Connect with us

ព័ត៌មានជាតិ

មន្ត្រីជាន់ខ្ពស់ក្រសួងរៀបចំដែនដី ជំរុញប្រធានមន្ទីរថ្មី ត្រូវសហការជាមួយរដ្ឋបាលខេត្ត ទប់ស្កាត់ឲ្យបានរាល់ការសង់សំណង់ខុសច្បាប់នៅខេត្តប៉ៃលិន

បានផុស

នៅ

មាន​ប្រសាសន៍​កាលពី​ព្រឹក​ថ្ងៃ​ទី ២៤ ខែ​ឧសភា ឆ្នាំ ២០២៣ លោក ឆាន់ សាផាន រដ្ឋលេខាធិការ​ក្រសួង​រៀបចំ​ដែនដី នគរូបនីយកម្ម សំណង់ និង​សុរិយោដី តំណាង​ដ៏​ខ្ពង់ខ្ពស់​លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រី​ក្រសួង​រៀបចំ​ដែនដី​នគរូបនីយកម្ម សំណង់ និង​សុរិយោដី បាន​ថ្លែង​ជំរុញ ដល់​ប្រធាន​មន្ទីរ​ថ្មី នៃ​មន្ទីរ​រៀបចំ​ដែនដី នគរូបនីយកម្ម សំណង់ និង​សុរិយោដី​ខេត្ត​ប៉ៃលិន ត្រូវ​ចូលរួម​ទប់ស្កាត់​ការ​រំលោភ​លើ​ដី​សាធារណៈ ដែល​ធ្វើ​ឲ្យ​ប៉ះពាល់​ដល់​សោភណភាព សណ្ដាប់ធ្នាប់ និង​សុវត្ថិភាព​សាធារណៈ នៅ​តាម​ទីក្រុង ទីប្រជុំជន ជាពិសេស​ការ​ទប់ស្កាត់​ឲ្យ​បាន​រាល់​ការ​សាងសង់​សំណង់​ខុសច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធី​នេះ​ស្ថិត​ក្រោម​អធិបតីភាព​លោក ជា ចាន់​ឌិន ប្រធាន​ក្រុម​ប្រឹក្សា​ខេត្ត លោកស្រី បាន ស្រីមុំ អភិបាល នៃ​គណៈ​អភិបាល​ខេត្ត​ប៉ៃលិន​, លោក លោកស្រី​ប្រធាន​មន្ទីរ ស្ថាប័ន អង្គភាព​ពាក់ព័ន្ធ​ជុំវិញ​ខេត្ត អភិបាលក្រុង​/​ស្រុក លោក លោកស្រី តំណាង​វិស័យ​ឯកជន ជាច្រើន​នាក់​ផង​ដែរ។

លោកស្រី បាន ស្រីមុំ អភិបាល​ខេត្ត​ប៉ៃលិន បាន​កោតសរសើរ និង​វាយតម្លៃ​ខ្ពស់​ចំពោះ​លទ្ធផល​ការងារ​ដែល​ថ្នាក់​ដឹកនាំ​មន្ត្រីរាជការ​គ្រប់​លំដាប់​ថ្នាក់ នៃ​មន្ទីរ​រៀបចំ​ដែនដី នគរូបនីយកម្ម និង​សំណង់ និង​សុរិយោដី​ខេត្ត ព្រមទាំង​អាជ្ញាធរ​សមត្ថកិច្ច​ពាក់​ព័ន្ធ​ទាំងអស់ ក្នុង​ខេត្ត​ប៉ៃលិន ដែល​រយៈពេល​កន្លងមក បាន​រួម​សហការ​គ្នា​ខិតខំ​បំពេញភារកិច្ច បម្រើ​សេវា​ជូន​ប្រជាពលរដ្ឋ ទទួល​បាន​លទ្ធផល​ល្អ​ប្រសើរ។ ជាមួយ​គ្នា​នេះ​ដែរ លោកស្រី​អភិបាល​ខេត្ត ក៏បាន​ផ្ដាំផ្ញើ​ដល់​ប្រធាន​មន្ទីរ​ដែល​ទើប​តែងតាំង​ថ្មី ត្រូវ​បន្ត​ខិតខំ​យកចិត្តទុកដាក់ សហការ​ជាមួយ​មន្ទីរ អង្គភាព​ជុំវិញ​ខេត្ត អាជ្ញាធរ​ដែនដី​គ្រប់​លំដាប់​ថ្នាក់ ដើម្បី​រួមចំណែក​ក្នុង​ការ​អនុវត្ត​គោលនយោបាយ​របស់​រាជរដ្ឋាភិបាល​កម្ពុជា ជាពិសេស​ក្របខណ្ឌ​យុទ្ធសាស្ត្រ នៃ​គោលនយោបាយ​ដីធ្លី​ឲ្យ​បានសម្រេច និង​មាន​ប្រសិទ្ធភាព​ខ្ពស់​បន្ថែម​ទៀត។

មាន​ប្រសាសន៍​ក្នុង​ឱកាស​នោះ លោក ឆាន់ សាផាន បាន​ថ្លែង​ជំរុញ​ដល់​មន្ត្រី​ជំនាញ និង​ប្រធាន​មន្ទីរ​ថ្មី ត្រូវ​ពង្រឹង​ស្មារតី​សាមគ្គីភាព និង​ឯកភាព​ផ្ទៃក្នុង ជាមួយ​ថ្នាក់ដឹកនាំ មន្ត្រីរាជការ​គ្រប់​ថ្នាក់ ក្នុង​មន្ទីរ​ឲ្យ​បាន​ល្អ ពោល​គឺ​សំដៅ​លុបបំបាត់​ភាព​អសកម្ម​ទាំងឡាយ និង​បង្កើន​ស្មារតី​គោរព​ក្រម​សីលធម៌​វិជ្ជាជីវៈ បង្កើន​ប្រសិទ្ធភាព​ការងារ​លើ​ការ​ផ្ដល់​សេវា​ជូន​ប្រជាពលរដ្ឋ ដែល​មក​រក​សេវា​ពី​មន្ទីរ។ ជាមួយគ្នា​នោះ ត្រូវ​រៀបចំ​នីតិវិធី​ក្នុង​ការ​ចេញ​វិញ្ញាបនបត្រ​សម្គាល់​ម្ចាស់​អចលនវត្ថុ ជា​លក្ខណៈ​ប្រព័ន្ធ ជូន​ប្រជាពលរដ្ឋ​ឲ្យ​សម្រេច​តាម​ផែនការ។ ក្នុង​នោះ​ពាក់ព័ន្ធ​វិស័យ​សំណង់ ត្រូវ​ចាត់​មន្ត្រី​ចុះ​ពិនិត្យ​គុណភាព​សំណង់ ជំរុញ​ដល់​ប្រជាពលរដ្ឋ ស្នើសុំ​ច្បាប់​អនុញ្ញាត មុន​ពេល​សាងសង់ ធ្វើ​កិច្ចសហការ​ជាមួយ​មន្ទីរ​អង្គភាព​ជុំវិញ​ខេត្ត រដ្ឋបាល​ក្រុង ស្រុក ឃុំ សង្កាត់ ដើម្បី​ឲ្យ​ការងារ​មាន​ប្រសិទ្ធភាព តម្លាភាព និង​គណនេយ្យ​ភាព ក្នុង​គោលដៅ​បម្រើ​ផលប្រយោជន៍​ជូន​ប្រជាពលរដ្ឋ ប្រកប​ដោយ​ឆន្ទៈ​ម្ចាស់ការ ភក្ដីភាព មនសិការ​វិជ្ជាជីវៈ និង​វប្បធម៌​សាធារណៈ។ លើស​ពី​នេះ ត្រូវ​បន្ត​ផ្សព្វផ្សាយ និង​ធ្វើការ​ណែនាំ​ដល់​ប្រជាពលរដ្ឋ ពិសេស​ដល់​ម្ចាស់​សំណង់ និង​អ្នក​អភិវឌ្ឍន៍​អចលវត្ថុ ឲ្យ​យល់ដឹង​អំពី​ច្បាប់ និង​លិខិត​បទដ្ឋាន​គតិយុត្តិ​ពាក់ព័ន្ធ​វិស័យ​សំណង់ និង​គោលការណ៍​ណែនាំ​ផ្សេងៗ របស់​រាជរដ្ឋាភិបាល ក៏​ដូច​ក្រសួង​រៀបចំ​ដែនដី នគរូបនីយកម្ម សំណង់ និង​សុរិយោដី ព្រម​ទាំង​រដ្ឋបាល​ខេត្ត​ផង​ដែរ។

ជា​ការ​ឆ្លើយ​តប លោក ហុង ពៅ ដែល​ទើប​ទទួល​ការ​តែងតាំង​ថ្មី បាន​បញ្ជាក់​ថា លោក​នឹង​ប្ដេជ្ញា​ចិត្ត​ដឹកនាំ​ស្ថាប័ន​មួយ​នេះ​ឲ្យ​មាន​ប្រសិទ្ធភាព​ខ្ពស់ មាន​សាមគ្គីភាព​ផ្ទៃក្នុង​ល្អ សហការ​ជាមួយ​ជំនាញ​នានា និង​អាជ្ញាធរ​ខេត្ត ដើម្បី​ចូលរួម​បម្រើ​សេវា​ឲ្យ​បាន​លឿន រហ័ស​ទាន់​ចិត្ត ជូន​ប្រជាពលរដ្ឋ​ផង​ដែរ៕

អត្ថបទ ៖ សេង សុវណ្ណារិទ្ធ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម