ព័ត៌មានជាតិ

មកចាប់អារម្មណ៍គម្រោងអភិវឌ្ឍធំៗទាំង ៥ នៅក្រុងកំពត

បានផុស

៣ years មុន

នៅ

ថ្ងៃអង្គារ ៣០ ឧសភា ២០២៣

ដោយ

ក្រុងកំពតមានគម្រោងអភិវឌ្ឍធំៗចំនួន ៥ សម្រាប់បម្រើប្រយោជន៍សាធារណៈ និងដើម្បីទាក់ទាញភ្ញៀវទេសចរបន្ថែមទៀត។

លោក ឃុត ឧសភា នាយករដ្ឋបាលសាលាខេត្តកំពតបានឲ្យកម្ពុជាថ្មីដឹងថា ខណៈដែលក្រុងកំពតត្រូវបានចាត់ទុកជាគោលដៅទេសចរណ៍ដ៏ទាក់ទាញ មានគម្រោងធំៗជាច្រើនកំពុងដំណើរការ ដែលនឹងរួមចំណែកទាក់ទាញភ្ញៀវទេសចរ ក៏ដូចជាលើកសោភណភាពក្រុងជាប់សមុទ្រនេះ។

លោកបញ្ជាក់ថា គម្រោងសាងសង់ស្ថានីយប្រព្រឹត្តិកម្មទឹកកខ្វក់ក្រុងកំពតបានស្ថាបនាស្ទើររួចរាល់ ១០០% ហើយគ្រោងបញ្ចប់ក្នុងពេលឆាប់ៗខាងមុខនេះ។ គម្រោងនេះជាផ្នែកមួយនៃគម្រោងការអភិវឌ្ឍន៍ក្រុងរបៀង ២ របស់ធនាគាអភិវឌ្ឍន៍អាស៊ី (ADB)។

ដោយឡែកគម្រោងសាងសង់ទីលានចាក់សំរាមក៏បានបញ្ចប់ ដែលគ្រោងធ្វើពិធីប្រគល់ទទួលនៅថ្ងៃ ៣០ ឧសភានេះ ក្រោមវត្តមានរដ្ឋមន្ត្រីក្រសួងសាធារណការនិងដឹកជញ្ជូន។

លោកបន្តថា រដ្ឋបាលខេត្តក៏បានកំពុងអភិវឌ្ឍឆ្នេរកម្សាន្តសាធារណៈតាមដងព្រែកកំពត ឬព្រែកកំពង់បាយចំនួន ៣ ទីតាំងធំៗ។ ទីមួយនៅចន្លោះពីស្ពានថ្មថ្មីមកស្ពានរទេះភ្លើង និងមួយទៀតពីស្ពានថ្មថ្មីទៅស្ពានឥន្ទធនូចាស់ និងក៏កំពុងកែលម្អស្ថាបនាឆ្នេរប្រវែងជាង ២០០០ ម៉ែត្រ នៅតំបន់កោះស្មៅ ដែលបច្ចុប្បន្នមានពលរដ្ឋនិងភ្ញៀវទេសចរបានទៅលេងយ៉ាងច្រើនកុះករ។

បើតាមលោក ឃុត ឧសភា ទិសដៅទៅមុខអាជ្ញាធរខេត្តនឹងបង្កើតឆ្នេរកម្សាន្តឲ្យបានច្រើនបន្ថែមទៀត សម្រាប់ពលរដ្ឋក្នុងខេត្តផង ក៏ដូចជាបម្រើដល់ភ្ញៀវទេសចរជាតិនិងអន្តរជាតិមកលេងខេត្តកំពត។

លោក ឃុត ឧសភាបានបញ្ជាក់ថា កន្លងទៅភ្ញៀវទេសចរមកខេត្តកំពតមិនបានទៅលេងសមុទ្រទេ ដោយសារខេត្តមិនមានឆ្នេរ ហេតុនេះទើបថ្នាក់ដឹកនាំខេត្តបានប្ដេជ្ញារៀបចំកែលម្អឆ្នេរកម្សាន្តសម្រាប់បម្រើដល់ភ្ញៀវទេសចរ។

ខេត្តកំពតស្ថិតនៅក្នុងចំណោមខេត្ត ៤ ជាតារារះនៃទិសនីរតីដែលមាន ខេត្តព្រះសីហនុ កំពត កែប និងកោះកុង។ ខេត្តជាប់សមុទ្រនេះត្រូវបានរាជរដ្ឋាភិបាលកំណត់ជា «គោលដៅទីក្រុងទេសចរណ៍បេតិកភណ្ឌវប្បធម៌ និងកសិទេសចរណ៍តំបន់ឆ្នេរ»។ ថ្មីៗនេះខេត្តកំពតទទួលបានសមិទ្ធផលថ្មីៗ ដូចជាការស្ថាបនាកំណាត់ផ្លូវជាតិលេខ ៣ ការអភិវឌ្ឍកំពង់ផែទឹកជ្រៅតម្លៃជាង ១៥០០ លានដុល្លារ រួមទាំងគម្រោងអភិវឌ្ឍផ្សេងៗទៀតជាច្រើន៕