សម្តេច ស ខេង៖ ឪពុកម្តាយជាផ្នែកមួយក្នុងការតាមដានកូនកុំឱ្យប្រើប្រាស់គ្រឿងញៀន

សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ បានលើកឡើងនៅក្នុងទិវាអន្តរជាតិប្រយុទ្ធប្រឆាំងគ្រឿងញៀននៅថ្ងៃទី២៨ ខែមិថុនា នេះថា ឪពុកម្តាយគឺជាផ្នែកមួយដែលចូលរួមចំណែកទប់ស្កាត់ និងតាមដានកូនកុំឱ្យមានការប្រើប្រាស់គ្រឿងញៀន បន្ទាប់ពីភាគីពាក់ព័ន្ធដែលមានតួនាទីទប់ស្កាត់ផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេច ស ខេង មានប្រសាសន៍ថា ឪពុកម្តាយ អាណាព្យាបាលមានតួនាទីក្នុងការតាមដានការសិក្សារបស់កូនៗថា តើពួកគេបានចូលរៀនឬទេ? តើពួកគេមានលួចសេពគ្រឿងញៀន ឬ ប្រព្រឹត្តអ្វីដែលមិនល្អដែរ ឬ ទេ? ទន្ទឹមនោះ អាណាព្យាបាល មិនអាចពឹងផ្អែកតែលើអាជ្ញាធរ ឬ ប៉ូលិសក្នុងការការពារ និងទប់ស្កាត់ការប្រើប្រាស់គ្រឿងញៀនបានឡើយ ព្រោះកងកម្លាំងមិនអាចមើលបានគ្រប់ជ្រុងជ្រោយទេ ត្រូវការកិច្ចសហការពីភាគីពាក់ព័ន្ធផ្សេងៗទៀត។

ជាមួយនឹងការចូលរួមទប់ស្កាត់នេះ សម្តេចក៏បានបន្តថា បច្ចុប្បន្ននេះកំពុងពង្រឹងបញ្ជា បង្កើតឱ្យមានបញ្ជាការពារដោយពលរដ្ឋស្ម័គ្រចិត្ត ដើម្បីចូលរួមការពារសុវត្ថិភាពភូមិ ឃុំ របស់ពួកគេ។ ទាក់ទិនជាមួយការបង្រ្កាបគ្រឿងញៀន និងការព្យាបាលអ្នកមានសារជាតិញៀន សម្តេចសង្កត់ធ្ងន់ថា មូលដ្ឋាននីមួយៗ ភូមិ ឃុំ ត្រូវក្តាប់ឱ្យបានពីទិន្នន័យក្នុងដែនសមត្ថកិច្ចរបស់ខ្លួនមានអ្នកញៀនគ្រឿងញៀនប៉ុន្មាននាក់? ត្រូវរៀបចំបញ្ជីឈ្មោះឱ្យបានត្រឹមត្រូវ និងទប់ស្កាត់ឱ្យបានល្អ។ សម្តេចសំណូមពរឱ្យមាន ចលនាលើកទឹកចិត្តឱ្យសាមីខ្លួន អាណាព្យាបាល ឪពុកម្តាយយកអ្នកញៀនគ្រឿងញៀន ឱ្យមានការទទួលព្យាបាល ដែលជាតួនាទីរបស់រដ្ឋបាលនៅទីតំបន់នោះ។

សូមជម្រាបថា ក្នុងឆ្នាំ២០២២កន្លងមកនេះ គណៈកម្មាធិការត្រួតពិនិត្យគ្រឿងញៀនរាជធានីភ្នំពេញ បានបង្ក្រាបបទល្មើសគ្រឿងញៀនចំនួន ៩៧៨ ករណី ឃាត់ខ្លួនជនសង្ស័យចំនួន ១.៨៥៧ នាក់ (នារី ១៧៨ នាក់)។ សម្រាប់ការបញ្ចូនអ្នកមានសារធាតុញៀន ទៅមជ្ឈមណ្ឌលឱកាសខ្ញុំ សរុបចំនួន ៧.១៧៦នាក់ ហើយសម្រាប់អ្នកទទួលបានការព្យាបាលរួចទៅរស់នៅក្នុងសហគមន៍វិញចំនួន ជាង៥ពាន់នាក់៕