លោក គន់ គីម ស្នើអាជ្ញាធរឲ្យជួយពិនិត្យផ្តល់ប័ណ្ណក្រីក្រដល់គ្រួសារអតីតយុទ្ធជន

នាថ្ងៃទី៩ ខែមិថុនា ឆ្នាំ២០២៣ ឯកឧត្តមនាយឧត្តមសេនីយ៍កិត្កិសង្គហបណ្ឌិត គន់ គីម អនុប្រធាន និងជាអគ្គរដ្ឋលេខា​ធិការសមាគមអតីតយុទ្ធជនកម្ពុជាបានលើកឡើងថា នាពេលកន្លងមករាជរដ្ឋាភិបាលក៏ដូចជាសមាគមយុទ្ធជនកម្ពុជាតែងតែបានគិតគូរដោះស្រាយបញ្ហាលំបាកជាច្រើនជូនអតីតយុទ្ធជនក៏ដូចជាផ្ដល់ប័ណ្ណព្យាបាលសុខភាពតដំឡើងប្រាក់​ខែជួយផ្ដល់ដីធ្លី និងផ្ទះសំបែងជាបណ្ដើរៗដែលរហូតមកដល់ថ្ងៃនេះបានជាង៤ពាន់គ្រួសារនៅសល់ជាង៤ពាន់គ្រួសារទៀតកំពុងដោះស្រាយ ក្នុងនោះខេត្តកំពតក៏នៅសល់ជាង៦០០គ្រួសារទៀតដែរ។ ហើយកិច្ចការងារនេះ ឯកឧត្តម ម៉ៅ ធនិន អភិបាលខេត្តកំពតជាប្រធានកិត្តិយសសហគមន៍អតីតយុទ្ធជនកម្ពុជាខេត្តកំពតកំពុងខិតខំដោះស្រាយ។

ទោះជាយ៉ាងណាក៏ដោយឯកឧត្តមអភិបាលខេត្តសង្កេតឃើញចំណុចខ្វះខាតមួយចំនួនដែរតែងតែកើតមានជាញឹកញាប់ គឺគ្រួសារអតីតយុទ្ធជនខ្វះខាតលទ្ធភាពព្យាបាលជំងឺខ្លួនឯងពេលឈឺថ្តាត់ម្តងៗ។ ដូច្នេះហើយឯកឧត្តមបានស្នើរដល់អាជ្ញាធរអោយជួយគិតពិនិត្យលទ្ធភាព និងផ្ដល់ប័ណ្ណក្រីក្រជូនគ្រួសារអតីតយុទ្ធជនផង។

ជាមួយគ្នានេះដែរឯកឧត្តមកិត្តិសង្គហបណ្ឌិត គន់ គីម បានស្នើដល់អាជ្ញាធរ ក្រុង ស្រុក ឃុំសង្គាត់ ជួយពិនិត្យលទ្ធភាព ក្នុងការផ្តល់ប័ណ្ណក្រីក្រជូនដល់គ្រួសារអតីតយុទ្ធជន ដើម្បីឲ្យពួកគាត់អាចព្យាបាលជំងឺដោយឥតគិតថ្លៃ។

ថ្លែងក្នុងពិធីបំពាក់គ្រឿងឥស្សរិយយសជូនអតីតយុទ្ធជនកម្ពុជាក្រុងកំពត នៅសាលសន្និសឹទខេត្តកំពតនោះ ឯកឧត្តមកិត្តិសង្គហបណ្ឌិត គន់ គីម ក៏បានផ្តាំផ្ញើដល់បងប្អូនអតីតយុទ្ធជនទាំងអស់សូមទៅចូលរួមបោះឆ្នោត ពិសេសត្រូវធ្វើជាសកម្មជនឲ្យបក្សគណបក្សប្រជាជនកម្ពុជា កៀរគរសមាជិក សាច់ញាតិទាំងអស់ ទៅបោះឆ្នោតឲ្យបានគ្រប់គ្នា នៅថ្ងៃទី២៣ កក្កដា ២០២៣ខាងមុខនេះ។

តាមរបាយការណ៍របស់សមាគមអតីតយុទ្ធជនកម្ពុជាខេត្តកំពតបានឲ្យដឹងថា ខេត្តមានអតីតយុទ្ធជនសរុប៤៣៥៦នាក់ ក្នុងនោះជនពិការ១៦៤៨នាក់ និវត្តន៍ជន ១១៩៩នាក់ ជនបាត់បង់សមត្ថភាព៣៣នាក់ គ្រួសារជនពលី ១៣៧៧នាក់ និងគ្រោះសារជនមរណៈភាព៩៧នាក់៕

អត្ថបទ៖ សឹង រ៉ាត់