ផ្លូវមួយខ្សែតម្លៃជិត ៤ម៉ឺនដុល្លារ ត្រូវបានបើកការដ្ឋានស្ថាបនា នៅស្រុករមាសហែក

(ខេត្តស្វាយរៀង)៖ នៅព្រឹកថ្ងៃទី១៨ ខែកក្កដា ឆ្នាំ២០២៣ លោក តូច ប៉ូលីវ៉ា អភិបាលរងខេត្ត បានអញ្ជើញបើក ការដ្ឋានកសាងផ្លូវក្រាលគ្រួសក្រហម ១ខ្សែ ដែលមានប្រវែងសរុប ១,៨៥០ម៉ែត្រ អំណោយលោក សាយ សំអាល់ រដ្ឋមន្ត្រីក្រសួងបរិស្ថាន ទុកជាអនុស្សាវរីយ៍ និងចំណងដៃជូនដល់អ្នកភូមិជីកដី ឃុំអណ្តូងត្របែកស្រុករមាសហែក។

លោក តូច ប៉ូលីវ៉ា បានលើកឡើងថា ក្រោមមាគ៌ាដឹកនាំដ៏ត្រឹមត្រូវរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្តី នៃព្រះរាជាណាចក្រកម្ពុជា និងក្រោមគោលនយោបាយឈ្នះៗ បានធ្វើឱ្យប្រទេសជាតិ ទាំងមូលទទួល​បាននូវសុខសន្តិភាពពេញផ្ទៃប្រទេស ជាពិសេសបានធ្វើឱ្យខេត្តស្វាយរៀង ក៏ដូចជាស្រុករមាសហែក ធ្លាប់ជាសមរភូមិ យ៉ាងក្តៅគគុក មានការអភិវឌ្ឍ និងរីកចម្រើនលើគ្រប់វិស័យ។

លោក បានសំណូមពរដល់បងប្អូន ទាំងអស់ ត្រូវរួមគ្នាជួយថែរក្សាទ្រព្យសម្បត្តិសាធារណៈ ជាពិសេសផ្លូវថ្នល់នេះតែម្តង ព្រោះថា ការកសាងនិងជួសជុលហេដ្ឋារចនាសម្ព័ន្ធ គឺត្រូវចំណាយថវិកាសរុប ៣៨,៥៥៩.៦០ដុល្លា (សាមសិបប្រាំបីពាន់ ប្រាំរយហាសិបប្រាំបួន ដុល្លាអាមេរិក និងហុកសិបសេន) ម្យ៉ាងទៀតប្រជាពលរដ្ឋ ដែលនៅរស់នៅសងខាងផ្លូវកំពុង កសាងមេត្តាយោគយល់ និងអធ្យាស្រ័យព្រមទាំង ចូលរួមសហការ ជាមួយក្រុមការងារបច្ចេកទេស ដើម្បីឱ្យសមិទ្ធផល​ថ្មីនេះសម្រេចបានទៅតាមការគ្រោងទុក។

លើសពីនេះទៀត លោកអភិបាលរងខេត្ត បានអំពាវនាវដល់ពលរដ្ឋ ត្រូវស្រលាញ់ និងថែរក្សាឱ្យបាននូវសន្តិភាព ស្ថេរភាព និងត្រូវធ្វើជាប្រជាពលរដ្ឋគំរូ ក្នុងសង្គម នាពេលខាងមុខ សូមបងប្អូនគ្រប់គ្នាចូលរួមក្នុងការបោះឆ្នោត ជ្រើសតាំងតំណាងរាស្ត្រនីតិកាល ទី៧ ឆ្នាំ២០២៣ ដែលប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ដើម្បីសម្តែង​ឱ្យឃើញនូវប្រជាធិបតេយ្យសេរីពហុបក្សនៅកម្ពុជា៕

អត្ថបទ ៖ ភក្ដី