អាវុធហត្ថខេត្តតាកែវ ឃាត់ខ្លួនស្ត្រី៣នាក់ ពាក់ព័ន្ធករណីគ្រឿងញៀន

កម្លាំងមន្ទីរស្រាវជ្រាវ និងបង្រ្កាបបទល្មើស នៃបញ្ជាការដ្ឋានកងរាជអាវុធហត្ថខេត្តកែវ កាលពីថ្ងៃទី៦ ខែមេសា ឆ្នាំ២០២៦ ដោយមានការសម្របសម្រួលពីលោក ស៊ឹម ជុំសុខហេង ព្រះរាជអាជ្ញារងអមសាលាដំបូងខេត្តតាកែវ បានបើកប្រតិបត្តិការបង្ក្រាបករណីរក្សាទុក ជួញដូរ និងប្រើប្រាស់ដោយខុសច្បាប់នូវសារធាតុញៀន​ឃាត់ខ្លួនជនសង្ស័យជាស្ត្រី ៣នាក់ និងវត្ថុតាងថ្នាំញៀនមួយចំនួន។

ប្រតិបត្តិការឃាត់ខ្លួននេះ ធ្វើឡើងនៅត្រង់ចំណុចបន្ទប់ជួល ស្ថិតនៅភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ។ ជនសង្ស័យដែលត្រូវឃាត់ខ្លួនក្នុងប្រតិបត្តិការនេះមានឈ្មោះ ទិត ម៉ូនីកា ភេទស្រី អាយុ៤១ឆ្នាំ ជនជាតិខ្មែរ មុខរបរមិនពិតប្រាកដ រស់នៅភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ។ ឈ្មោះ ឆែ ភ័ស្ត ភេទស្រី អាយុ ៣២ឆ្នាំ ជនជាតិខ្មែរ មុខរបរមិនពិតប្រាកដ រស់នៅភូមិខ្សឹង សង្កាត់រកាក្នុង ក្រុងដូនកែវ ខេត្តតាកែវ។ និងឈ្មោះ ហេង ស្រីយ៉ា ភេទស្រី អាយុ៣១ឆ្នាំ ជនជាតិខ្មែរ មុខរបរមិនពិតប្រាកដ រស់នៅភូមិខ្សឹង សង្កាត់រកាក្នុង ក្រុងដូនកែវ ខេត្តតាកែវ។

ក្នុងប្រតិបត្តិការបង្ក្រាប កម្លាំងជំនាញបានដកហូតវត្ថុតាង ក្រាមពណ៌សថ្លា ចំនួន ៦កញ្ចប់ ទម្ងន់ ៤០.៣២ក្រាម (ថ្លឹងទាំងសំបកថង់) ទូរស័ព្ទ ចំនួន ៥គ្រឿង ម៉ូតូចំនួន ២គ្រឿង និងសម្ភារ:សេពថ្នាំញៀនមួយចំនួន។

ជនសង្ស័យរួមនឹងវត្ថុតាង ការិយាល័យជំនាញ កំពុងកសាងសំណុំរឿងបញ្ជូនទៅសាលាដំបូងខេត្តតាកែវ ដើម្បីចាត់ការតាមនីតិវិធីច្បាប់៕