សម្ដេចតេជោ ហ៊ុន សែន ចុះហត្ថលេខារួចហើយ លើអនុក្រឹត្យផ្ដល់អត្ថប្រយោជន៍បន្ថែមដល់កម្មការនីមានផ្ទៃពោះរហូតកូនមានអាយុ ២ឆ្នាំ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា សម្ដេច បានចុះហត្ថលេខារួចហើយ ទៅលើអនុក្រឹត្យដែលផ្ដល់អត្ថប្រយោជន៍បន្ថែមដល់កម្មការនីមានផ្ទៃពោះ រហូតដល់កូនមានអាយុ ២ឆ្នាំ ដែលនឹងត្រូវអនុវត្តចាប់ពីខែសីហា ឆ្នាំ ២០២៣តទៅ។ ការឲ្យដឹងរបស់សម្តេចតេជោ ហ៊ុន សែន បានធ្វើឡើងក្នុងពិធីជួបសំណេះសំណាលជាមួយកម្មករ-កម្មការិនី នៅស្រុកអង្គស្នួល ខេត្តកណ្តាល នាព្រឹកថ្ងៃទី ២៩ ខែមិថុនា ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងបែបនេះថា «ម្សិលមិញនេះ អនុក្រឹត្យបានចុះហត្ថលេខាហើយ ដោយឯកឧត្ដមបណ្ឌិត សភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានរៀបចំអនុក្រឹត្យ សម្រាប់អនុវត្តជាមួយនឹងស្ត្រីមានផ្ទៃពោះៗ បានចុះហត្ថលេខាពីម្សិល សម្រាប់អនុវត្តពីថ្ងៃទី ១ ខែសីហា ឆ្នាំ ២០២៣តទៅ ក្មួយៗនឹងត្រូវទទួលបាននូវផលប្រយោជន៍បន្ថែម ដែលមានទឹកប្រាក់ដូចដែលឯកឧត្ដម អ៊ិត សំហេង បានលើកឡើងៗ»។

សម្ដេចតេជោ ហ៊ុន សែន បានឲ្យដឹងថា កាលពីមិនទាន់ជួបជាមួយកម្មករ-កម្មការនី គឺកម្មការនីដែលមានផ្ទៃពោះហើយឆ្លងទន្លេ ត្រូវបានអនុញ្ញាតឲ្យឈប់សម្រាករយៈពេល ៣ខែ ដោយទទួលបានប្រាក់ខែត្រឹមតែ ៥០ភាគរយប៉ុណ្ណោះ។ ប៉ុន្តែចាប់ពីឆ្នាំ ២០១៨មក កម្មការនីដែលមានផ្ទៃពោះហើយឆ្លងទន្លេ ត្រូវបានអនុញ្ញាតឲ្យឈប់សម្រាក ៣ខែ ដោយទទួលបានប្រាក់ខែ ១២០ភាគរយ។

បើតាមសម្ដេចតេជោ ហ៊ុន សែន ចាប់ពីខែសីហា ឆ្នាំ ២០២៣តទៅ កម្មការនីនឹងទទួលបានអត្ថប្រយោ​ជន៍បន្ថែមទៀត ដោយនៅពេលមានផ្ទៃពោះហើយពិនិត្យសុខភាព ៤ដង ហើយក្នុងមួយដងនឹងទទួលបានការឧបត្ថម្ភប្រាក់ចំនួន ៨ម៉ឺន រៀល ហើយនៅពេលឆ្លងទន្លេ​នឹងទទួលបានការឧបត្ថម្ភចំនួន ៨០ម៉ឺនរៀល។ បន្ទាប់មកទៀត ក្នុងរយៈពេល ២ឆ្នាំក្រោយការឆ្លងទន្លេ គឺកម្មការនីនឹងត្រូវទទួលបានការឧបត្ថម្ភចំនួន ១០ដងទៀត ដោយក្នុងមួយដងទទួលបានចំនួន ៨ម៉ឺនរៀល ៕