធ្យមសរុបជាង ៤.៥៥ពាន់លានដុល្លារអាមេរិក ក្នុងមួយឆ្នាំៗ ដោយក្នុងនោះ មានប្រជាពលរដ្ឋប្រមាណជាង២លាននាក់ ទទួលផលដោយប្រយោលពីវិស័យនេះ។

ដោយឡែកនៅឆ្នាំ២០២២ វិស័យវាយនភណ្ឌ កាត់ដេរផលិតស្បែកជើង ផលិតផលធ្វើដំណើរ និងកាបូបមានរោងចក្រមានចំនួន ១,៣២៥ ហើយតម្លៃសរុបនៃការនាំចេញមានប្រមាណជាង ១២,៨ពាន់លានដុល្លារអាមេរិក មានកម្មករនិយោជិតចំនួនជាង៨៥ម៉ឺននាក់ ហើយកម្ពុជាបានក្លាយជាប្រទេសនាំមុខមួយក្នុងការនាំចេញផលិតផលកាត់ដេរនៅលើទីផ្សារអន្តរជាតិ។

លោករដ្ឋមន្ត្រីបានបន្តថា ការអនុវត្តច្បាប់ស្តីពីសហជីពបានបន្តលើកកម្ពស់សេរីភាពអង្គការវិជ្ជាជីវៈ ដោយគិតត្រឹមត្រីមាសទី១ ឆ្នាំ២០២៣ ការចុះបញ្ជីអង្គការវិជ្ជាជីវៈបានកើនឡើងគួរឱ្យកត់សម្គាល់មានចំនួនសរុប ៦,០៦៤ ដោយក្នុងនោះ សហជីពមូលដ្ឋានចំនួន ៥,៧៤១ សហព័ន្ធសហជីពចំនួន ២៦៨ សហភាពសហជីពចំនួន ៤២ និងសមាគមនិយោជកចំនួន១៣។

លោកបណ្ឌិត អ៊ិត សំហេង បានបន្តទៀតថា រាជរដ្ឋាភិបាលបានត្រៀមរៀបចំផែនការបណ្តុះបណ្តាលជំនាញវិជ្ជាជីវៈដល់យុវជននៃគ្រួសារក្រីក្រ និងងាយរងគ្រោះទូទាំងប្រទេសចំនួន១លាន៥សែននាក់ ដោយរដ្ឋធានាផ្តល់ប្រាក់ឧបត្ថម្ភចាប់ពីឆ្នាំ២០២៣នេះតទៅ ដើម្បីផ្តល់ឱកាសឱ្យពួកគេទទួលបានជំនាញសម្រាប់យកទៅធ្វើការងារ ឬបង្កើតមុខរបរដោយខ្លួនឯង និងបំពេញតម្រូវការនៃកម្លាំងពលកម្មជំនាញសម្រាប់ការវិនិយោគថ្មីៗនៅកម្ពុជា។

ទន្ទឹមនឹងឱកាសការងារក្នុងស្រុក រាជរដ្ឋាភិបាលខិតខំផ្តល់ជម្រើសជូនប្រជាពលរដ្ឋដែលមានបំណងចង់ធ្វើការងារនៅក្រៅប្រទេស ដោយបានខិតខំពង្រឹងកិច្ចសហការជាមួយបណ្តាប្រទេសដៃគូ ដើម្បីទទួលបានឱកាសការងារនៅក្រៅប្រទេសជូនពលករសរុបចំនួនប្រមាណ១.៣លាននាក់ ដែលមិនត្រឹមតែអាចទទួលបានប្រាក់ចំណូល បានចំណេះជំនាញប៉ុណ្ណោះទេ ថែមទាំងអាចផ្ញើប្រាក់បញ្ញើមកក្នុងប្រទេសជូនគ្រួសារប្រមាណ២.៧ពាន់លានដុល្លារអាមេរិកក្នុងមួយឆ្នាំៗ ដើម្បីចូលរួមការអភិវឌ្ឍប្រទេសជាតិ៕

អត្ថបទ៖ សំអឿន