លោក អ៊ាង សុផល្លែត៖ រួមសាមគ្គីគ្នាដើម្បីផ្តល់ប្រយោជន៍ដល់ការអភិវឌ្ឍមូលដ្ឋាន

លោក អ៊ាង សុផល្លែត ប្រធានក្រុមការងារគណបក្សប្រជាជនចុះមូលដ្ឋានស្រុកអូររាំងឪ ខេត្តត្បូងឃ្មុំ បានលើកឡើងថា ការរួមសាមគ្គីគ្នា ស្រឡាញ់រាប់អាន ដឹងពីគុណធម៌ និងសីលធម៌រស់នៅល្អ នឹងផ្តល់ប្រយោជន៍ដ៏សំខាន់ក្នុងការចូលរួមអភិវឌ្ឍន៍មូលដ្ឋាន។

លោក អ៊ាង សុផល្លែត បានលើកឡើងបែបនេះ ក្នុងឱកាសជួបសំណេះសំណាលជាមួយប្រជាពលរដ្ឋជាង៥០០នាក់ មក ក្នុងឃុំព្រះធាតុ ស្រុកអូររាំងឪ ខេត្តត្បូងឃ្មុំ កាលពីថ្ងៃទី១០ ខែមិថុនា ឆ្នាំ២០២៣ ។

លោក អ៊ាង សុផល្លែត បានថ្លែងថា ការចូលរួមទៅបោះឆ្នោតរបស់ប្រជាពលរដ្ឋនៅថ្ងៃទី២៣ ខែកក្កដា ឆ្នាំ២០២៣ គឺបង្ហាញឱ្យឃើញពីការរួមសហការគ្នា ដើម្បីការពារនូវផលប្រយោជន៍ជាតិមាតុភូមិ និងបន្តការរីកចម្រើនផ្នែកជីវភាពរបស់ប្រជាពលរដ្ឋនៅមូលដ្ឋាន ក៏ដូចជាសេដ្ឋកិច្ចជាតិ។

លោក បានគូសបញ្ជាក់ថា គណបក្សប្រជាជនកម្ពុជា បានយកចិត្តទុកដាក់អនុវត្តគោលនយោបាយជាច្រើន ដើម្បីជួយដល់ប្រជាពលរដ្ឋ ពិសេស អ្នកដែលជួបការលំបាក កម្មករ-កម្មការីនី ឱ្យទទួលបានកិច្ចគាំពារសង្គម ទាំងក្នុងដំណាក់កាលជម្ងឺកូវីដ-១៩ និងការទទួលរងនូវវិបត្តិពិភពលោក។

ជាមួយគ្នានេះ លោក បានបន្តថា ក្រុមការងារចុះមូលដ្ឋានគ្រប់លំដាប់ថ្នាក់ ក៏បានជំរុញបន្ថែមការផ្តល់នូវអាទិភាពដល់ប្រជាពលរដ្ឋឱ្យទទួលបានការអប់រំការតែប្រសើរ មានផ្លូវគមនាគមន៍ខ្វាត់ខ្វែង មានទឹកស្អាត និងភ្លើងសម្រាប់ប្រើប្រាស់គ្រប់គ្រាន់តាមខ្នងផ្ទះក្នុងមូលដ្ឋាន។

ចំពោះនៅស្រុកអូររាំងឪ លោក អ៊ាង សុផល្លែត បានអះអាងថា កន្លងមកនេះ ក្រុមការងារចុះមូលដ្ឋានបានសហការជាមួយអាជ្ញាធរ និងប្រជាពលរដ្ឋអនុវត្តនូវផែនការស្តារជួសជុលផ្លូវនៅតាមទីប្រជុំជន និងភូមិនានា ផ្តល់នូវអណ្តូងទឹកស្អាត ម៉ាសុីនចម្រោះទឹកតាមសាលារៀន និងតាមទីវត្តអារាម ហើយក៏បាននឹងកំពុងបំពាក់អំពូលភ្លើងសូឡាតាមដងផ្លូវក្នុងភូមិ និងតាមខ្នងផ្ទះជាច្រើនកន្លែង និងផ្តល់នូវការគាំទ្រធនធានមនុស្ស តាមរយៈការលើកទឹកចិត្តសិស្សដែលរៀនពូកែ និងការសាងសង់អគារសិក្សាតាមសាលារៀន។

តាមរយៈសមិទ្ធផលជាច្រើនកន្លងមកនេះ លោក អ៊ាង សុផល្លែត បានបន្តឱ្យប្រជាពលរដ្ឋគាំទ្របន្ថែមទៀតដល់គណបក្សប្រជាជនកម្ពុជាក្នុងការបោះឆ្នោតតំណាងរាស្រ្តនីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ខាងមុខ ដើម្បីបង្កើតនូវសមិទ្ធផលថ្មីបន្ថែមទៀតក្នុងមូលដ្ឋានស្រុកអូររាំងឪឱ្យកាន់តែរីកចម្រើនបន្ថែមទៀត៕