សម្ដេចតេជោ ហ៊ុន សែន​ ៖​​ ម្ចាស់បុរីបញ្ឈប់ភ្លាម រឿងរឹបអូសផ្ទះអតិថិជន, ឈប់សិន និយាយគ្នាសិន

ម្ចាស់បុរី ដែលត្រូវរឹបអូសផ្ទះ ឈប់សិន និយាយគ្នាសិន ចាប់ពីពេលនេះទៅ មិនត្រូវរឹបអូសផ្ទះពលរដ្ឋឡើយ សូមមេត្តាយោគយល់ ទប់ស្កាត់ បញ្ឈប់ភ្លាមរឿងរឹបអូស តែអ្នកទិញត្រូវតែមានទំនួសខុសត្រូវផងដែរ។ នេះជាការអន្តរាគមន៍លើកដំបូងរបស់សម្តេចតេជោ ហ៊ុន សែន ទៅលើដំណឹងដែលថា មានព័ត៌មានម្ចាស់​បុរីរឹបអូសផ្ទះអ្នកទិញដែលបង់ប្រាក់រំលស់មិនទាន់ពេលវេលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានអំពាវនាវដល់ម្ចាស់បុរីទាំងអស់ សូមកុំរឹបអូសយកផ្ទះប្រជាពលរដ្ឋ ដែលមិនទាន់មានលទ្ធភាពបង់ប្រាក់ប្រចាំខែ ដោយសារបញ្ហាហិរញ្ញវត្ថុ។ សម្តេចអំពាវនាវបែបនេះ នៅក្នុងជំនួប​សំណេះសំណាលជាមួយកម្មករ កម្មការិនី សរុបចំនួនជិត ២ម៉ឺននាក់ នៅស្រុកកំពង់ត្រឡាច និងស្រុកសាមគ្គីមានជ័យ ខេត្តកំពង់ឆ្នាំង(លើកទី២) ព្រឹកថ្ងៃទី ០៩ ខែ មិថុនា ឆ្នាំ ២០២៣។

សម្តេច បានលើកឡើងថា បើទោះបីជាមិនរឹបអូស ក៏ថៅកែម្ចាស់បុរីមិនមានការខាតបង់នោះដែរ។ មានន័យថា ម្ចាស់បុរីចំណេញទៅវិញទេ, ចំណេញត្រង់ថា ការប្រាក់នៅតែជាការប្រាក់ដដែល គ្រាន់តែឱ្យអ្នកទិញអូស​បន្លាយ​ពេលសងវែងជាងមុនប៉ុណ្ណោះ។

សម្តេចនាយករដ្ឋមន្រ្តី បន្តថ្លែងដូច្នេះថា« ខ្ញុំសុំស្នើឱ្យក្រុមហ៊ុនអចលនទ្រព្យ ដូចជាលោកឧកញ៉ា លី ហួរ ប្រធានសមាគម​អចលនទ្រព្យ ធ្វើការលើរឿងនេះ ជាមួយសមាជិកសមាគមនៅតាមបុរីនានា ​កុំឱ្យថា មិនបានបង់​ខែនឹងរឹបអូសយកខែនឹង ដែលខ្ញុំទទួលបានព័ត៌មានខ្លះ តើពិត ឬមិនពិត?»។

សម្តេចតេជោ សង្កត់ធ្ងន់ថា បើធ្វើដូច្នេះ គឺខូចខាតធ្ងន់ណាស់ សេដ្ឋកិច្ចកម្ពុជា នឹងដើរដល់ដំណាក់កាលមួយគ្រោះថ្នាក់, ហើយអ្នកដែលគ្រោះថ្នាក់ គឺអ្នកដែលបង់រំលស់ ត្រូវបានគេរឹបអូស។ « ឥឡូវថា តម្លៃផ្ទះ ៧ម៉ឺនដុល្លារ, បង់បាន ៥ម៉ឺនដុល្លារហើយ ស្រាប់តែមិនបានបង់តែមួយរយៈកាល ម្ចាស់បុរីរឹបអូស អ៊ីចឹងលុយ ៥ម៉ឺនដុល្លារដែលបានបង់ហើយ ក៏ត្រូវបាត់ ឯផ្ទះក៏អត់បាននៅ, នេះជាការឈឺចាប់មួយ»។ នេះជាការគូសបញ្ជាក់របស់សម្តេចតេជោ ហ៊ុន សែន។

ជាមួយគ្នានេះ សម្តេចតេជោ បានចាត់តាំងក្រុមការងារពាក់ព័ន្ធស្រាវជ្រាវរកទិន្នន័យចំនួនអ្នកទិញ​ដែលកំពុងជួប​បញ្ហាជាមួយម្ចាស់បុរីឱ្យបានច្បាស់លាស់ ដើម្បីដោះស្រាយបញ្ហានេះ ឱ្យបានទាន់ពេល៕