លោក លី ធុជ ៖ គណបក្សប្រជាជនកម្ពុជា ដើរតួនាទីក្នុងការផ្សះផ្សារ បង្រួបបង្រួមជាតិ និងការអភិវឌ្ឍ

លោក លី ធុជ សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានក្រុងបាវិត បានលើកឡើងថា រយៈពេលជាង ៤០ឆ្នាំនេះ ការដឹកនាំប្រទេសកម្ពុជា គឺមិនអាចខ្វះបានទេពីការលះបង់​របស់ថ្នាក់ដឹកនាំគណបក្សប្រជាជនកម្ពុជា ព្រោះគណបក្សប្រជាជនកម្ពុជា បានដើរតួនាទីស្នូល ជាប្រវត្តិសា​ស្រ្តក្នុងការផ្សះផ្សារ និងបង្រួបបង្រួមប្រទេសជាតិ ឲ្យរួបរួមគ្នាតែមួយក្រោមដំបូលសន្តិភាពរបស់សម្តេចតេ​ជោនាយករដ្ឋមន្រ្តី។ លោកថា ថ្ងៃទី២៣ ខែកក្កដា ឆ្នាំ២០២៣ ខាងមុខនេះ គឺជាព្រឹត្តិការណ៍ជាប្រវត្តិសាស្រ្ត ដែលប្រជាជនកម្ពុជាទាំងអស់ ត្រូវសម្រេចចិត្តក្នុងការបោះឆ្នោតជូនគណបក្សប្រជាជនកម្ពុជា ដើម្បីបន្ត​ថែរក្សាការពារសន្តិភាព និងការអភិវឌ្ឍន៍ប្រទេសជាតិឲ្យកាន់តែមានការរីកចម្រើន។

លោក លី ធុជ លើកឡើងបែបនេះ នៅក្នុងជំនួបសំណេះសំណាលសួរសុខទុក្ខជាមួយមេគ្រួសារបក្សចំនួន ១៥៤៦ នាក់ នៅសង្កាត់ព្រៃអង្គុញ ក្រុងបាវិត ខេត្តស្វាយរៀង កាលពីថ្ងៃទី ០៤ ខែ មិថុនា។

នាឱកាសនេះ លោក លី ធុជ បានពាំនាំនូវសេចក្តីនឹករលឹកពី សម្តេចតេជោ ហ៊ុន សែន នាយករដ្ឋមន្រ្តី និងជាប្រធាន​គណបក្សប្រជាជនកម្ពុជា ព្រមទាំងសម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តស្វាយរៀង ជូនចំពោះសមាជិក សមាជិកាគណបក្សទាំងអស់​ក្នុងក្រុងបាវិត ខេត្តស្វាយរៀង។

បើតាមលោក លី ធុជ គណបក្សប្រជាជនកម្ពុជា គឺជាគណបក្សធំជាងគេដែលបានរំដោះប្រទេសជាតិចេញពីរបបប្រល័យ​ពូជសាសន៍ ប៉ុល ពត ព្រមទាំងបានកសាង និងសម្រេចបាននូវសមិទ្ធផលជាប្រវត្តិសាស្រ្តយ៉ាងច្រើន សម្រាប់បុព្វហេតុ​ជាតិ និងផលប្រយោជន៍របស់ប្រជាជនកម្ពុជា ដែលយើងទាំងអស់គ្នាត្រូវដឹងគុណ និងត្រូវបន្តនាំគ្នាការពារសមិទ្ធផល​ទាំងនេះឲ្យស្ថិតនៅគង់វង្ស សម្រាប់កូនចៅរបស់យើងជំនាន់ក្រោយៗទៀត។  សមិទ្ធផលសម្រេចបានរបស់​គណបក្សប្រ​ជាជនកម្ពុជា  គឺជាសមិទ្ធផលរួមរបស់ប្រជាជនកម្ពុជាទាំងអស់គ្នា៕

អត្ថបទ៖ ៖ ភក្ដី